ਆਸਟ੍ਰੇਲੀਆ ਵਿੱਚ ਟੈਕਸ ਰਿਟਰਨ ਦੀ ਫਾਈਲ ਦਾਇਰ ਕਰਨ ਦਾ ਸਮਾਂ ਨਜ਼ਦੀਕ ਆ ਰਿਹਾ ਹੈ। ਇੱਕ ਪੇਸ਼ੇਵਰ ਨਾਲ ਕੀਤੀ ਇਸ ਖ਼ਾਸ ਗੱਲਬਾਤ ਵਿੱਚ ਜਾਣੋ ਕਿ ਇਸ ਸਾਲ ਦੇ ਟੈਕਸ ਰਿਟਰਨ ਨੂੰ ਲੈ ਕੇ ਆਸਟ੍ਰੇਲੀਆ ਦੇ ਸਰਕਾਰੀ ਟੈਕਸ ਵਿਭਾਗ ਵਲੋਂ ਕੀ ਬਦਲਾਵ ਕੀਤੇ ਗਏ ਹਨ ਅਤੇ ਇਹ ਤੁਹਾਨੂੰ ਕਿਵੇਂ ਪ੍ਰਭਾਵਿਤ ਕਰ ਸਕਦੇ ਹਨ।
ਆਸਟ੍ਰੇਲੀਆ ਵਿੱਚ ਕਿਸੇ ਵੀ ਸਰੋਤ ਤੋਂ ਕਮਾਈ ਕਰਨ ਵਾਲੇ ਵਿਅਕਤੀ ਲਈ ਟੈਕਸ ਰਿਟਰਨ ਫਾਇਲ ਕਰਨਾ ਲਾਜ਼ਮੀ ਹੈ।
ਸਰਕਾਰੀ ਵਿਭਾਗ ਦੀ ਵੈਬਸਾਈਟ ਵਲੋਂ ਉਪਲੱਬਧ ਜਾਣਕਾਰੀ ਮੁਤਾਬਕ ਤੁਹਾਨੂੰ 31 ਅਕਤੂਬਰ ਤੱਕ ਟੈਕਸ ਰਿਟਰਨ ਅਪਲਾਈ ਕਰਨਾ ਚਾਹੀਦਾ ਹੈ।
ਹਰ ਸਾਲ ਵਿਭਾਗ ਵਲੋਂ ਟੈਕਸ ਰਿਟਰਨ ਨੂੰ ਲੈ ਕੇ ਕੁੱਝ ਬਦਲਾਵ ਕੀਤੇ ਜਾਂਦੇ ਹਨ।
ਸਿਡਨੀ ਤੋਂ ਪੇਸ਼ੇਵਰ ਅਕਾਊਂਟੈਂਟ ਹਰਜੀਤ ਸਿੰਘ ਨੇ ਐਸ ਬੀ ਐਸ ਪੰਜਾਬੀ ਨਾਲ ਗੱਲਬਾਤ ਕਰਦਿਆਂ ਇੰਨ੍ਹਾਂ ਬਦਲਾਵਾਂ ਬਾਰੇ ਸੰਖੇਪ ਵਿੱਚ ਜਾਣਕਾਰੀ ਸਾਂਝੀ ਕੀਤੀ।
ਗੱਲਬਾਤ ਦੌਰਾਨ ਉਹਨਾਂ ਦੱਸਿਆ ਕਿ ਇਸ ਸਾਲ ਟੈਕਸ ਰਿਟਰਨ ਨੂੰ ਲੈ ਕੇ ਜੋ ਸਭ ਤੋਂ ਵੱਡਾ ਬਦਲਾਵ ਦੇਖਣ ਨੂੰ ਮਿਲਿਆ ਹੈ ਉਹ 30 ਜੂਨ 2022 ਤੋਂ ਘੱਟ ਅਤੇ ਮੱਧ ਕਮਾਈ ਕਰਨ ਵਾਲਿਆਂ ਨੂੰ ਮਿਲਣ ਵਾਲਾ ਟੈਕਸ ਆਫਸੈੱਟ ਹਟਾਇਆ ਜਾਣਾ ਹੈ।
ਇਸ ਦਾ ਮਤਲਬ ਇਹ ਹੈ ਕਿ ਇਸ ਵਾਰ ਘੱਟ ਟੈਕਸ ਰਿਟਰਨ ਦੀ ਉਮੀਦ ਕੀਤੀ ਜਾ ਸਕਦੀ ਹੈ।
ਹਾਲਾਂਕਿ 66,667 ਡਾਲਰ ਤੱਕ ਦੀ ਸਾਲਾਨਾ ਕਮਾਈ ਕਰਨ ਵਾਲਿਆਂ ਨੂੰ ਉਹਨਾਂ ਦੀ ਕਮਾਈ ਦੇ ਅਨੁਸਾਰ ਆਫਸੈੱਟ ਦਿੱਤਾ ਜਾਵੇਗਾ।
ਜੋ ਲੋਕ ਪਹਿਲੀ ਵਾਰ ਟੈਕਸ ਰਿਟਰਨ ਫਾਈਲ ਕਰਨ ਜਾ ਰਹੇ ਹਨ ਉਹਨਾਂ ਲਈ ਹਰਜੀਤ ਸਿੰਘ ਨੇ ਕੁੱਝ ਸੁਝਾਅ ਸਾਂਝੇ ਕੀਤੇ ਹਨ।
ਇਹ ਸੁਝਾਅ ਕੀ ਹਨ ਇਹ ਜਾਨਣ ਲਈ ਇਹ ਇੰਟਰਵਿਊ ਸੁਣੋ..
