Muaj neeg ntiaj teb yuav laug txog 1 tawv (billion) tus yeej noj cov tshuaj vitamins no. Muaj 13 hom vitamins tseem ceeb heev thiab pab peb lub cev kom tau txais kev noj qab nyob zoo thiab tau txais kev noj qab haus huv, thiab cov vitamins no yog ib cov lagluam tau nyiaj txog $100 billion diam. Tab sis yog tias peb noj tej vitamins no ntau ces tsis yog yuav pab kom peb tau txais kev noj qab nyob zoo tab sis yuav ua tau mob rau peb thiab.
Yog li ne ho muaj dab tsi tseem ceeb tsim nyog peb paub txog cov tshuaj vitamins no?
1. Muaj neeg ntiaj teb ze txog ib tawv (One billion) tus yeej noj tej tshuaj vitamins no tas mus li:
Raws li Catherine Price uas yog tus neeg sau phau ntawv Vitamania thiab tau siv sij hawm 5 lub xyoos los tshuaj ntsuam cov lagluam vitamins no ces nws txheeb tau tias teb chaws America (USA) ua cov lagluam no raug nyiaj txog $40 billion ho cov lagluam no thoob ntuj twb raug nyiaj txog $100 billion diam. Tsis tas li no los muaj cov vitamin no txog 85,000 hom diam thiab yeej muaj neeg ze txog li ib tawv tus noj cov tshuaj vitamins los yog cov supplements no tas mus li.
2. Rov qab pib muaj cov kab mob mob Scurvy dua lawm thiab:
Yeej tau muaj ib sob lus ib txwm hais tias "yog koj noj ib lub txiv qaub rau ib hnub twg ces yuav pab kom koj txhob mob cov kab mob scurvy no."
Yav tag los, cov neeg caij nkoj mus rau tom hiav txwv uas mus ncig ntuj deb heev ntawd tau cov kab mob scurvy no vim lawv lub cev muaj cov vitamin c tsis txaus pab rau lawv. Thiab yog ib tug neeg twg tau cov kab mob no ces yuav muaj cov yam ntxwv mob xws li ua rau ib ce tsis muaj zog, nkees nkees, mob pob qej txha, qhov muag plooj, pos hnyiav los ntshav thiab tso qhov twg los doog tau yooj yim heev.
Nom tswv America twb tau txheeb tau thiab teev zwm tseg cia rau ntaub ntawv tias muaj pej xeem America txog li 30 tus rov qab tau cov kab mob no ntawm lub xeev Massachusatts sab hnub tuam qaum teb ntawm teb chaws America lawm.
Sonny Lopez uas yog ib tug txiv neej muaj hnoob nyoog 62 xyoo yog ib tug raug ntsuam tau tias tau cov kab mob no, thiab twb tau ua rau nws ploj hau hle, plob hau sib sib lawm, ua rau nws tej kaus hnyiav txawm pib lwj thiab ua rau nws nkees nkees sab sab kawg nkaus li.
Tab sis peb muaj peev xwm tiav thaiv tau cov mob no yog peb noj cov txiv citrus fruits li txiv kiwi, txiv strawberries thiab cov kua txhob phawv qab zib liab los yog kws kho mob sau tshuaj vitamin c rau peb noj. Dr. Eric Churchill kuj tau qhia tias yus noj cov kua txiv lws suav xwb los tau tab sis nws tsis xav kom tej neeg sawv daws ua li no.
Puas tsim nyog los tsis tsim nyog peb noj vitamins?
3. Noj vitamins ntau tsis zoo thiab yuav ua rau peb mob tau:
Vim muaj ib cov vitamins li vitamins A, D, E thiab K ntawd ces muaj peev xwm yaj tau hauv tej roj, yog li thiaj raug coj mus khaws cia tau rau peb tej siab thiab cov pav ywj tau. Tab sis yog thaum peb noj tej vitamins no ntau thiab muaj khaws cia hauv peb lub cev ntau dhau heev lawm ces yuav ras los ua ib cov taug tua peb tau thiab.
Piv txwv li tus me nyuam Elizabeth Jackson ntawm xeev Omaha, Nebraska teb chaws America ntawd tau mob hnyav heev thiab twb yuav laug ua rau nws lub raum tsis ua hauj lwm thiab twg yuav laug tas sim neej vim nws lub cev muaj cov vitamin D no ntau dhau heev lawm.
Becky Jackson uas yog tus me nyuam ntxhais no niam qhia tias vim nws ua ib cov zaub mov rau tus me nyuam no noj tab sis tsis paub tias muaj cov vitamin D no ntau heev xyaws rau hauv, ces thiaj ua rau muaj cov calcium ntau heev rau tus me nyuam no cov ntshav. Tab sis thaum kws kho mob txheeb tau qhov tseeb lawm, ces kuj muaj peev xwm kom nws tau txais kev noj qab nyob zoo li qub tsis muaj teeb meem dab tsi ntxiv lawm.
4. Txawm muaj ntawv sau lo qhia rau cov tshuaj vitamin tias yog tau los ntawm tej xyoob ntoo thiab zaub txiv los xwb los tej zaum yeej muaj cov tshuaj vitamin tsim cuav coj los xyaw thiab tov rau thiab.
Vim tej vitamins feem ntau tam sim no ces yeej tsim tawm tom tej chaw tsim tshuaj los siv xwb uas yog qog qab thiab tsim raws li cov vitamins uas nrhiav tau los ntawm tej xyoob ntoos ntawd tab sis tsis muaj cov hlab (fibre) thiab tej txiaj ntsim zaub mov (nutrients) li tej tau los ntawm cov qoob loo tiag.
Dr. Derek Muller hais tias "tseem siv fossil fuel li cov roj zeb ntsuam coj los tsim tau 8 hom vitamins thiab." Uas yeej muaj cov chemical hu ua acetone uas coj los ntxuav cov tshuaj pleev rau tes tawm los yog cov chemical alkanes uas muaj hauv tej roj sam tsheb (petrol) thiab muaj ib cov chemical tsw qab uas muaj hauv cov chemical bitumen thiab, uas cov neeg tsim tshuaj tau siv ntau yam tshuaj coj los sib tov kom ua tau cov tshuaj vitamins uas hnov tus ntxhiab tsw thiab tsis muaj ntxhiab ntawd.
Thiab vim twb muaj neeg ze txog 1 billion tus thoob ntuj noj cov tshuaj vitamins no tab sis ho puas tau txias kev nyab xeeb npaum li cas rau lawv?
Nyeem thiab mloog tau cov kev teeb txheeb txog cov vitamins tau ntawm no:
5. Siv sij hawm 7 hnub aim mam li ua rau cov tshuaj vitamin C 75% hauv ib lub txiv apple lwj tag los yog yaj tag:
Dr. Yasmine Probst uas yog ib tug kws paub zoo txog kev qhia tej neeg noj zaub mov zoo muaj txiaj ntsim pab rau tib neeg lub cev ntwam txhooj faj lem Wollongong University qhia rau cov documentary hu ua Vitamania tias yuav tau siv sij hawm li ntawm ib lub plua (week) mas cov vitamin c ntawm ib lub txiv apple thiaj yaj los yog lwj tag txog li 75% xwb yog thaum lub txiv no raug tshav ziab, tshav kub, tau duab tshav ntuj thiab seb ho khaws li cas cia ntawd raws li tau muaj ib cov kev teeb txheeb tau qhia. Yog li yog koj xav yuav cov txiv apple los noj thiab khawv cia tau ntev kom txhob lwj ces yuav tau yuav cov cog ib cheeb tsam ze ntawm koj yuav zoo dua.
6. Feem ntau yog siv cov plaub yaj thiab yaj cov qog roj coj los tsim cov vitamin D:
Dr. Derek Muller tau qhia rau cov Vitamania documentary tias niaj hnub niam no ces yeej tau siv yaj cov plaub coj los tsim cov tshuaj vitamin D feem ntau yog siv Australia cov plaub yaj los ua. Vim cov chemical Lanolin yog ib cov roj uas tau los ntawm yaj lub qog tsim roj. Thiab hauv peb lub cev los yeej muaj cov chemical Lanolin txog li 15% nyob hauv qab ntawm peb tej tawv nqaij uas siv cov cholesterol coj los tov xyaws cov sab hnub untraviolet thaum peb ziab tshav los yog raug tshav kub ntawd ces mam li ras los ua cov vitamin D rau peb lub cev siv lawm xwb.
Tsis tas li no los yog ntawm tus neeg ntawd seb yog cov neeg hom tawv nqaij zoo li cas, muaj hnoob nyoog li cas, yog me nyuam mos, cov me nyuam yaus, cov hluas los yog cov laus thiab ho nyob rau thaj tsam twg hauv ntiaj teb. Yog nyob nrug ntawm ntiaj teb txoj kab hnub (Equator) nrug deb npaum li cas mus rau rau qaum ntuj los yog qab ntuj lawm ces tej zaum yuav tsis au vitamin D txaus.
Tab sis peb muaj peev xwm siv ntau txoj xub ke los pab kom peb lub cev tau cov vitamin D xws li ziab tshav ib hnub tshaj 30 ntiag tiv rau lub caij yuav laug txog thaum tav su xwb ces tau cov vitamin no txaus lub cev los yog thaum yuav noj nceb ces coj cov nceb mus ziab rau ntawm qhov rais cia sab hnub ziab ib tsam tso mam coj los ua noj ces kuj tau vitamin D rau koj lawm thiab. Ntxiv ntawd yog peb noj cov ntshe muaj roj, siab nyuj, nkaub qes, haus mis, noj txiv kab ntxwv thiab cov cereal pub me nyuam mos ces tau cov vitamin D no lawm thiab.
Tab sis ib txhia neej pheej mus siab tshav hauv cov tshuab (Sun tan) uas muaj cov UVB ray ntawd kom tawv nqaij dub ntawd yuav ua rau lawv mob tau cancer rau tej tawv nqaij thiab.
7. Cov vitamin D3 yog ib cov vitamin uas kim tshaj kub (Gold) lawm thiab:
Ib pob tshuaj vitamin D3 ua ntsiav uas muag hauv online xwb twb raug nyiaj txog $50 lawm, thiab yog yuav ib gram xwb twb raug nyiaj ze txog $3,700 diam. Ces Dr. Derek Muller thiaj hais tias ua rau cov vitamin D3 no tseem kim tshaj kub lawm thiab.
Xov xwm qhia ntxiv:
SBS yuav coj cov documantary los yog xov xwm hu ua Vitamania tshiab ntev txog 90 ntiag tiv (Minutes) coj los tso rau sawv daws tau saib ntawm SBS TV rau hnub zwj Hnub (Sunday) zwj thaj tim 12 lub 8 hli ntuj xyoo 2018 sij hawm 8:30 pm AEST (Australian Eastern Standard Time) uas tus scientist Dr. Derek Muller mam li coj los qhia txog cov kev mus txheeb xyuas txog qhov tseeb ntawm tej tshuaj vitamins no seb yog li cas tiag thiab cov lagluam vitamin no ho zoo li cas. Ces tom qab ntawd mam li coj mus tso rau hauv SBS on Demand rau sawv daws cov tsis tau saib rov qab mus saib dua ntxiv.
Listen to SBS Radio Hmong program at www.sbs.com.au/hmong on Thursday 6pm AEST (Australian Eastern Standard Time) and Sunday 11am AEST.
You can download SBS Radio App from App Store at https://apple.co/2pLgvCX and from Google Play at http://bit.ly/2GuIRv or you can download podcasts news in Hmong and English from www.sbs.com.au/podcasts/yourlanguage/hmong. and listen to Hmong news in iTunes at https://itunes.apple.com/us/podcast/sbs-hmong/id814724207?mt=2
Besides, you can follow us, click like, share and comments at #SBSHmong website at www.facebook.com/sbshmong.
Call to have a chat with SBS Radio Hmong Program on + 61 3 9949 2259 or sent your comments to comments@sbs.com.au.
