አንኳሮች
- አውስትራሊያ 35 ኒውዚላንድ 29 ግጥሚያዎችን ያስተናግዳሉ
- 15 ግጥሚያዎች በነፃ የቴሌቪዥን አገልግሎቶች ይሰራጫሉ
- ሶስት የአፍሪካ አገራት በተወዳዳሪነት ይቀርባሉ
የፊፋ የሴቶች ዓለም ዋንጫ አፍቃሪዎች በእግር ኳስና አገር ፍቅር ስሜት ተመልተው የውድድሩን ጅማሮ በመጠባበቅ ላይ ይገኛሉ።
የውድድሩ መክፈቻ ሐሙስ ጁላይ 20 / ሐምሌ 13 ሲሆን ኦገስት 20 / እሑድ ነሐሴ 14 ይፈፀማል።
በመክፈቻው ዕለት ኒውዝላንድና ኖርዌይ የመጀመሪያውን ግጥሚያ የሚያካሂዱ ሲሆን፤ ከሰዓታት በኋላ አውስትራሊያና አየርላንድ ይጋጠማሉ።
የአፍሪካውያኑን ናይጄሪያ፣ ደቡብ አፍሪካና ዛምቢያን ጨምሮ 32 አገራት ለዋንጫው ተሰላፊ ሲሆኑ፤ የሩብ፣ የግማሽ፣ የሶስተኛ ደረጃና የፍፃሜ ግጥሚያዎች ይካሔዳሉ።
አውስትራሊያ 35 ግጥሚያዎችን በአምስት ከተሞች የምታካሂድ ሲሆን፤ ኒውዝላንድ 29 ጨዋታዎችን በአራት ከተሞች ታከናውናለች።
የዘንድሮው የዓለም ዋንጫ በዓለም የመጀመሪያው በአያሌ ታዳሚዎች ተመልካችነት ያላቸው ግጥሚያዎች እንደሚታዩበት ይጠበቃል። የቲኬት ሽያጮች በሚያስገርም መልኩ የተከናወኑ መሆናቸውን ፊፋ ገልጧል።
የፊፋ የሴቶች ዓለም ዋንጫን አውስትራሊያ ውስጥ እንደምን መመልከት እንደሚችሉ
የአውስትራሊያና ኒውዝላንድ ነዋሪዎች ቲኬቶችን በመግዛት በአካል ተገኝተው መመልከት ይችላሉ። እስከዛሬዋ ዕለት ድረስ ለተወሰኑ ግጥሚያዎች የሚሆኑ ቲኬቶች በሽያጭ ላይ ይገኛሉ።
ሲድኒና ሜልበርን በትላልቅ የቴሌቪዥን መስኮቶች ግጥሚያዎችን በዋነኛ አደባባዮች ለሕዝብ ያሰራጫሉ። ሌሎች ከተሞችም ምናልባት ለሕዝብ የአደባባይ ስርጭት እንደሚያደርጉ ሊያስታውቁ ይችላሉ።
ኦፕተስ ስፖርት - ሁሉንም ግጥሚያዎች በቀጥታና በጥያቄ የሚያሰራጭ ሲሆን ኧፕ ዳውንሎድ ማድረግንና ምዝገባ መፈፀምንም ይጠይቃል።
ቻናል 7 ቅንጭብና ድጋሚ ጨዋታዎችን፤ እንዲሁም 15 የቀጥታ ግጥሚያዎችን በነፃ ያሰራጫል።
የፊፋ የሴቶች ዓለም ዋንጫ አሸናፊነት ታሳቢዎች እነማን ናቸው?
በፊፋ ደረጃ ምደባ መሠረት ከዓለም 10 ምርጥ ቡድናቱ በታሳቢነት ይነሳሉ። በአንደኛ ደረጃ ላይ የምትገኘዋና የአራት ጊዜ አሸናፊዋ ዩናይትድ ስቴትስ ቡድን ቀዳሚ ተጠቃሽ ስትሆን፤ ጀርመን፣ እንግሊዝ፣ ብራዚል፣ ስዊድን፣ ፈረንሳይ፣ ስፔይን፣ ካናዳ፣ ኔዘርላንድስና አውስትራሊያ ተካትተው ይገኛሉ።
ይሁንና የአምና ሻምፒዮናነትና ከአራት ዓመት በፊት የዋንጫ ባለቤትነት ደረጃ ሁሌም ለድል የሚያበቃ ሬኮርድ አይሆንም።
በዓለም የሴቶች እግር ኳስ ደረጃ ምደባ 26ኛነትን ይዛ የምትገኘው ጥምር አዘጋጇ ኒውዝላንድ ግጥሚዎቹ በከተሞቿ ላይ ስለሚካሔዱ በሕዝብ ድጋፍ ከፍ ላለ ደረጃ እንደምትበቃ ታስባለች።
የዘንድሮው የአውስትራሊያ እግር ኳስ ቡድን ማቲልዳስ ከመቼው ጊዜ በበለጠ አካላዊ ብቃት፣ ስነ ልቦናዊ ዝግጅትና የእግር ኳስ ጥበብ ክህሎት ያላቸውን ወጣት ተጫዋች በማቀፏ ለዋንጫ ባለቤትነት ያላት ተስፋ በእጅጉ የላቀ ስለ መሆኑ በአገር ውስጥ የስፖርት ሳይንቲስቶች እየተነገረ ነው።
የማቲልዳስ ቡድን "ወርቃማው ትውልድ" የሚል ተቀፅላም ተሰጥቷታል።
ከአፍሪካ ሶስቱ ተወዳዳሪ ቡድኖች ውስጥ የናይጄሪያ ሴቶች ከፍ ያለ ውጤት፣ ብርቱ ተፎካካሪነትና የላቀ የእግር ኳስ ክህሎትን ያሳያሉ ተብሎ ይጠበቃል።
