'Heroes of the World': Pagpapasalamat ng komunidad Filipino sa mga bayani ng nakaraang mga sunog sa Australya

Bago pa ang kinakaharap na pandemya ngayon, ang Australya ay naharap sa malagim na mga sunog kung saan hanggang sa mga pagkakataon na ito, ang mga naapektuhang komunidad ay patuloy na bumabangon pa rin.

A tribute to all the Australian firefighters and volunteers. Source: Mojo Studios

Matinding hirap ang kinaharap ng mga komunidad na naapektuhan ng mga nagdaang bushfire ng 2019-2020 sa Australya. May ilang buhay ang nasawi kasama na ang buhay ng ilang mga boluntaryong bombero at maraming mga ari-arian ang tinupok ng mga sunog.

Bilang pagpupugay sa mga bombero na tumulong sa pag-apula sa mga naging sunog, isang musikal na produksyon - ang "Heroes of the World" ang binuo ng mga Pilipino-Australyanong mang-aawit sa unang bahagi ng taon. 

 

---

 

Mga highlight

• Patuloy na nahihirapan ang mga komunidad na naapektuhan ng mga nagdaang sunog sa Australya, hanggang sa mga panahong ito, marami ang hindi pa nakakabawi sa mga nawalang kabuhayan.
• Maraming mga komunidad sa buong Australya ang nagbigay ng kanilang suporta upang matulungan ang mga komunidad na ito.
• Tulad ng maraming Australyano, isang grupo ng mga Pilipinong mang-aawit at musikero ang nag-ambag-ambag ng kanilang talento at oras sa pamamagitan ng album na "Heroes of the World" upang kahit paano ay makatulong at magbigay-pugay sa mga bombero na tumulong sa pag-apula ng mga sunog.

  ---

The artists who lent their voices to complete the "Heroes of the World" album. Source: The PerdOz Band's Facebook

Ibinihagi ni Marcus Rivera, isa sa mga mang-aawit na kasama sa album na "Heroes of the World" ang naging pagtutulungan ng mga Pilipinong bituin para maisakatuparan ang 15-track collection na layuning makakalap ng pondo para sa mga boluntaryong bombero.

Sinimulang buuin noong Enero at inilabas ang album noong Abril, ang makabagbag-damdamang koleksyon ay orihinal na musika at liriko ng composer/producer na si Oliver Gadista.