Ntsiab lus tseem ceeb:
- Mike Burgess uas yog ASIO tus coj tau ceeb toom tias tau muaj neeg txawv teb chaws ''nyiag soj xwm tiag thiab yog ib co xwm txheej phom sij heev''.
- Australia tus coj lub tuam chav soj xwm thiaj qhia tias yuav muaj teeb meem li cas rau Australia tej lagluam.
- Burgess kuj tau qhia meej tseeb tias tau muaj Russia ib co pab pawg neeg raug muab ntiab tawm xyoo 2022.
Australia tus coj lub tuam chav soj xwm qab rooj tau qhia tias yeej muaj zejzog pej kum haiv ''yeej tseem tab meeg ntsoov'' nyiag soj xwm, suav cov kev nrhiav kev nyiaj kom tau tej xov xwm ntawm ib lub chaw nthuav xov xwm, los yog nyiag nkag mus rau tej laboratories, los yog ntxias dag tej neeg ntiag tug kom qhia ib co xov xwm twg, thiab pheej mus ntxias tej neeg hauv LinkedIn, kuj tab tom ceeb toom tias muaj neeg txawv teb chaws tuaj nyiag soj xwm ntau tshaj tej xwm txheej tau tshwm sim lub caij xyoo 1980s lawm.
Mike Burgess uas yog tus tswj Australia lub koom haum soj xwm qab rooj Australian Security Intelligence Organisation (ASIO) tau qhia txog tej xwm txheej nyiag soj xwm ntawm Australia ntxaws ua thawj zaug tias tej xwm txheej no yuav ua rau muaj teeb meem rau Australia tej lagluam poob nyiaj txog billion dollar rau lub caij uas nws tau hais ib co lus rau ntawm lub koom haum Hawke Centre ntawm Adelaide.
Burgess tau hais tias "Peb yuav tsum tau nkag siab txog cov kev nyiag soj xwm no tias tsis yog ib co xwm txheej qub xwb, los sis yog ib co dab neeg plees nkauj nraug sib hlub xwb; tab sis muaj tseeb tiag, thiab tab tom muaj tam sim no thiab yog tej yam phom sij heev,''
Nws tau ceeb toom tias ''tau muaj ib cov fwj chim tshiab rau cov kev nyiag soj xwm no lawm'' uas tau ua rau ''tej neeg phem xav nyiag kom tau ib co xov xwm dab tsi ntawm teb chaws Australia'', vim ASIO yeej tau cheem tau zejzog pej kum haiv 24 cov kev nyiag soj xwm 3 xyoos dhau los lawm.
Tus coj lub koom haum ASIO no tau teev ncaj qha txog 2 tug neeg Australia caj ceg neeg Russia uas raug liam tias nyiag soj xwm tsaib no, thiab kuj tau qhia meej tias tau muaj ib pawg pawg neeg Russia nyiag soj xwm kuj tau raug muab ntiab tawm teb chaws xyoo 2022, uas Sydney Morning Herald tau xub cej luam qhia xyoo 2023.
Tab sis nws kuj tau hais tias neeg Australia yuav ''ceeb'' tiag tiag tias yeej muaj ntau haiv neeg xav tau tej strategic intelligence, thiab kuj ceeb toom tias yeej muaj tej koom haum txawv teb chaws ''yeej kub siab heev xav nyiag tej xov xwm'' ntau yam tsis hais science, public sector projects thiab investments, mus txog rau tej green technology, tej critical minerals thiab cov kev teeb txheeb ntawm Antarctic, thiab yeej xav paub txog tej xovxwm txog Australia cov kev sib khom tsim nkoj nuclear submarine AUKUS heev thiab.''
Burgess tau hais tias "Yeej muaj ntau lub teb chaws yeej kub siab heev txog cov kev nyiag soj xwm no tsis hais Suav, Russia thiab Iran, tab sis kuj muaj lwm cov teb chaws uas yeej yuav nyiag ib tug twg tej xov xwm los yog ua ib yam dab tsi kom ntxias tau tej tswv yim thiab xov xwm tseem ceeb, los yog tej tswv yim yuav pab kom lawv tau txais txiaj ntsim- suav tej xov xwm tsis tsim nyog qhia rau ib tug twg paub nrog,''
"Tej chaw nyiag soj xwm txawv teb chaws los kuj muaj peev xwm tau tej xov xwm no los ntawm ib tug twg - li ua kom ib tug neeg twg ntseeg siab, yuam, los yog ntxias kom qhia tej xov xwm tsis tsim nyog qhia rau lawv thiab siv technology nyiag los yog soj lwm tus.''
Burgess hais tias tau muaj tej neeg teev ntau yam txuj kum tau ua cov hauj lwm AUKUS 'uas yog tej yam yuav raug kev phom sij thiab tsis tsim nyog ua'
Nyob rau ib co xwm txheej nyiag soj xwm, ces tau muaj zejzog pej kum haiv ib lub chaw nyiag soj xwm yeej tau sim nrhiav hauj lwm ua ntawm Australia ib lub chaw nthuav xov xwm ''uas muaj hom phiaj yuav cej luam thiab kom paub txog tej kev ceeb toom txog tej xov xwm tseem ceeb''.
Burgess tau qhia tias yeej tau muaj tej xwm txheej nyiag soj xwm uas ua ntsiag to uas yeej muaj peev xwm ntxias kom tej neeg ua hauj lwm rau nom tswv tej tuam chav qhia tej npe tej chaw nyob ntawm tej neeg uas ''tawm tsam'' ib tug tsoom fwv txawv teb chaws twg, ua ke no los tej neeg kawm ib yam dab tsi thiab teeb txheeb txog ib yam dab tsi los kuj muaj feem cuam tshuam nrog ib tug tsoom fwv txawv teb chaws thiab raug txib kom nyiag nkag mus rau tej laboratory uas txwv tsis pub mus rau thiab mus yees tej duab video ntawm tej chaw laboratory ntawd ho ua dab tsi.
Mike Burgess tau hais tias yeej muaj ntau lub teb chaws ''tab tom tsim teeb meem rau ib tug twg los yog ua ib yam dab tsi kom lawv tej tej xov xwm tseem ceeb uas yuav pab kom lawv tau txais txiaj ntsim". Source: AAP / Dominic Giannini
ASIO tus coj no thiaj tau ceeb toom tias yeej tau muaj tej neeg yam tsawg li 35,000 tus tau tab tom haub tau yaum tias lawv yog cov neeg muaj peev xwm nrhiav tau tej xov xwm tsis tsim nyog qhia rau lwm tus hauv ib lub vas sab, thiab yuav ua rau lawv raug teeb meem los ntawm tej neeg nyiag soj xwm uas xav tau tej neeg no los yog xav ntxias lawv coj los ua tej hauj lwm nyiag soj xwm no pab lawv.
Tsis tas li ntawd los nws kuj tau qhia tias tau muaj tej neeg txog li ntawm 400 tus uas tau cav txog lawv yam tsis txaus ntseeg tias lawv tau ua ib co hauj lwm cuam tshuam txog ntau cov projects cuam tshuam txog AUKUS.
Nws tau ceeb toom tias "Kuv yeej nkag siab tias tej neeg yuav tau qhia kom lwm tus paub txog lawv, tab sis cov kev pheej qhia rau hauv tej social media tias yus muaj cai mus tau rau ib qho chaw twg ua txwv tsis pub mus los sis yog yus ua ib co project uas tsis pub qhia rau lwm tus paub ces yog tej yam tsis paub qab hau dab tsi; yog tej yuav raug teeb meem thiab tsis tsim nyog ua vim yuav ua rau tej neeg nyiag soj xwm txawb teb chaws kub siab heev txog yus,"
Tej xwm txheej nyiag soj xwm tau ua rau muaj teeb meem rau Australia tej lagluam poob nyiaj txog $12.5 billion xyoo 2024 financial year, raws li tau muaj ib tsab ntawv cej luam ntawm lub koom haum ASIO thiab lub koom haum Australian Institute of Criminology.
Ces tej xwm txheej nyiag soj xwm uas nyiag tau Australia tej lagluam cov tswv yim ua luam (trade secrets) raug nyiaj txog li ntawm $2 billion.
Ib co piv txwv uas Burgess tau qhia ces yog cuam tshuam txog ib tug neeg txawv teb chaws cov kev nyiag ib yam nroj tsuag uas muaj tsawg tsawg thiab tseem ceeb heev rau tej ntoo txi txiv ntau yam ntawm ib lub chaw teeb txheeb.
Tsis tas li ntawd los kuj tseem muaj ib co piv txwv ntxiv tias muaj neeg phem tau nyiag tau ib co xov xwm tseem ceeb ntawm ib co koom txoos defence industry event thaum tau muaj tus neeg phem siv ib tug USB uas muaj cov malware.
Burgess thiaj tau qhia txog tej xwm txheej tsis ntev los no uas cuam tshuam txog ''Australia ib co technology uas kim heev thiab zoo heev'' raug lwm lub teb chaws coj mus siv tsim tau ib co qauv prototype uas yeej zoo sib xws nkaus tom qab tau qhia txog tej technology no tsis ntev.''
Nws tau hais tias "Txawm kuv tsis muaj epev xwm yuav cais tau kiag tias muaj cov kev nyiag soj xwm cuam tshuam, los tus coj lub tuam chav nyiag soj xwm yeej tsis ntseeg tej xwm txheej ntawd,''
Burgess tau kwv yees tias ASIO cov kev muaj peev xwm tiv thaiv tau tej xwm txheej no yog tej yam pab kom tsis txhob raug kev puas tsuaj loj txuas ntxiv rau tej lagluam.
Nws thiaj tau ceeb toom tias "Kuv tseem tsis tau paub tseeb tias peb, tam li yog ib haiv neeg, muaj kev thoob tsib to nrog txog tej kev puas tsuaj cuam tshuam txog cov kev nyiag soj xwm ntawm peb lub teb chaws, los yog peb cov kev tswj hwm democracy, peb cov kev tswj hwm twj lij ywj pheej, peb tej lagluam, thiab peb cov kev koom npoj kev sib raug zoo ntawm peb lub teb chaws,'' thiab nqua hu kom neeg Australia yuav tau kub siab xyuam xim ceev faj thiab yuav tau ua ib yam dab tsi los pov puag yus yog yus muaj kev txhawj xeeb tab sis kuj tsis xav kom ''pheej txhawj xeeb txog tej xwm txheej no dhau tshaj qhov tsim nyog txhawj thiab".
Nws tau hais tias "Tsis txhob lam xav tias txhua tus nom tswv txawv teb chaws yog ib co neeg nyiag soj xwm, thiab txhua cov neeg uas xav thov ua pheej ywg nrog yus yog tej neeg uas tsis txhob ntseeg siab, los yog txhua cov zejzog twg yuav muaj kev cuam tshuam nrog ib lub chaw soj xwm twg, los sis txhua txhua cov kev nqes peev lagluam txawv teb chaws twg yog tej yuav muaj teeb meem,'' thiab kuj hais ntxiv tias ''yog thaum yus paub tias muaj ib yam dab tsi txawv txav lawm ces tej zaum kuj yuav paub tias yog li cas lawm."
"Yog tias koj yog ib tug uas tab tom nyiag soj xwm ntawm lub teb chaws no (Australia), ces ASIO yeej tab tom nrhiav koj. Thiab yog tias koj yog ib tug uas tab tom yuav raug ib tug neeg phem nyiaj soj koj ntawm lub teb chaws no, ces ASIO yeej tab tom yuav ua tus pov puag koj thiab."
