የተመድ ዋና ፀሐፊ ከጠቅላይ ሚኒስትር ዐቢይና የአፍሪካ ኅብረት ኮሚሽን ሰብሳቢ ጋር አዲስ አበባ ላይ ተገናኙ

ከፌዴራል መንግሥቱና ከትግራይ ታጣቂዎች የተውጣጣ የጋራ ኮሚቴ የትግራይ ታጣቂዎች እንደምን ትጥቅ እንደሚፈቱ ሽሬ ላይ እየተመከረ መሆኑ ተገለጠ።

United Nations Secretary-General Antonio Guterres. Credit: John Lamparski/Getty Images

የተባበሩት መንግሥታት ዋና ፀሐፊ አንቶኒዮ ጉቴሬዝ አዲስ አበባ ላይ ከጠቅላይ ሚኒስትር ዐቢይ አሕመድና ከአፍሪካ ኅብረት ኮሚሽን ሰብሳቢ ሙሳ ፋኪ ጋር ዛሬ ሐሙስ ሕዳር 22 ተገናኝተው ተነጋገሩ።

ጠቅላይ ሚኒስትር ዐቢይ አሕመድ ከዋና ፀሐፊው ጋር ያደረጉትን ውይይት አስመልክተው "ውጤታማ" ሲሉ ገልጠውታል።

ትግራይ

ፕሪቶያ ደቡብ አፍሪካ የተካሔደውን የሰላም ድርድር ተከትሎ የትግራይ ታጣቂዎች ትጥቅ የሚፈቱበትን ዝርዝር ዕቅድ አስመልክቶ ሽሬ ላይ በባለ ሙያዎች የጋራ ኮሚቴ እየተመከረበት መሆኑን የኢፌዴሪ መንግሥት ኮሙኒኬሽን አገልግሎት ዛሬ ባወጣው መግለጫ አስታወቀ።

የባለ ሙያዎቹ የጋራ ኮሚቴ ከትናንት ኅዳር 21 ቀን ጀምሮ ሽሬ ላይ ሥራውን የጀመረ ሲሆን፤ የተውጣጣውም ከፌዴራል መንግሥቱና ከትግራይ ታጣቂዎች መሆኑ ተነግሯል።

የጋራ ኮሚቴው ዝርዝር ዕቅድ ትጥቅ የማስፈታት፣ ካምፕ የማስገባትና ተያያዥ ጉዳዮች ላይ ያተኮረ መሆኑም ተገልጧል።

ኮሚቴው በመጪዎቹ ጥቂት ቀናት ውስጥ የዝርዝር ዕቅድ ነደፋውን እንደሚያከናውን ይጠበቃል።