Australia ah a ngan bik mi Bank pawl nih 2026 chungah tangka karh (interest rate) a kai chin lai tiah an zumh, cucaah atu lio hi inn cawknak leiba a ngei mi hna nih tangka an cawinak bank sinah tangka karh (interest rate) he pehtlaiin tuanvo ngeitu tonnak ding caah caan ttha a si.
A luancia March thla chungah khan Westpac Group i an hruaitu pakhat economist Luci Ellis nih tangka karh a kai chin nak ding kong a chim. March thla hramthok ah khan Reserve Bank of Australia (RBA) nih tangkarh cu zatuak 4.10% ah an rak sanh. Tukum chungah voi thum hrawng cu tangka karh an santer rih lai tiah Luci Ellis nih a zumh.
Tangka karh sanhnak ding le tthumhnak ding kong biakhiahnak ah RBA nih a zoh chih lengmang mi cu vawlei cung sipuazi dirhmun le Middle East kiangkam buainak hna hi an si.
August thla ah tangka karh hi 4.85% a phan kho men tiah ABC thawnglatu sinah kan hnu thla ah khan a rak chim.
May thla thokka ah RBA hruaitu pawl tonnak an ngei lai i tangka karh an sanh rih dingin biakhiahnak an tuah khawh men tiah HSBC ah hruaitu pakhat a si mi economist Paul Bloxham nih a chim ve.
Mah hnu pin lei tonnak an ngeih tthan te tik ah zeitindah biakhiahnak an tuah lai ti cu chim a har ngaingai nain biakhiahnak an tuah lai hi thil pawl zoh chih in biakhiahnak an tuah te lai.
"RBA nih biakhiahnak an tuah lai ah ngiathlainak an tuah ding mi cu a pakhatnak ah zeitluk rangin dang vawlei cung sipuaizi hi zor chuk lei a panh, cun a biapi ngaingai rih mi pakhat cu rian ngei lo an karh le karh lo, zei tluk rangin dah rian ngei lo an karh ti bantuk hna hi an si," tiah a chim.
Zei tik dah a dih, a dongh te lai ti zong theih lo mi ral le ttum chuk lei a panh cuahmah mi vawlei cung sipuaizi zoh chih in thiamsang hna nih ruahnak cheuhnak bia an chim.
Inn cawknak leiba a ngei mi hna caah a tu lio hi tangka an cawinak bank tuanvo ngeitu tonnak ding caah caan tha a si an ti.
Tuanvo ngeitu tonnak ding caah caan tha a si.
Wealth Within ah chief analyst rian a tuan lio mi Dale Gillham nih SBS News thawnglatu sin ah hitihin a chim. Atu lio hi tangka an cawinak bank sin ah kal le tuanvo ngeitu ton caan a si.
Inn cawknak caah tangka an rak cawi ning kha zoh than hna seh, Variable in maw an rak cawi silole Fixed rate in dah an rak cawi cun variable kha fixed rate ah thlen ah a tha ko an ti ah cun a tu hi caan tha a si tiah a ti.
Vawlei cung sipuaizi hi tuan ah a sersiam theng lai lo, cu pinah tangka karh hi a tlawm lei ah voi hnih tal cu RBA nih a sanh rih lai tiah a chim chap.
"Buainak le ral hmanh hi tuan ah hei dih phum hmanh sehlaw, ral nih a hnursuan cia mi thil pawl hi tuan ah a siamremh kho colh lai lo. Cucaah, tangka karh hi cu tukum chungah cun a ttum hrimhrim rih lai lo, cun tangka hman a rak sum mi zong an rak um len rih fawn lai," tiah Gillham nih a ti.
Sally Tindall cu Canstar ah hruaitu rian a tuan lio mi pakhat a si. Canstar cu online in chawva he a pehtlaimi cuaithlainak le hlathlainak ah an hman mi website pakhat a si.
A hmanung bik tonnak ah RBA nih biakhiahnak an tuah mi le bank pawl nih tangka karh kong an chim mi he pehtlaiin a ruahnak le a hmuhning kha hitihin SBS news thawnglatu sin ah a chim.
Kan theihfian ve a herh mi pakhat cu an chim ning poah in thil a kal hrimhrim lai tinak a si lo. Inn leiba a ngei mi hna caah thil hi an ruahning bantuk in a kal lo kho caah harnak a chuahpi khawh.
"A bikin, Middle East buainak hi a dirhmun chim a har khun cun zeitluk fak in dah Australia ram hi a hnursuan lai ti zong chim chung dingah a har. Thil hi a lam kip in cuan le zoh thiam a hau," tiin Tindall nih a chim.
"Tachunhnak ah inn cawknak leiba a ngei mi hna nih tangka an cawinak bank i tuanvo ngeitu sinah variable in fixed rate ah i thlen kan duh an ti hnga. Tangka karh kha a kai chin duahmah ah cun an caah phan awk a um lai lo nain tangka hei ttum duahmah sehlaw, an caah van chiat ngaingai a si ko lai."
Tuan ah khan, ngun keng Jim Chalmer nih ttih a nung bak mi caan chungah kan lut cuahmah tiah thawng a thanh. Middle East buainak le ral ruangah vawlei cung sipuaizi ttumchuk lei a panh chin duahmah kho.
An chimning bangin, thil a kal taktak ko ahcun cozah nih pumpak, chungkhar le chawlehthalnak a tuahmi hna caah tangka karh aa tum ter lai, tiin Tindall nih a chim.
"Tangka karh a ttum tthan tikah, tangka na cawinak kha variable in fixed rated ah na rak thlen sual cang ahcun na caah zeihmanh san a tlai ti lai lo. Nain, variable ah na rak chiah rih ah cun na caah hlawknak a chuahpi lai."
Dominic Beattie cu saving.com.au website ah rian a tuan lio mi pakhat a si. Na theih ding mi cu variable ah na um lio nakin fixed rate i na thlen ah tangka karh na cham mi a sang deuh lai tiin SBS news thawnglatu sinah a chim.
"Atu lio tangka karh kan zoh tikah variable in fixed rate ah i thial ding cu a har ngaingai mi thil a si," tiah a chim.
Beattie nih a peh chap rih mi cu inn cawknak tangka kan cawi tikah zaa a long mi hi zapi nih duh deuh cio mi a si, a ti.
"Inn cawknak leiba kha fixed rate ah na thlen ahcun, a hlei in inn man pek chap na duh zongah na chap kho lai lo. Tangka cawinak dangah i thial na duh zongah na thial kho lai lo. Thial na duh ah cun a ngah ko, asinain a hlei in tangka liam chap hmasa hnu lawngah a ngah, a thong in liam le pek tawn a si," tiin a chim chap.
Variable in Fixed rate ah thlen ka duh ko na ti ahcun, hlat hlainak tha tein tuah a herh. Tangka cawi tu tampi hlethlai hmasa dih hnu ah tangka karh pek ding mi a niam bik mi le pumpak dirhmun he a tlak mi sin ah thlen le i thial ah a tha.
Theihternak: a cunglei ah kan rak tial le langhter mi hi theihtlei sawhsawh a si. Na chawva kongah bawmh na herh ahcun thiamsang, hngalhnak a ngei mi va tong hna.
For the latest from SBS News, download our app and subscribe to our newsletter.
