ਆਸਟ੍ਰੇਲੀਆ ਵਿੱਚ ਬੁਸ਼ਵਾਕਿੰਗ ਇੱਕ ਪ੍ਰਸਿੱਧ ਮਨੋਰੰਜਨ ਦੀ ਗਤੀਵਿਧੀ ਹੈ। ਇਸ ਰਾਹੀਂ ਦੇਸ਼ ਦੇ ਵਿਸ਼ਾਲ ਅਤੇ ਵਿਲੱਖਣ ਕੁਦਰਤੀ ਵਾਤਾਵਰਣ ਨੂੰ ਨਿਹਾਰਨ ਦਾ ਮੌਕਾ ਮਿਲਦਾ ਹੈ।
ਹਾਲਾਂਕਿ ਲੋਕ ਆਪਣੇ ਵੱਲੋਂ ਪੂਰੀ ਤਿਆਰੀ ਰੱਖਦੇ ਹਨ ਪਰ ਬਾਵਜੂਦ ਇਸਦੇ ਬੁਸ਼ਵਾਕਿੰਗ ਦੌਰਾਨ ਕੁੱਝ ਲੋਕ ਰਸਤੇ ਤੋਂ ਭਟਕ ਜਾਂਦੇ ਹਨ।
‘ਨਿਊ ਸਾਊਥ ਵੇਲਜ਼ ਐਸ ਈ ਅੇਸ ਬੁਸ਼ ਸਰਚ ਐਂਡ ਰੈਸਕਿਊ’ ਤੋਂ ਖੋਜ ਕਮਾਂਡਰ ਕੈਰੋ ਰਿਆਨ ਵਰਗੇ ਸਮਰਪਿਤ ਲੋਕਾਂ ਦੁਆਰਾ ਕਰੀਬ 95 ਪ੍ਰਤੀਸ਼ਤ ਲੋਕਾਂ ਨੂੰ 12 ਘੰਟਿਆਂ ਦੇ ਅੰਦਰ ਰੈਸਕਿਊ ਕੀਤਾ ਜਾਂਦਾ ਹੈ।
ਸ਼੍ਰੀਮਤੀ ਰਿਆਨ ਸੁਝਾਅ ਦਿੰਦੇ ਹਨ ਕਿ ਬੁਸ਼ਵਾਕਿੰਗ ਲਈ ਜਾਣ ਤੋਂ ਪਹਿਲਾਂ ਉਸ ਇਲਾਕੇ ਦੇ ਮੌਸਮ ਅਤੇ ਰਸਤੇ ਦੀ ਜਾਂਚ ਕਰ ਲੈਣੀ ਚਾਹੀਦੀ ਹੈ।
'ਬੁਸ਼ਵਾਕਿੰਗ ਨਿਊ ਸਾਊਥ ਵੇਲਜ਼' ਤੋਂ ਕਿਰਸਟਨ ਮੇਅਰ ਦਾ ਕਹਿਣਾ ਹੈ ਕਿ ਇੱਕਲੇ ਬੁਸ਼ਵਾਕਿੰਗ ਕਰਨਾ ਜ਼ੋਖਮ ਭਰਿਆ ਹੋ ਸਕਦਾ ਹੈ ਕਿਉਂਕਿ ਅਜਿਹੇ ਵਿੱਚ ਤੁਹਾਨੂੰ ਸੱਟ ਲੱਗਣ ਉੱਤੇ ਤੁਹਾਡੀ ਸਹਾਇਤਾ ਕਰਨ ਵਾਲਾ ਕੋਈ ਨਹੀਂ ਹੁੰਦਾ।
ਕੈਰੋ ਰਿਆਨ ਦਾ ਕਹਿਣਾ ਹੈ ਕਿ ਤੁਸੀਂ ਨੈਸ਼ਨਲ ਪਾਰਕਸ ਅਤੇ ਵਾਈਲਡਲਾਈਫ ਸਰਵਿਸ, ਪੁਲਿਸ ਜਾਂ ਕਿਸੇ ਭਰੋਸੇਯੋਗ ਦੋਸਤ ਨੂੰ ਸੂਚਿਤ ਕਰ ਸਕਦੇ ਹੋ।
ਸ਼੍ਰੀਮਤੀ ਮੇਅਰ ਕਹਿੰਦੇ ਹਨ ਕਿ ਇਸ ਤੋਂ ਇਲਾਵਾ 'ਐਮਰਜੈਂਸੀ ਬੀਕਨ' ਵੀ ਨਾਲ ਰੱਖੋ ਕਿਉਂਕਿ ਇਹ ਸੈਟੇਲਾਈਟਾਂ ਨੂੰ ਦੱਸਦਾ ਹੈ ਕਿ ਤੁਸੀਂ ਕਿਥੇ ਹੋ ਅਤੇ ਤੁਹਾਨੂੰ ਮਦਦ ਲਈ ਕਾਲ ਕਰਨ ਵਿੱਚ ਵੀ ਸਹਾਇਤਾ ਮਿਲਦੀ ਹੈ।
ਤੁਸੀਂ ਇਹਨਾਂ ਡਿਵਾਈਸਾਂ ਨੂੰ ਕੁੱਝ ਬਾਹਰੀ ਸਟੋਰਾਂ ਅਤੇ ਰਾਸ਼ਟਰੀ ਪਾਰਕਾਂ ਦੇ ਦਫਤਰਾਂ ਅਤੇ ਇੱਥੋਂ ਤੱਕ ਕਿ ਰਾਸ਼ਟਰੀ ਪਾਰਕਾਂ ਦੇ ਨੇੜੇ ਸਥਿਤ ਪੁਲਿਸ ਸਟੇਸ਼ਨਾਂ ਤੋਂ ਕਿਰਾਏ ਉੱਤੇ ਲੈ ਸਕਦੇ ਹੋ।
ਤੁਸੀਂ ਮੁਫਤ 'ਐਮਰਜੈਂਸੀ ਪਲੱਸ ਐਪ' ਵੀ ਡਾਊਨਲੋਡ ਕਰ ਸਕਦੇ ਹੋ। ਹਾਲਾਂਕਿ ਇਸ ਨੂੰ ਕੰਮ ਕਰਨ ਲਈ ਫ਼ੋਨ ਕਵਰੇਜ ਦੀ ਲੋੜ ਹੁੰਦੀ ਹੈ ਪਰ ਇਹ ਤੁਹਾਡੀ ਸਥਿਤੀ ਪ੍ਰਦਾਨ ਕਰਨ ਅਤੇ ਮਦਦ ਲਈ ਕਾਲ ਕਰਨ ਵਿੱਚ ਸਹਾਇਤਾ ਕਰੇਗਾ।
ਸ਼੍ਰੀਮਤੀ ਮੇਅਰ ਜ਼ੋਰ ਦਿੰਦੇ ਹਨ ਕਿ ਇੱਕ ਵਾਰ ਜਦੋਂ ਤੁਸੀਂ ਝਾੜੀਆਂ ਵਿੱਚ ਦਾਖ਼ਲ ਹੋ ਜਾਂਦੇ ਹੋ ਤਾਂ ਆਪਣੇ ਰੂਟ ਨੂੰ ਚੰਗੀ ਤਰ੍ਹਾਂ ਜਾਣ ਲਓ ਅਤੇ ਨਿਰਧਾਰਿਤ ਰਸਤੇ ਤੋਂ ਨਾ ਭਟਕੋ।
ਪਰ ਕਈ ਵਾਰ ਸੁਚੇਤ ਵਿਉਂਤਬੰਦੀ ਦੇ ਬਾਵਜੂਦ ਵੀ ਲੋਕ ਭਟਕ ਜਾਂਦੇ ਹਨ।
ਸ਼੍ਰੀਮਤੀ ਰਿਆਨ ਦਾ ਕਹਿਣਾ ਹੈ ਕਿ ਅਜਿਹੇ ਹਾਲਾਤਾਂ ਵਿੱਚ ਸਭ ਤੋਂ ਪਹਿਲਾਂ ਆਪਣੇ ਆਪ ਨੂੰ ਸ਼ਾਂਤ ਰੱਖਣ ਦੀ ਕੋਸ਼ਿਸ਼ ਕਰੋ।
ਜੇਕਰ ਤੁਹਾਡੇ ਕੋਲ ਐਮਰਜੈਂਸੀ ਬੀਕਨ ਨਹੀਂ ਹੈ ਤਾਂ ਤੁਹਾਡੀ ਸਥਿਤੀ ਨਾਜ਼ੁਕ ਹੋ ਸਕਦੀ ਹੈ। ਅਜਿਹੇ ਹਾਲਤਾਂ ਵਿੱਚ ਸ਼੍ਰੀਮਤੀ ਰਿਆਨ ਦਾ ਸੁਝਾਅ ਹੈ ਕਿ ਤੁਹਾਨੂੰ ਭੜਕੀਲੇ ਕੱਪੜੇ ਜਾਂ ਕੋਈ ਅਜਿਹੇ ਚਿੰਨ੍ਹ ਸਥਾਪਿਤ ਕਰਨੇ ਚਾਹੀਦੇ ਹਨ ਜਿੰਨ੍ਹਾਂ ਨਾਲ ਤੁਹਾਨੂੰ ਉਪਰੋਂ ਦੇਖ ਪਾਉਣਾ ਜਾਂ ਲੱਭਣਾ ਆਸਾਨ ਹੋ ਸਕੇ।
ਜੇਕਰ ਤੁਸੀਂ ਜ਼ਖਮੀ ਹੋ ਅਤੇ ਮੌਸਮ ਖ਼ਰਾਬ ਹੈ ਤਾਂ ਕੋਈ ਆਸਰਾ ਲੱਭਣ ਦੀ ਕੋਸ਼ਿਸ਼ ਕਰੋ। ਖੁਦ ਨੂੰ ਗਰਮ ਕਰਨ ਦੀ ਕੋਸ਼ਿਸ਼ ਕਰੋ, ਗਿੱਲੇ ਕੱਪੜੇ ਉਤਾਰੋ ਅਤੇ ਅੱਗ ਬਾਲਣ ਦਾ ਯਤਨ ਕਰੋ। ਇਸ ਨਾਲ ਤੁਹਾਨੂੰ ਲੱਭਣਾ ਵੀ ਆਸਾਨ ਹੋ ਜਾਵੇਗਾ।
ਆਪਣੇ ਖਾਣੇ ਅਤੇ ਪਾਣੀ ਨੂੰ ਸਟਾਕ ਕਰ ਕੇ ਰੱਖੋ ਕਿਉਂਕਿ ਮਦਦ ਦੀ ਉਡੀਕ ਕਰਦੇ ਸਮੇਂ ਤੁਹਾਨੂੰ ਇਸਦੀ ਲੋੜ ਹੋਵੇਗੀ।
ਹਾਲਾਂਕਿ ਸਭ ਤੋਂ ਵਧੀਆ ਸੁਰੱਖਿਅਤ ਢੰਗ ਬੁਸ਼ਵਾਕਿੰਗ ਤੋਂ ਪਹਿਲਾਂ ਇਸਦੀ ਮੁਕੰਮਲ ਤਿਆਰੀ ਕਰਨਾ ਹੈ।
