ਪਿਛਲੇ ਦਹਾਕੇ ਦੌਰਾਨ ਆਸਟ੍ਰੇਲੀਆ ਵਿੱਚ ਹੜ੍ਹਾਂ ਦੀਆਂ ਰਿਕਾਰਡ ਤੋੜ ਭਿਆਨਕ ਘਟਨਾਵਾਂ ਦਰਜ ਕੀਤੀਆਂ ਗਈਆਂ ਹਨ। 2020 ਤੋਂ 2022 ਦੇ ਦਰਮਿਆਨ ਕਈ ਵੱਡੇ ਖੇਤਰ ਤਿੰਨ ਤੋਂ ਚਾਰ ਵਾਰ ਪਾਣੀ ਵਿੱਚ ਡੁੱਬ ਗਏ ਸਨ। ਲਗਾਤਾਰ ਤੇਜ਼ ਬਾਰਿਸ਼ ਕਾਰਨ ਕਈ ਵਾਰ ਨਦੀਆਂ-ਨਾਲਿਆਂ ਦਾ ਪਾਣੀ ਬੰਨ੍ਹ ਤੋੜਕੇ ਬਾਹਰ ਆਇਆ। ਤੁਹਾਨੂੰ ਇਹ ਕਿਵੇਂ ਪਤਾ ਲੱਗ ਸਕਦਾ ਹੈ ਕਿ ਕੋਈ ਗੰਭੀਰ ਮੌਸਮੀ ਘਟਨਾ ਵਾਪਰਨ ਵਾਲੀ ਹੈ ਅਤੇ ਉਸਦੀ ਤਿਆਰੀ ਤੁਸੀਂ ਕਿਵੇਂ ਕਰ ਸਕਦੇ ਹੋ, ਇਹ ਜਾਨਣ ਲਈ ਸੁਣੋ ਇਹ ਖਾਸ ਰਿਪੋਰਟ।
ਜਦੋਂ ਤੂਫਾਨ ਅਤੇ ਹੜ੍ਹ ਆਉਂਦੇ ਹਨ ਤਾਂ ਆਸਟ੍ਰੇਲੀਆ ਵਿੱਚ ਜ਼ਿਆਦਾਤਰ ਭਾਈਚਾਰੇ ਸਹਾਇਤਾ ਲਈ ਆਪਣੇ ਸਥਾਨਕ ਰਾਜ ਜਾਂ ਖੇਤਰ ਦੀਆਂ ਐਮਰਜੈਂਸੀ ਸੇਵਾਵਾਂ ਉੱਤੇ ਨਿਰਭਰ ਕਰਦੇ ਹਨ।
ਐਸ.ਈ.ਐਸ ਵਜੋਂ ਜਾਣੀਆਂ ਜਾਂਦੀਆਂ ਇਹ ਏਜੰਸੀਆਂ ਭਾਈਚਾਰਿਆਂ ਨੂੰ ਐਮਰਜੈਂਸੀ ਲਈ ਤਿਆਰ ਕਰਨ ਅਤੇ ਉਹਨਾਂ ਦੇ ਜੋਖਮ ਨੂੰ ਘਟਾਉਣ ਵਿੱਚ ਸਹਾਇਤਾ ਕਰਦੀਆਂ ਹਨ। ਇਹ ਏਜੰਸੀਆਂ ਬਰਸਾਤ ਰੁਕਣ ਅਤੇ ਪਾਣੀ ਘੱਟ ਜਾਣ ਤੋਂ ਬਾਅਦ ਨਿਕਾਸੀ, ਸਫਾਈ ਤੇ ਮੁਰੰਮਤ ਦੇ ਕੰਮਾਂ ਵਿੱਚ ਵੀ ਸਹਾਇਤਾ ਕਰਦੀਆਂ ਹਨ।
ਹਰੇਕ ਐਸ.ਈ.ਐਸ ਏਜੰਸੀ ਆਪਣੇ ਉੱਚ ਸਿਖਲਾਈ ਪ੍ਰਾਪਤ ਵਲੰਟੀਅਰਾਂ ਉੱਤੇ ਨਿਰਭਰ ਕਰਦੀ ਹੈ।
ਐਸ.ਈ.ਐਸ ਵਲੰਟੀਅਰ ਅਕਸਰ ਇੱਕ ਗੰਭੀਰ ਤੂਫ਼ਾਨ ਜਾਂ ਹੜ੍ਹ ਆਉਣ ਤੋਂ ਪਹਿਲਾਂ ਨਿਵਾਸੀਆਂ ਨੂੰ ਚੇਤਾਵਨੀ ਦੇਣ ਲਈ ਉਹਨਾਂ ਦੇ ਘਰਾਂ ਦੇ ਦਰਵਾਜ਼ੇ ਖੜਕਾਉਂਦੇ ਹਨ।
ਉਹ ਨਿਵਾਸੀਆਂ ਨੂੰ ਨਿਕਾਸੀ ਪ੍ਰਕਿਰਿਆਵਾਂ ਅਤੇ ਵਿਕਲਪਾਂ ਬਾਰੇ ਜਾਣਕਾਰੀ ਪ੍ਰਦਾਨ ਕਰਦੇ ਹਨ। ਉਹ ਜਾਇਦਾਦਾਂ ਜਾਂ ਘਰਾਂ ਦੇ ਬੁਨਿਆਦੇ ਢਾਂਚੇ ਦੀ ਸਾਂਭ ਸੰਬਾਲ ਲਈ ਖ਼ਤਰਨਾਕ ਵਸਤੂਆਂ ਨੂੰ ਹਟਾਉਣ ਅਤੇ ਪਾਣੀ ਨੂੰ ਰੋਕਣ ਲਈ ਰੇਤ ਦੇ ਥੈਲਿਆਂ ਦੀ ਇੱਕ ਕੰਧ ਬਣਾਉਣ ਵਿੱਚ ਵੀ ਮਦਦ ਕਰਦੇ ਹਨ।
ਡੋਰੋਥੀ ਟ੍ਰੈਨ ਨਿਊ ਸਾਊਥ ਵੇਲਜ਼ ਦੇ ਐਸ ਈ ਐਸ ਲਈ ਇੱਕ ਕਮਿਊਨਿਟੀ ਸਮਰੱਥਾ ਅਧਿਕਾਰੀ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਸਭ ਤੋਂ ਪਹਿਲਾ ਕਦਮ ਤਿਆਰੀ ਹੈ। ਉਹ ਕਹਿੰਦੇ ਹਨ ਕਿ ਲੋਕਾਂ ਨੂੰ ਆਪਣੇ ਖ਼ਤਰੇ ਦੇ ਪੱਧਰ ਨੂੰ ਸਮਝਣਾ ਚਾਹੀਦਾ ਹੈ ਤਾਂ ਜੋ ਉਹ ਐਮਰਜੈਂਸੀ ਸਟ੍ਰੈਟਜੀ ਤਿਆਰ ਕਰ ਸਕਣ।
ਜਲ ਮਾਰਗਾਂ ਦੇ ਨੇੜੇ ਰਹਿਣ ਵਾਲੇ ਲੋਕਾਂ ਨੂੰ ਹੜ੍ਹ ਆਉਣ ਦੀ ਸਥਿਤੀ ਵਿੱਚ ਮੌਸਮ ਦੇ ਹਾਲਾਤਾਂ ਬਾਰੇ ਤਾਜ਼ਾ ਜਾਣਕਾਰੀ ਹੋਣਾ ਜ਼ਰੂਰੀ ਹੈ। ਲੋਕ ਮੌਸਮ ਵਿਗਿਆਨ ਬਿਊਰੋ ਜਾਂ ਐਸ ਈ ਐਸ ਐਪਾਂ, ਵੈੱਬਸਾਈਟਾਂ ਜਾਂ ਆਪਣੇ ਸੋਸ਼ਲ ਮੀਡੀਆ ਰਾਹੀਂ ਅੱਪ ਟੂ ਡੇਟ ਮੌਸਮ ਦੇ ਪੂਰਵ ਅਨੁਮਾਨਾਂ ਦਾ ਧਿਆਨ ਰੱਖ ਸਕਦੇ ਹਨ।
ਪਾਣੀ ਵਧਣ ਤੋਂ ਪਹਿਲਾਂ ਉਹਨਾਂ ਨੂੰ ਆਪਣੀਆਂ ਐਮਰਜੈਂਸੀ ਯੋਜਨਾਵਾਂ ਲਾਗੂ ਕਰਨ ਲਈ ਤਿਆਰ ਹੋਣਾ ਚਾਹੀਦਾ ਹੈ। ਜੇਕਰ ਉਹਨਾਂ ਕੋਲ ਬੱਚੇ, ਪਾਲਤੂ ਜਾਨਵਰ ਜਾਂ ਪਸ਼ੂ ਹਨ ਤਾਂ ਉਹਨਾਂ ਨੂੰ ਇਹ ਪਹਿਲਾਂ ਹੀ ਨਿਸ਼ਚਿਤ ਕਰ ਲੈਣਾ ਚਾਹੀਦਾ ਹੈ ਕਿ ਉਹਨਾਂ ਨੂੰ ਸੁਰੱਖਿਅਤ ਕਿੱਥੇ ਅਤੇ ਕਿਵੇਂ ਲਿਜਾਇਆ ਜਾ ਸਕੇਗਾ।
ਜੇਕਰ ਖ਼ਤਰਾ ਵੱਧਦਾ ਹੈ ਤਾਂ ਉਹਨਾਂ ਨੂੰ ਉਥੋਂ ਕੱਢਣ ਦੀ ਲੋੜ ਹੋ ਸਕਦੀ ਹੈ ਹਾਲਾਂਕਿ ਵਿਕਲਪਕ ਤੌਰ ਉੱਤੇ ਉਹ ਉਥੇ ਰਹਿਣ ਅਤੇ ਆਪਣੀ ਜਾਇਦਾਦ ਦਾ ਧਿਆਨ ਰੱਖਣ ਦਾ ਫੈਸਲਾ ਕਰ ਸਕਦੇ ਹਨ।
ਸ਼੍ਰੀਮਤੀ ਟ੍ਰੈਨ ਦਾ ਕਹਿਣਾ ਹੈ ਕਿ ਕਿਸੇ ਵੀ ਹਲਾਤ ਵਿੱਚ ਜੋ ਲੋਕ ਹੜ੍ਹ ਪ੍ਰਭਾਵਿਤ ਖੇਤਰਾਂ ਵਿੱਚ ਰਹਿੰਦੇ ਹਨ ਉਹਨਾਂ ਨੂੰ ਪਹਿਲਾਂ ਹੀ ਇਹ ਵਿਚਾਰ ਕਰਨ ਦੀ ਲੋੜ ਹੁੰਦੀ ਹੈ ਕਿ ਉਹਨਾਂ ਨੂੰ ਕਿਹੜੀਆਂ ਸਪਲਾਈਆਂ ਦੀ ਲੋੜ ਪੈ ਸਕਦੀ ਹੈ ਅਤੇ ਹਮੇਸ਼ਾਂ ਇੱਕ ਐਮਰਜੈਂਸੀ ਪੈਕ ਤਿਆਰ ਰੱਖਣਾ ਚਾਹੀਦਾ ਹੈ।
ਪੈਕ ਕਰਨ ਲਈ ਹੋਰ ਜ਼ਰੂਰੀ ਚੀਜ਼ਾਂ ਵਿੱਚ ਬੈਟਰੀਆਂ, ਫਲੈਸ਼ਲਾਈਟਾਂ, ਮੋਮਬੱਤੀਆਂ, ਰੇਨ ਗੀਅਰ, ਕੰਬਲ ਅਤੇ ਟਾਇਲਟਰੀ ਸ਼ਾਮਲ ਹਨ।
ਇਹ ਜਾਂਚ ਕਰਨਾ ਵੀ ਮਹੱਤਵਪੂਰਨ ਹੈ ਕਿ ਤੁਹਾਡੀ ਬੀਮਾ ਪਾਲਿਸੀ ਮੌਜੂਦਾ ਅਤੇ ਲੋੜੀਂਦੀ ਹੈ। ਯਕੀਨੀ ਬਣਾਓ ਕਿ ਇਹ ਤੁਹਾਡੇ ਸਥਾਨ ਲਈ ਖਾਸ ਘਟਨਾਵਾਂ ਦੀਆਂ ਕਿਸਮਾਂ ਲਈ ਤੁਹਾਨੂੰ ਕਵਰ ਕਰਦੀ ਹੈ। ਇਹਨਾਂ ਵਿੱਚ ਫਲੈਸ਼ ਹੜ੍ਹ, ਤੂਫਾਨ ਦੇ ਪਾਣੀ ਦਾ ਵਹਾਅ, ਸਬੰਧਤ ਜ਼ਮੀਨ ਖਿਸਕਣ ਅਤੇ ਦਰਖਤਾਂ ਜਾਂ ਡਿੱਗਣ ਵਾਲੀਆਂ ਚੀਜ਼ਾਂ ਕਾਰਨ ਨੁਕਸਾਨ ਸ਼ਾਮਲ ਹੋ ਸਕਦੇ ਹਨ।
