Cali Khameni, hogaamiyaha sare ee kacaanka Iiraan ayaa horkacayay dad badan oo isugu soo baxay caasimada Tahraan, iyagoo sagootinaya maydka Qaasim Suleymani.
Qaasim Suleymani, ayaa la dilay Jamcadii 03/01/2020, isaga oo ay la jireen masuuliin kale, oo qaarkood ay halkaas ku geeriyoodeen, iyagoo la sheegay in laba baabuur ay kala wateen, kuna sii jeedeen Gagida Diyaaradaha ee Baqdaad.
Dilka Qaasim Suleymani, ayaa loo adeegsaday weeraro gantaal oo ciidamada Maraykanku ay la beegsadeen.
Dhacdadan ayaa xiisad ka abuurtay gobalka bariga dhexe, iyadoo wadanka Ciraaq oo falkani ka dhex dhacay uu aad ooga xumaaday, ayna sababtay in baarlamaanka Ciraaq ay maalintii Axada 05/01/20 soo saareen go’aan ay ciidamada Maraykanka wadanka ooga saarayaan.
Dhanka Maraykanka ayaa go’aankaas ku tilmaamay mid caaqiba xun u keeni doona wadanka ciraaq, waa hadii ay doortaan in ay Maraykanka xidhiidhka u jaraan. Dhankiisa madaxweynaha Maraykanka Donald Trump ayaa jawaab uu ka bixiyay hadalkaas ku sheegay in ciidamada Maraykanka ayna ka baxaynin Ciraaq tan iyo inta ay Ciraaq ka bixinayso kharashkii ku baxay saldhiga Maraykanka ee Ciraaq ku yaala.
Saraakiil sarsare oo Marayka oo iyaguna arintan ka hadlayna waxa ay sheegeen in Maraykanka ay culays ku tahay ka bixida Ciraaq, balse Ciraaq ay musiiba u tahay hadii ay Maraykanka wadankooda ka caydhiyaan.
Dhinaca kalena Iiraan ayaa cadha adag iyo qaadan waa ka muujisay dilka maraykanku ay la beegsadeen Gen. Qasim Suleymani, waxaana aad indhaha loogu hayaa falceliska Iiraan ay ka samayni doonto dilka Qaasim, iyadoo la ogyahay in Ismacil Qaani, ninka lagu badalay Qaasim Sulayman, uu jeediyay hadala adadag oo uu ku sheegayo in loo aari doono Qaasim Sulayman.
Dhacdadan ayaan ku ekeeyn saamaynteeda siyaasadeed oo kaliya, iyadoo la sheegay in xitaa suuqyadii maalka iyo saliida ay saamayn weyn ku yeelatay, lagana cabsi qabo inay saamaynteedu cirka isku sii shareerto hadii xiisaduhu ay isa sii taraan.
