Lam kan len tik le kan i chawhvah tikah ti-sik anhnah le thingthei phunphun midum le mi inn pawngah hmuh ton an si theo. Cu pawl cu lak le lawh khawh an si ma? Mi dum le mi inn pawng ah a tlai mi le a kho mi thil pawl lawh le laknak kongah kan tuah ding le tuah lo dingmi thil ka chim mi rak ngai ve.
Mah le dum chungah thingthei le ti-sik an-hnah phunphun cin hi Australia mi nih an tuah ngaingai mi a si. Cucaah, inn-pa chakthlang hna dum in, silole midang inn vuang ah in a tlai mi thingthei phunphun hmuh tawn a si.
Midang vuang in a leng ah rak chuak mi thei kha ka banh khawh mi a si ti phun in na lak, na lawh ding a si lo, ttawhnak nawl zong na ngei lo.
Jarrad Duggan cu Frementle khua humhimnak caah an ser mi phu I an hruaitu pakhat a si, I midum chungah a tlai mi thei ttawh kha fir ah ruah a si tiin a chim.
“A ngaingai te ti ko lo cun, Inn ngeitu nawlpeknak loin midang inn, hau-kulh chungah luh kha phungbuar a si. Cucaah, midang inn vuang chungah luh riangmang i an ngeih mi thil va lak, va ttawh phung a si lo, fir phunkhat a si.”
Midang inn vuang chungah a um mi cu zei bantuk cinthlak le thingthei a si hmanh ah inn ngeitu lungtlinpinak lawngin na lak cun na lawh.
“Hau-hruang leng ah a rak chuak mi zong, cu tthiamthiam. Khawngsil nawlngeihnak tangah a um mi a si caah zeihman laknak nawl na ngei hlei lo. Inn ngeitu kha na lawh hlan ah nawl hal kha a tha cem, khawngsil ta zong a si hlei lo, inn ngei tu ta a si bantuk in inn ngeitu silole kha ka i inn a hlang mi kha hal hmasa.”
Mi inn hmai, minung kalnak pawng i a kho mi thei tlai zong na lawh hlan ah a neih bik mi inn ngeitu kha nawl hal hmasa ah a tha bik tiin Duggan nih a chim.
“Nawl peknak kha na hal lengmang a herh. An inn kutka kha na king khawh cun nawl halnak ca te zong na chiah khawh. Nawl an in pek hnu zongah, na lawh khawh zat zong hal chih cun a tha. Cu pinah, thingram hna khawng deng lo tein, na si khawh chungin na ralrin tein ttawh khawh na zuam lai ti nak zong kha theihter hna.”
Inn ngeitu silole, inn hlangtu zong an i lawm lai. Caan tam deuh cu an thei tlai kha lunglawm tein an in hrawmh fawn lai. Cun, thei tlai tampi a ngei mi cheukhat cu a chawk let mi hna caah tiin hau leng ah an chiah tawn.
“Ka thinlung ah a rak chuak mi cu a chawk let mi nih hmuh khawh dingin hau-pangah ca an tar tawn. Free, a lak in ttawh khawh a si tiin an tial i a pawngah lemon kung a tlai ngaingai mi hna a rak um tawn. Mah bantuk in ca an tar mi na hmuh ahcun inn ngeitu kha nawl hal ahau lo.”
Australia um mi nih kan theih dingah a biapi rih mi pakhat cu mi inn hmai, hau-hruang leng in mawtaw lam kar a lawng mi hmun le minung lam kalnak khi khawngsil nawlngeihnak tangah a um mi a si. Khawngsil tawlrelnak tangah a um ko nain ram a sau tuk i tan a hauh cun inn ngeitu nih tuanvo a lak dingmi a si.
Inn hmai hau-ruang in mawtaw lam kar a lawng mi hmun ah thingkung cin silole pakhatkhat tuah na duh sual ahcun khawngsil na chim hmasa hna hau.
Subscribe to or follow the Australia Explained podcast for more valuable information and tips about settling into your new life in Australia.
Do you have any questions or topic ideas? Email australiaexplained@sbs.com.au
