Lub caij uas muaj Australia tej teeb meem vaj tse loj zuj zus tuaj no, tej neeg Australia ua lub neej txhua hnub yeej tsis tshua muaj peev xwm yuav tau tsev nyob lawm. Tab sis lub teb chaws no tej tuam los pav muaj txiaj nplua nuj yeej muaj peev xwm yuav tau ntau pua txheeb lub tsev.
Cov Australian Financial Review's Rich List uas tau coj los qhia lub limtiam dhau los no tau qhia tias Australia tej neeg nplua nuj tshaj plaws 200 leej tau nplua nuj tuaj ntxiv txog li 160 feem pua rau lub caij 10 xyoo dhau los thiab ua rau lawv muaj nyiaj txog li $667.8 billion xyoo 2025.
Tus nplua nuj tshaj plaws ua xyoo 6 sib law liag ces yog Gina Rinehart uas yog ib tug ua luam khawb peev txheej uas muaj nyiaj txog li ntawm $38.1 billion.
Tab sis raws li lub koom haum Australian Bureau of Statistics (ABS) hais ces yog piv rau tej neeg Australia ntiag tug uas ua lub neeg txhua hnub tej nyiaj lawv khwv tau ib xyoos ces nyuam qhuav tau txog li $55,062 xwb.
Oxfam uas yog lub koom haum uas daws cov kev txom nyem hais tias tej vaj tse yog ib co pab kom Australia tej neeg muaj nyiaj tshaj plaws nplua nuj.
Lub koom haum no tau qhia rau SBS News tias tej neeg nplua nuj tej nyiaj tag nrho muaj peev xwm yuav tau 680,000 lub tsev ntawm teb chaws Australia no yog xam raws li ABS tej xov xwm teev tej nqe tsev theem nrab uas raug $976,800.
Thiab zoo li yeej muaj cov kev sib txawv no loj zuj zus tuaj lawm.
Raws li Oxfam Australia cov kev tshuaj ntsuam tej neeg nplua nuj uas rau teev npe ntawm daim ntawv Rich List ces muaj Australia tej neeg no ntau tshaj ob npaug ntxiv rau lub caij tshaj 10 xyoo dhau los no lawm — uas tau nce ntawm 74 tus neeg xyoo 2015 mus ua 161 tus xyoo 2025 lawm.
Tib lub caij no los tej neeg nplua nuj no kuj muaj nyiaj ntau tuaj ntxiv xam raws tus zauv theem nrab ntau tshaj $137 million rau ib hnub twg — los sis yog khwv tau nyiaj txhua txhua ntiag tiv twg txog li $95,000.
Thiaj pom tias tej neeg nplua nuj muaj nyiaj xam ua tus zauv theem nrab ntau tshaj 116,000 npaug piv rau tej neeg Australia 50 feem pua tej nyiaj uas lawv khwv tau.
10 dhau los no ces tej neeg muaj nyiaj yeej khwv tau nyiaj txog $95,000 txhua txhua ntiag tiv — uas khwv tau ntau dua tej nyiaj theem nrab uas tej neeg Australia khwv tau ib xyoos twg. Source: SBS
'Yog tej yam tsis ncaj, thiab yuav ua rau raug kev phom sij rau tej lagluam thiab teb chaws'
Oxfam thiaj rov qab nqua hu kom kho tej kev sau se coj los daws ''tej kev tsis tau txais vaj huam sib luag'' thiab ua tib zoo xyuas kom tej neeg nplua nuj tshaj plaws yuav tau them se raws li qhov tsim nyog them.
Chrisanta Muli uas yog tus coj kis ntawm lub koom haum Oxfam Australia tau qhia rau SBS News tias "Tsis hais yog thaum muaj ib tug neeg twg ras los ua neeg nplua nuj lawm ces yog ib lub cim qhia tias peb cov economic system siv tsis tshua tau hauj lwm zoo,''
"Tej kev tsis tau txais vaj huam sib luag no yog tej yam tsis ncaj ncees — thiab yog ib co kev phom sij rau peb tej lagluam thiab peb tej zejzog. Txawm tias muaj ntau millions tus neeg Australia yeej tsis tshua muaj nyiaj siv sib txuas ncua, los lub teb chaws no tej neeg nplua nuj tshaj plaws yeej haj yam nplua nuj ntau tshaj plaws ntxiv thiab yam lawv tsis tas ua dab tsi li.''
"Yeej muaj ntau million yim neeg yeej tsis tshua tau zaub mov noj tab sis tej neeg nplua nuj mas ua lub neej luam thuam yam tsis nco txhawj xeeb dab tsi li.''
Oxfam cov kev tshuaj ntsuam kuj tau txheeb tau tias tej nyiaj uas ib tug neeg twg ntawm Australia tej pej xeem 50 feem pua uas khwv tau nyiaj tsawg ntawd ces yeej tsuas khwv tau txog li ntawm $28,000 rau lub caij 10 xyoo dhau los no xwb, ces thiaj ua rau lawv muaj cib fim tsawg heev uas yuav yuav tau tsev nyob los sis yog yuav tau txais kev ruaj ntseg rau nyiaj txiaj ntev ntxiv tuaj.
Thiab lub koom haum no kuj hais tias Harry Triguboff uas yog Australia lub tuam txhab uas tsim tej vaj tse ua luam loj tshaj plaws uas yog tus neeg nplua nuj tshaj plaws zum ob ntawm cov AFR Rich List yeej pom tias nws tau muaj nyiaj ntau tuaj ntxiv ntau tshaj 2 npaug — uas tau muaj nyiaj ntau tuaj ntxiv nce ntawm $13.7 billion xyoo 2016 mus ua $29.7 billion xyoo 2025.
Thiab raws li lib koom haum Oxfam hais tias tej nyiaj no yog tej nyiaj uas khwv tau ntau tshaj Australia tej cuab yig tej nyiaj khwv tau theem nrab txog li 30,000 npaug lawm.
Tsis tas li ntawd tej lagluam muag khoom, cov kev nqes peev lagluam, lagluam khawb peev txheej yog cov txuas ntxiv ntawm tej vaj tse uas pab kom Australia tej neeg nplua nuj tshaj plaws muaj nyiaj ntau tuaj ntxiv rau lub caij 10 xyoo dhau los.
Tej teeb meem tsis muaj peev xwm yuav tsev uas muaj loj zuj zus tuaj — thiab tej neeg tuam los pav cov kev nplua nuj
Oxfam qhia tias tej teeb meem yuav tsis tau tsev nyob muaj feem cuam tshuam nrog tej neeg ntiag tug uas khwv tau nyiaj txiaj ntawd txoj kev nplua nuj thiab.
Raws li lub koom haum Anglicare Australia tsab ntawv cej luam 2025 Rental Affordability Snapshot qhia ces:
- Tsuas muaj tej neeg ua hauj lwm full-time uas khwv tau nyiaj yam tsawg tshaj plaws uas tsim nyog khwv tau ntawd tsuas muaj tej vaj tse txog li ntawm 0.7 feem pua uas lawv muaj peev xwm ntiav tau nyob xwb.
- Thiab tsuas muaj tej vaj tse txog li ntawm 12.8 feem pua uas ib yam neeg muaj 4 tug neeg thiab ob tug niam txiv ua hauj lwm khwv nyiaj thiaj muaj peev xwm ntiav tau nyob xwb.
- Hos tej neeg tau nyiaj pab JobSeeker, thiab tej neeg tau nyiaj Disability Support Pension, los yog tau cov nyiaj Age Pension pab ces yeej tsis muaj peev xwm yuav ntiav tau tsev nyob hlo li lawm.
Muli tau hais tias "Yog tej yam poob siab thiab yog tej yam tsis ncaj uas tej vaj tse no tseem yog ib co uas rau ib txhia neeg muaj txhiaj nplua nuj rau lub caij 10 tawm xyoo no ua ke no los tej neeg ua hauj lwm full-time uas khwv tau nyiaj tsawg yeej tsis muaj peev xwm ntiav tau tej tsev 99 feem pua nyob li.''
Tsab ntawv cej luam Anglicare Snapshot tau mus teeb txheeb txog tej tsev ntiav txog 51,238 lub thoob Australia, ces pom tau tias tej neeg ua hauj lwm full-time uas khwv tau nyiaj yam tsawg raws li qhov tsim nyog khwv tau ntawd ces tsuas muaj peev xwm ntiav tau tsev nyob txog li ntawm 0.7 feem pua xwb. Source: SBS
Lawv cov kev tshuaj ntsuam no yeej tau qhia tias tias tam sim no ces yus tsev neeg yuav tsum yog cov neeg khwv tau nyiaj ntau txog li $213,000 ib xyoos twg mas thiaj yuav muaj peev xwm yuav tau tej tsev txog li ib nrab uas coj mus muag ntawm Australia rau lub caij ntawd.
Oxfam nqua hu kom tej neeg nplua nuj them se
Lub koom haum no tab tom nqua hu kom tsoom fwv teb chaws ua tib zoo los txheeb cov tax system kom ntxaws kom thiaj muaj peev xwm los tswj tau tej neeg muaj nyiaj heev cov kev nplua nuj thiab los kho tej tax system uas siv tsis tau zoo.
Lawv thiaj xav thov kom tsub se rau tej neeg plua nuj tshaj plaws uas muaj txog li 1 feem pua uas ntseeg tias yuav tau nyiaj ntau caum billions dollars ib xyoos twg kom tau tej nyiaj no coj los pab cov hauj lwm kho mob, thiab pab tsim kom tau tej vaj tse uas tej neeg ntiav tau nyob los yog siv coj los daws tej teeb meem huab cua pauv hloov.
Muli tau hais tias "Tej neeg tuam los pav yeej tau them se txog li ntawm 0.3 feem pa ntawm tej nyiaj lawv khwv tau hauv ntiaj teb no. Tab sis vim tej neeg muaj nyiaj no khwv tau lawv tej nyiaj los ntawm tej peev txheej, tsis yog tej nyiaj uas lawv khwv tau los, ces cov income tax system no thiaj tsis muaj peev xwm sau se tau ntawm lawv raws li qhov tsim nyog.''
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
