ਮਨਜੋਤ ਸਿੰਘ ਨੂੰ ਗੀਤਕਾਰੀ ਦੇ ਖੇਤਰ ਵਿੱਚ ਮਨੀ ਮਨਜੋਤ ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ ਅਤੇ ਸਿਡਨੀ ਵਿੱਚ ਰਹਿੰਦੇ ਇਸ ਚਾਰਟਡ ਅਕਾਊਂਟੈਂਟ ਦੇ ਲਿਖੇ ਬੋਲ ਪੰਜਾਬੀ, ਹਿੰਦੀ ਅਤੇ ਉਰਦੂ ਸੰਗੀਤ ਵਿੱਚ ਅਕਸਰ ਸੁਣਾਈ ਦਿੰਦੇ ਹਨ।
7 ਸਾਲ ਦੀ ਉਮਰ ਵਿੱਚ ਮਨਜੋਤ ਆਪਣੇ ਪਰਿਵਾਰ ਨਾਲ ਲੁਧਿਆਣੇ ਤੋਂ ਆਸਟ੍ਰੇਲੀਆ ਆ ਗਏ ਸਨ, ਪਰ ਪੰਜਾਬ ਤੋਂ 10,000 ਕਿਮੀ ਤੋਂ ਵੱਧ ਦੀ ਦੂਰੀ ਵੀ ਉਹਨਾਂ ਨੂੰ ਪੰਜਾਬੀਅਤ ਨਾਲੋਂ ਤੋੜ ਨਹੀਂ ਸਕੀ।
“ਸਾਡੇ ਮਾਂ-ਬਾਪ ਨੇ ਸਾਡੀਆਂ ਰਗਾਂ ‘ਚ ਪੰਜਾਬੀ ਐਸੀ ਭਰ ਦਿੱਤੀ ਹੈ ਕਿ ਹੁਣ ਇਸ ਨੂੰ ਕੋਈ ਕੱਢ ਨਹੀਂ ਸਕਦਾ”, ਐਸ ਬੀ ਐਸ ਪੰਜਾਬੀ ਨਾਲ ਗੱਲ ਕਰਦਿਆਂ ਮਨਜੋਤ ਨੇ ਦੱਸਿਆ।
ਉਨ੍ਹਾਂ ਕਿਹਾ ਕਿ ਘਰ ਵਿੱਚ ਅੰਗਰੇਜ਼ੀ ਨਾਂ ਬੋਲਣ ਦੀ ਸਖ਼ਤ ਹਿਦਾਇਤ ਸੀ ਅਤੇ ਉਹਨਾਂ ਦੇ ਪਿਤਾ ਨੇ ਪੰਜਾਬੀ ਗੀਤਾਂ ਅਤੇ ਕਿਤਾਬਾਂ ਰਾਹੀਂ ਆਪਣੇ ਬੱਚਿਆਂ ਨੂੰ ਪੰਜਾਬੀ ਬੋਲੀ ਅਤੇ ਸਭਿਆਚਾਰ ਨਾਲ ਜੋੜ ਕੇ ਰੱਖਿਆ।
ਬਚਪਨ ਤੋਂ ਹੀ ਪੰਜਾਬੀ ਸਾਹਿਤ ਦੇ ਉੱਘੇ ਲੇਖਕਾਂ ਨੂੰ ਪੜ੍ਹ ਕੇ ਪ੍ਰੇਰਿਤ ਹੋਏ ਮਨਜੋਤ ਨੇ ਦੱਸਿਆ ਕਿ 2016 ਵਿੱਚ ਡਾ. ਸੁਰਜੀਤ ਪਾਤਰ ਸਾਹਮਣੇ ਆਪਣੀ ਲਿਖੀ ਗ਼ਜ਼ਲ ਸੁਣਾਉਣਾ ਉਹਨਾਂ ਲਈ ਮਾਣ ਵਾਲੀ ਗੱਲ ਸੀ।
“ਗੀਤ ਲਿਖਣਾਂ ਸਿਰਫ ਮੇਰਾ ਸ਼ੌਂਕ ਹੀ ਸੀ, ਪਰ ਹੁਣ ਲੱਗਦਾ ਹੈ ਕਿ ਸ਼ਾਇਦ ਇਸ ਖੇਤਰ ਵਿੱਚ ਮੇਰਾ ਸਫਰ ਹੋਰ ਵੀ ਬਹੁਤ ਅੱਗੇ ਤੱਕ ਹੈ”, ਮਨਜੋਤ ਨੇ ਕਿਹਾ।
ਮਨਜੋਤ ਦੇ ਲਿਖੇ ਗੀਤ ਦੇਸ਼ਾਂ-ਵਿਦੇਸ਼ਾਂ ਵਿੱਚ ਬੈਠੇ ਗਾਇਕਾਂ ਨੇ ਗਏ ਹਨ ਜਿਨ੍ਹਾਂ ਵਿੱਚ ਰਾਹਤ ਫ਼ਤਿਹ ਅਲੀ ਖਾਨ ਦਾ ਗਾਇਆ ਗੀਤ ‘ਮੇਰੇ ਹੋ ਜਾਓ’, ਅਦਨਾਨ ਧੂਲ ਦਾ ਗੀਤ ‘ਘੁੰਗਰੂ’ ਅਤੇ ਨੂਰ ਚਾਹਲ ਦਾ ਗਾਇਆ ‘ਸੋਹਣਾ ਕੋਈ’ ਸ਼ਾਮਿਲ ਹਨ।
2024 ਵਿੱਚ ਗੁਰੂ ਨਾਨਕ ਦੇਵ ਜੀ ਦੇ ਗੁਰਪੁਰਬ ਨੂੰ ਸਮਰਪਿਤ, ਗਾਇਕ ਹਸਰਤ ਦੀ ਆਵਾਜ਼ ਵਿੱਚ ਗਾਇਆ ਗੀਤ ‘ਅੰਗ ਸੰਗ’ ਵੀ ਦੁਨੀਆ ਭਰ ਵਿੱਚ ਸਰਾਹਿਆ ਗਿਆ।
ਆਸਟ੍ਰੇਲੀਆ ਵਿੱਚ ਬੈਠੇ ਮਨੀ ਮਨਜੋਤ ਨੇ ਕਿਸ ਤਰ੍ਹਾਂ ਗਾਇਕੀ ਦੇ ਖੇਤਰ ਵਿੱਚ ਨਾਮਣਾ ਖੱਟਿਆ ਅਤੇ ਇਸ ਸਫ਼ਰ ਵਿਚ ਕੀ ਮੁਸ਼ਕਿਲਾਂ ਆਈਆਂ, ਜਾਨਣ ਲਈ ਸੁਣੋ ਐਸ ਬੀ ਐਸ ਪੰਜਾਬੀ ਦਾ ਇਹ ਪੌਡਕਾਸਟ।
ਸਾਡੇ ਸਾਰੇ ਪੌਡਕਾਸਟ ਇਸ ਲਿੰਕ ਰਾਹੀਂ ਸੁਣੇ ਜਾ ਸਕਦੇ ਹਨ।
ਐਸ ਬੀ ਐਸ ਪੰਜਾਬੀ ਦੁਨੀਆ ਭਰ ਦੀਆਂ ਤਾਜ਼ਾ-ਤਰੀਨ ਖ਼ਬਰਾਂ ਸਮੇਤ ਉਨ੍ਹਾਂ ਕਹਾਣੀਆਂ ਨਾਲ ਜੋੜਦਾ ਹੈ ਜੋ ਆਸਟ੍ਰੇਲੀਆ ਵਿਚਲੇ ਜੀਵਨ ਅਤੇ ਪੰਜਾਬੀ ਬੋਲਣ ਵਾਲੇ ਆਸਟ੍ਰੇਲੀਅਨ ਭਾਈਚਾਰੇ ਲਈ ਅਹਿਮ ਹਨ।
ਸਾਡਾ ਲਾਈਵ ਪ੍ਰੋਗਰਾਮ ਤੁਸੀਂ ਸੋਮਵਾਰ ਤੋਂ ਸ਼ੁੱਕਰਵਾਰ ਸ਼ਾਮ 4 ਵਜੇ SBS ਸਾਊਥ ਏਸ਼ੀਅਨ
ਦੇ ਡਿਜੀਟਲ ਰੇਡੀਓ ਉੱਤੇ, ਆਪਣੇ ਟੈਲੀਵਿਜ਼ਨ 'ਤੇ ਚੈਨਲ 305 ਉੱਤੇ, SBS ਆਡੀਓ ਐਪ
ਜਾਂ ਸਟ੍ਰੀਮ ਰਾਹੀਂ ਸੁਣ ਸਕਦੇ ਹੋ। ਹੋਰ ਜਾਣਕਾਰੀ ਲਈ ਸਾਨੂੰ ਵੈਬਸਾਈਟ, ਫੇਸਬੁੱਕ ਅਤੇ ਇੰਸਟਾਗ੍ਰਾਮ 'ਤੇ ਫਾਲੋ ਕਰੋ।
