አናስታዥያ ፓለሼ ለሌበር ፓርቲ የኩዊንስላንድ ስቴት ምርጫን በማሸነፍ ድል ሲያጎናጽፉ ለራሳቸውም ሶስት ምርጫ በማሸነፍ በአውስትራሊያ ፖለቲካ ታሪክም የመጀመሪያዋ ሴት በመሆን የታሪክ ባሕር መዝገብ ውስጥ ስማቸውን አኑረዋል።
በ2021 አጋማሽ ከሁለተኛው ጦርነት በኋላ ለረጅም ጊዜ ያገለገሉ የአውስትራሊያ ሴት መሪ የሚሆኑ ሲሆን በ2024 አጋማሽ የሌበር ለረጅም ጊዜ ያገለገሉ ፕሪሚየር ይሆናሉ።
ፕሪሚየር ፓለሼ ትናንት ምሽት የምርጫ ድል እንዲጎናጸፉ ድምጻቸውን ለሰጧቸውና ላልሰጧቸው የኩዊንስላድ መራጮች 2020 በኮረናቫይረስ ወረርሽኝ የተነሳ አዋኪ ዓመት እንደነበረና በጋራ ተባብሮ ስለመቆም ጠቀሜታ አንስተው ሲናገሩ፤
"በሉላዊ ወረርሽኝ መሃል ሆነን ወደ ሌላ ስቴት ሲልም በዓለም ዙሪያ ተጉዛችሁ ቤተሰቦቻችሁንና ጓደኞቻችሁን ማየት ባለመቻላችሁ በእጅጉ አዋኪ ነበር"
"ይሁንና እዚህ ኩዊንስላንድ ውስጥ ጠንክረን በአንድነት ቆመናል፤ በጋራም ወረርሽኙን ተቆጣጥረናል። በአንድነት ሆነን መሥራቱን ከቀጠልን ጠንክረን እንዘልቃለን" ብለዋል።
አክለውም፤ የኩዊንስላንድ ሕዝብን ለማገልገል ከቡድናቸው ጋር ሆነው እጅጌያቸውን በመሰብሰብ በተቻለ ፍጥነት ወደ ሥራ ለመግባት ቁርጠኝነታቸውን በመግለጥ የሌበር መንግሥት አብላጫ የምክር ቤት ወንበሮችን አሸንፎ ራሱን ችሎ መንግሥት እንደሚያቆም ያላቸውን እምነት ገልጠዋል።
ሌበር ፓርቲ ወደ ምርጫ ከመግባቱ በፊት ከ93 የኩዊንስላንድ ምክር ቤት ወንበሮች ውስጥ 48 የምክር ቤት ወንበሮች ነበሩት።
በABC የምርጫ ኮምፒዩተር ስሌት መሠረት ሌበር 52 ወንበሮችን ሊብራል-ናሽናል 34 ወንበሮችን ሊያሸንፉ እንደሚችሉ ተተንብዮዋል።
የሊብራል - ናሽናል ፓርቲ መሪ ዴብ ፍሬክሊንግተን በምርጫ ድል መነሳታቸውን አስመልክተው ሲናገሩ፤
"ኩዊንስላንዳውያን ውሳኔያቸው አሳልፈዋል፤ ለዲሞክራሲያችን ዘለቄታ ድምጻቸውን የሰጡትን ሁሉ አመሰግናለሁ" ብለዋል።
አክለውም የኩዊንስላንድን ሕዝብ በሊብራል - ናሽናል ተቃዋሚ ቡድን መሪነታቸው ማገልገላቸውን እንደሚቀጥሉ ተናግረዋል።
ሌበር ፓርቲ ወደ ምርጫ ከመግባቱ በፊት ከ93 የኩዊንስላንድ ምክር ቤት ወንበሮች ውስጥ 32 የምክር ቤት ወንበሮች ነበሩት።
ጄምስ ቦንድ
የልብ ወለድ ዓለሙን ሰላይ ጄምስ ቦንድ ገጸ ባህሪ በመተወን ዝናን የተጎናጸፉት ተዋናይ ሾን ኮነሪ በ90 ዓመታቸው ከዚህ ዓለም በሞት ተለይተዋል።
የተዋናይ ሾን ልጅ ጄሰን አባታቸው ለተወሰነ ጊዜ ጤናማ እንዳልነበሩና ትናንት ለሊቱን ባሃማስ ዕንቅልፍ ሳሉ ማለፋቸውን ለBBC ገልጠዋል።
ስኮትላንዳዊው ተዋናይ ለበርካታ አሠርት ዓመታት በዘለቁበት የትወና ሙያቸው ስኬት አንድ የኦስካር፣ ሶስት ጎልደን ግሎብስና ሁለት የባፍታ ሽልማቶችን ተቀብዋል።
