ਯੂਨੈਸਕੋ ਹਰ ਸਾਲ ਦੀ ਤਰ੍ਹਾਂ ਇਸ ਵਾਰ ਵੀ 21 ਫਰਵਰੀ ਦੇ ਦਿਨ ਕੌਮਾਂਤਰੀ ਮਾਤ-ਭਾਸ਼ਾ ਦਿਵਸ ਮਣਾ ਰਿਹਾ ਹੈ. ਆਲ ਇੰਡੀਆ ਰੇਡਿਓ, ਚੰਡੀਗੜ੍ਹ ਨਾਲ ਲਗਭਗ ਦੋ ਦਹਾਕਿਆਂ ਤੋਂ ਵੀ ਲੰਬੇ ਸਮੇਂ ਤੋਂ ਜੁੜੇ ਸੀਨੀਅਰ ਪੱਤਰਕਾਰ ਪ੍ਰੀਤਮ ਸਿੰਘ ਰੁਪਾਲ ਨੇ ਐਸ.ਬੀ.ਐਸ. ਪੰਜਾਬੀ ਨਾਲ ਇਸ ਮੌਕੇ ਆਪਣੇ ਵਿਚਾਰ ਸਾਂਝੇ ਕੀਤੇ।
ਰੇਡਿਓ ਜਗਤ ਦੀ ਮੰਨੀ-ਪ੍ਰਮੰਨੀ ਆਵਾਜ਼ ਅਤੇ ਬਤੌਰ ਸਕੱਤਰ ਪੰਜਾਬ ਸੰਗੀਤ-ਨਾਟ ਅਕਾਦਮੀ ਨਾਲ ਸੇਵਾ ਨਿਭਾਅ ਰਹੇ, ਪ੍ਰੀਤਮ ਸਿੰਘ ਰੁਪਾਲ ਮੰਨਦੇ ਨੇ ਕਿ ਪੰਜਾਬੀ ਭਾਸ਼ਾ ਨੂੰ ਬਾਹਰੋਂ ਨਹੀਂ ਬਲਕਿ ਅੰਦਰੋਂ ਹੀ ਖ਼ਤਰਾ ਹੈ. ਕੌਮਾਂਤਰੀ ਮਾਤ-ਭਾਸ਼ਾ ਦਿਵਸ ਮੌਕੇ ਰੁਪਾਲ ਨੇ ਦੱਸਿਆ ਕਿ ਕਿੰਝ ਬੰਗਾਲੀ ਭਾਸ਼ਾ ਦੀ ਮੰਗ ਲਈ ਛਿੜਿਆ ਅੰਦੋਲਨ ਇੱਕ ਰਾਜਸੀ ਰੂਪ ਧਾਰ ਗਿਆ, ਅਤੇ ਅੱਗੋਂ ਚੱਲਕੇ ਇਹ ਵੀ ਇਕ ਕਾਰਣ ਰਿਹਾ ਕਿ ਪੂਰਬੀ ਪਾਕਿਸਤਾਨ ਨੂੰ ਬੰਗਲਾਦੇਸ਼ ਦਾ ਦਰਜਾ ਮਿਲਿਆ।
"ਯੂਨੈਸਕੋ ਮੁਤਾਬਿਕ ਪੰਜਾਬੀ ਵੀ ਉਹਨਾਂ ਕੁਝ ਭਾਸ਼ਾਵਾਂ ਦੀ ਸੂਚੀ 'ਚ ਸ਼ੁਮਾਰ ਹੈ, ਜੋ ਕਿ ਆਉਂਦੇ ਕੁਝ ਸਮਿਆਂ ਦੌਰਾਨ ਖ਼ਤਰੇ 'ਚ ਪੈ ਸਕਦੀਆਂ ਹਨ, ਬਾਵਜੂਦ ਇਸਦੇ ਇਹ ਭਾਸ਼ਾ ਵਰਤਮਾਨ ਵਿੱਚ ਦੁਨੀਆਂ ਦੀਆਂ 10 ਵੱਡੀਆਂ ਭਾਸ਼ਾਵਾਂ 'ਚੋਂ ਇੱਕ ਗਿਣੀ ਜਾਂਦੀ ਹੈ", ਰੁਪਾਲ ਨੇ ਅਗਿਓਂ ਦੱਸਿਆ ਕਿ ਭਾਸ਼ਾ ਦਾ ਆਧਾਰ ਉਸਦੀ ਲਿੱਪੀ ਅਤੇ ਵਿਆਕਰਣ ਹੀ ਹੈ. ਪਰ ਪੰਜਾਬੀ ਭਾਸ਼ਾ 'ਚੋਂ ਅਲੋਪ ਹੋ ਰਹੇ ਸਥਾਨਕ ਸ਼ਬਦ 'ਬੋਲੀ' ਲਈ ਵੀ ਖ਼ਤਰੇ ਦੀ ਘੰਟੀ ਹੈ.
ਪੰਜਾਬੀ ਭਾਸ਼ਾ 'ਚ ਲਿਖੇ ਗਏ ਸਾਹਿਤ ਦੀ ਪੁਹੰਚ ਹੁਣ ਨਵੇਂ ਜ਼ਮਾਨੇ ਦੀ ਪੀੜ੍ਹੀ ਤੱਕ ਆਸਾਨ ਬਣਾਉਣ ਲਈ ਇਸਦੇ ਤਕਨੀਕੀਕਰਨ 'ਤੇ ਵੀ ਕੰਮ ਕਰਿਆ ਜਾਣਾ ਚਾਹੀਦਾ ਹੈ. ਰੁਪਾਲ ਮੰਨਦੇ ਹਨ ਕਿ ਹੋਰਨਾਂ ਵਿਦੇਸ਼ੀ ਭਾਸ਼ਾਵਾਂ ਦੀ ਤਰ੍ਹਾਂ ਪੰਜਾਬੀ ਸਾਹਿਤ ਦੀਆਂ ਵੱਧ ਤੋਂ ਵੱਧ ਲਿਖਤਾਂ ਇੰਟਰਨੈਟ 'ਤੇ ਮੁਫ਼ਤ ਮੁੱਹਈਆ ਹੋਣ, ਤਾਂ ਜੋ 'ਲਾਇਬ੍ਰੇਰੀ ਕਲਚਰ' ਤੋਂ ਦੂਰ ਹੁੰਦੀ ਜਾ ਰਹੀ ਅਜੋਕੀ ਪੀੜ੍ਹੀ ਨੂੰ ਡਿਜੀਟਲ ਕਿਤਾਬਾਂ ਦੇ ਮਾਧਿਅਮ ਨਾਲ 'ਗੁਰਮੁਖੀ' ਦੇ ਨੇੜੇ ਲਿਆਉਂਦਾ ਜਾ ਸਕੇ.
