Tsoom hwv teb chaws Australia tau tshwm nyiaj txog li $76 million dollars coj los txhawb nqa kom tej neeg mus ncig xyuas tej chaw ntoj ncig uas raug hav zoov kub hnyiab kom lawv tau lagluam tau nyiaj kom ua tau lub neej li qub thiab tom qab uas tau muaj pab nom Labor ib tug nom tau thov kom tseem hwv Morrison los xyuas tej hauj lwm no. Raws li tau muaj kev kwv yees lawm cov hav zoov kub hnyiab Black Saturday 1995 twb poob nyiaj txog li $4.4 billion yog li ntawd thiaj xav tias cov hav zoov kub hnyiab xyoo 2019-2020 uas tseem kub tam sim no yuav ua rau poob nyiaj ntau tshaj no lawm.
Hnub tim 7 March 2020 no los Hmong Australia Festival yuav ua lub koom txoos Hmong Australia Festival 45 years thiab yuav thov nyiaj donation ntawm qhov rooj ntawm tej neeg mus koom kom tau me ntsis nyiaj coj mus pab Australia tej neeg tua hluav taws, tej neeg vaj tse kub hnyiab, pab tej tsiaj txhu, pab tej cuab yim uas muaj lawv tej neeg tas sim neej los yog liaj teb tsiaj txhu raug kub hnyiab lagluam raug kub hnyiab.
Hnub tim 22 lub 3 hlis ntuj xyoo 2020 no lub koom haum Hmong Australia Festival yuav ua ib lub koom txoos txwm 45 xyoos uas Hmoob tau tuaj nyob rau teb chaws Australia no, thiab xav siv lub koom txoos no los thov nyiaj donation coj los mus pab tej hauj lwm tua hluav taws uas tseem sam sim kub hnyiab ntawm ntau lub xeev tam sim no.
Scott Morrison uas yog Australia tus thawj pwm tsav los kuj tau lees tias climate change yeej muaj tseeb tiag, thiab tau qhia tias nws yuav txib Royal Commission mus txheeb xyuas cov teeb meem hav zoov kub hnyiab no kom thiaj paub tias yuav los daws tej teeb meem no li cas ntawm nom tswv zos, xeeb thiab tsoom hwv teb chaws thiab paub los daws tej teeb meem no kom sai dua qhov qub ntxiv thiab tsim kho tej cai climate policy. Tab sis Anthony Albanese uas yog tus coj pab nom Labor Party yeej tau qhia tias tsis tsim nyog yuav txiv Royal Commission mus lis tej hauj lwm no thiab yuav tau los pab tau tej teeb meem hav zoov kub hnyiab no kom sai. Hos pab nom Greens los tsis pom zoo kom tsoom hwv siv cov carbon credits qub lawm.
Nom tswv Australia kuj tau cog lus tias yuav siv nyiaj txog li $100 million los pab tej neeg ua liaj ua teb thiab cog qoob loo kom qev tau thiab tau them paj tsawg los pab lawv cov lagluam kom rov qab ua tau lagluam dua ntxiv. Raws li tau muaj kev kwv yees lawm ces muaj tej lagluam me txog li 150,000 cov raug tej teeb meem hav zoov kub hnyiab thiab ntuj qhuav nkig no diam.
Txuas ntxiv ntawd los Australia tej hav zoov kub hnyiab tam sim no tau ua rau muaj pa taws nco vov nroog thiab pos huab niab uas tau ua rau tej kws kho mob paub zoo txog kev noj qab haus huv tau tawm los ceeb toom rau tej me nyuam yaus, tej laus thiab cov neeg hawb pob kom nyob twj ywm hauv tsev vim tej pas taws tsis huv thiab tau ua rau nom tswv xeev Victoria tseem yuav mus txheeb xyuas tej teeb meem hav zoov kub hnyiab ntawm xeev Victoria rau lub caij uas hav zoov tseem kub hnyiab txuas ntxiv no.
Australia tus treasurer Josh Frydenberg tau los nrog tsoom coj ntawm cov tuam txhab muag cov nyiaj tuav pov hwv (Insurance) tham hauv tuam ceeb Canberra kom tej tuam txhab insuarance yuav tsum them cov nyiaj Home and content isurance rau Australia tej pej xeem kom sai li sai tau.
Raws li lub koom haum Insurance Council of Australia tau qhia twb tau muaj neeg Australian txog 9,000 tus mus claim cov nyiaj insurance uas raug nyiaj tshaj $700 million dollars lawm.
Txawm li cas los nyob rau tib lub tsam thawj no kuj tau muaj ib tug nom ntawm pab nom Liberal Party zaum nram qab rooj ntawm tsev tsoom hwv hu ua Craig Kelly los tseem raug cov neeg Askiv ib lub chaw nthuav xov xwm TV liam tias nws yog ib tug neeg 'climate denier' thiab vim rau qhov nws tau tawm tswv yim tias tsis yog tim muaj cov corbon emission ntau es thiaj ua rau muaj hav zoov kub hnyiab ntawm teb chaws Australia thiab tau lostawm tsam pov puag tsoom hwv Australia.
Tsoom hwv Australia los kuj tau cog lus tias yuav pab nyiaj txog li $2 billion los lis cov hauj lwm bushfire recovery uas tus pwm tsav David Littleproud uas tswj cov disaster emergency kuj tau los koom tes nrog tus coj tuaj hluav taws thiab yuav koom tes nrog txhua qeb theem nom tswv Australia los pab tej neeg Australia thiab tej lagluam kom rov qab pib tau lub neej tshiab tom qab tau muaj tej xwm txheej kub hnyiab no thiab tseem tua tsis tau cov hluav taws tshaj 100 tawm kob uas tseem kub txuas ntxiv ntawd. Tam sim no kuj ntaug me ntsi lawm thiab.
Tsis tas li no los nom tswv kuj Australia kuj tau qhia rau hnub tim 15 January 2020 tias yuav pab nyiaj ntxiv li $50 million los pab tej neeg raug cov teeb meem kub hnyiab no uas tej nyiaj no yuav siv coj mus pab tej neeg txheeb xyuas lawv cov kev claim insurance, cov tw ntawv ntawm Salvation Army thiab Red Cross los yuav khoom siv thiab roj tsheb siv. Ntxiv ntawd nom tswv tseem yuav pab nyiaj rau tej neeg muaj hnoob nyoog ib tug yog $1000 hos me nyuam yaus yog $800 kom tau yuav khoom siv rau lub caij raug hav zoov kub hnyiab tsis muaj vaj tse nyob ntawd thiab. Nom tswv Australia los kuj tau qhia tias yuav tshwm nyiaj li $6,000 rau tej neeg volunteers mus pab tua hluav taws thiab yog tias lawv txom nyem nyiaj txiaj ces yeej muaj tej nyiaj no pab rau lawv.
Txawm li cas los yeej tseem muaj ib txhia pej xeem Australia (Richard Finlay-Jones, director of Pilbara Solar PTY LTD) tsis txaus siab rau tus tsoom hwv Morrison tej tswv yim thiab hauv kev los daws cov teeb meem climate change thiab tseem sam sim sau kom tau ib cov kos xyeem memtes ua petition kom tau txog li 75,000 tus yuav coj tsoom hwv Morrison coj mus hais plaub vim tej teeb meem no tau ua rau huab cua kub sov, ntuj qhuav nkig, dej nyab thiab hav zoov kub hnyiab, uas twb tau muaj ib cov xwm txheej uas tej pej xeem ntawm teb chaws Netherlands tau coj tsoom hwv mus hais plaub cuam tshuam txog tej teeb meem no thiab nom tswv tau swb lawm.
Tej xwm txheej no thiaj ua rau muaj tej vaj tse tshaj li ntawm 2500 lub raug kub hnyiab lawm thiab muaj neeg txog li 28 leej tau tas sim neej lawm.
Tab sim no ces tseem muaj hav zoov kub hnyiab 13 kob rau sab hnub tuaj East Gippsland uas yuav kub tshuam rau sab qab teb ntawm xeev New South Wales thiab ntau caum kob hluav taws ntawm xeev New South Wales, thiab ntawm xeev South Australia lub pov txwv Kangaroo Island.
Hais txog tej neeg muaj koob nto npe cov kev pab cuam ces Australia tus neeg ua cov hauj lwm tso dag tso luag hu ua Celeste Barber kuj tau thov tau nyiaj tshaj li $40 million los pab rau lub koom haum tua hluav taws lawm. Ntxiv ntawd los kuj muaj James Packer pab ze txog li $ 5 million dollars, Jeff Bezos uas yog Amazon tus coj los kuj pab nyiaj txog li ntawm $1 million rau Australia cov dej num tua hluav taws thiab kuj muaj America tus poj niam nqua yas suab hu ua Pink pab li $500,000, nrog rau Kylie Monoque los kuj pab $500,000. Hos Nicole Kidman thiab Keith Urban los kuj tau pab $500,000, Russell Crowe los kuj tau pab $500,000 rau Australia Fire Rural Services siv tua hluav taws thiab. Salina Gomez nrog rau coob leej ntau tus celebrities los kuj tau cog lus tias lawv yuav ua ntau yam kom tau nyiaj donation los pab Australia busifire thiab tej neeg tuaj koom sib tw tennis ntawm Australia tam sim no li Ashleigh Barty, Nick Kyrgios los kuj tau thov kom tej neeg tuaj sib tw ntawm teb chaws Australia tasm sim no cog lus tias lawv yuav pab nyiaj $200 dollars rau txhua txhua zaus lawv ntau noj ib lub twg kom tau nyiaj los pab Australia tej koom haum tua hluav taws. 2 hnub dhau los no (15-16 January 2020), ntiaj teb cov neeg ntau pob tennis tshaj lij twb tau ua fundraising thov tau nyiaj $4.8 million los pab Australia cov hauj lwm tua hluav taws lawm.
Kuj tau muaj cov neeg tua hluav taws ntawm America thiab Canada thiab New Zealand nrog tej tub rog Australia txog li 3,000 tus mus pab tej neeg tua hluav taws txog li 1,000 tus uas tseem sam sim tua hluav taws ntawm Australia ntau lub xeev lawm thiab dua li ntawd los kuj muaj qee lub teb chaws ntawm cov teb chaws South Pacific Ocean los kuj tau pab nyiaj thiab qhia tias yog Australia xav tau txais kev pab cuam ces lawv yeej npaj txhij yuav pab Australia thiab. Kuj tau muaj 5 tug neeg Fabkis paub tua hluav taws uas twb tau mus koom tua hav zoov kub hnyiab ntawm Amazon, thiab Syberia los kuj qhia tias lawv npaj txhij yuav los pab Australia tua hluav taws thiab yeej tsis tau pom muaj hav zoov kub loj txog million hectares dua los li.
Hos hais txog tej neeg pheej mus ntxias dag lwm tus nyiaj tias yuav coj mus pab tua hav zoov kub hnyiab ntawm Australia lub caij no ces Rod Sims ntawm ACCC-Australia Comsumers and Competition Commission los kuj tau ceeb toom rau sawv daws kom txhob qaug quav rau tej neeg dag uas thov nyiaj mus pab hav zoov kub hnyiab thiab vim twb tau muaj tej xwm txheej no txog li 47 cov mus dag tej neeg lawm. Yog li thiaj yuav tau ceev faj rau tej gofundme, facebook page los yog tej neeg khob qhov rooj thov nyiaj pab tua hluav taws. Yog koj xav pab ces mus txheeb xyuas lub koom haum the Saint Vincient, the Salvation Army, the Australia Redcross los yog cov koom haum tua hluav taws ntawm teb chaws Australia tej website kiag los yog pab ncaj qha rau Rural Fire Services xwb thiaj tsis raug dag.
Dua ntawm nom tswv thiab tej neeg tuam los pav nrog tej neeg muaj koob nto npe no lawm yeej tseem muaj Australia tej neeg zejzog ntau lub tsis hais pab nyiaj, pab ua zaub mov, npaj dej haus thiab xa khoom noj mus rau tej neeg tua hluav taws los sis tej neeg Australia uas yuav tau khiav tawm ntawm lawv tej vaj tse vim hav zoov kub hnyiab no thiab.
Tab sis yav dhau los tom qab Australia tus thawj pwm tsav Scott Morrison mus holiday ntawm Hawaii thiab tau rov qab los ces nws kuj tau mus xyuas Australia tej pej xeem thiab xyuas cov neeg tua hluav taws tab sis muaj ib tug poj niam xeeb me nyuam tau thov thiab quaj tias kom thawj pwm tsav pab nyiaj los tua hluav taws tab sis nws cia li khiav mus lawm tus poj niam no tsis kam tuav tus coj no tes tib yam li ib tug neeg tua hluav taws uas thawj pwm tsav yeej lees tias nws totaub tias vim li cas thiaj muaj tej xwm txheej no.
79% ntawm Australia tej pej xeem txhawj xeeb txog cov teeb meem hloov quag ntuj thiab tsub nias kom tsoom hwv yuav tsum tau nqes tes kiag los tsim tsab cai climate policy thiab daws cov teeb meem climate change thiab txo txhob tso tej pa tsis huv (Carbon emission) paug tsuas tej ib puag ncig ntxiv lawm.
Klaus Shwab uas yog tus coj lub koom haum the World Economic Forum uas tau teeb tsa rooj sab laj ntawm Switzerland thiab muaj ntiaj teb tsoom theej tswj thiab tsoom coj lagluam mus koom kuj tau hais tias yuav taum tau los daws tej teeb meem climate change thiab txhob cia phaum neeg tom ntej no ua tsis tau lub neej hauv ntiaj teb no, yog tsis kub siab ces yeej tseem yuav muaj cov xwm txheej hav zoov kub hnyiab li tau muaj ntawm Australia tam sim no.
James Murdoch uas yog Rupert Murdoch tus tub ntxawg los kuj tsis txaus siab rau America cov chaw nthuav xov xwm li the Beast Daily thiab Fox News tias tsis lees paub cov teeb meem climate change.
Tej hav zoov kub hnyiab ntawm xeev Victoria thiab New South Wales tau ua rau muaj pab taws pos huab niab muaj pa taws ua rau yuav muaj teeb meem rau tej neeg hawb pob, muaj mob ntev, tej me nyuam yaus thiab tej laus yuav ua tsis tau pas thiab hawb pob tau. Cov neeg tswj kev noj qab haus huv thiaj tau ceeb toom kom cov neeg no yuav tau nyob twj ywm hauv tsev, los yog siv cov hnab khwv qhov ntswg P2/N95 respirator ntawm NSW los yog lwm qhov chaw uas muaj pa taws thiaj pov puag tau kom txais kev noj qab haus huv thiab noj qab nyob zoo.
Tej hav zoov kub hnyiab no kuj tau ua rau muaj Australia tej tsiaj qus tsiaj nruab nrag tshaj 1 billion tus raug ploj raug tuag thiab ntshe tseem yuav muaj ntau tuaj ntxiv rau lub caij uas tseem muaj qee cov xeev li South Australia, Victoria nrog rau New South Wales thiab Western Australia kub hnyiab txuas ntxiv tam sim no, uas tau muaj tej neeg paub zoo txog Australia tej tsiaj nruab nrag hais tias ntshe Australia cov dais Koala txog li 1 feem 3 yuav tu noob lawm. Kuj tseem muaj tej tsiaj txhua yug ua luam li nyuj thiab yaj los yeej raug kub hnyiab tuag coob kawg li thiab. Yog li lub koom haum pov puag tej tsiaj txhu thiaj tau coj ib cov zaub lauj pwm (Carrot) thiab qos liab coj mus pub Australia tej tsiaj ntawm tej chaw kub hnyiab uas tsis muaj zaub noj ntawd.
Ntxiv ntawd los kuj muaj nom tswv txhawj xeeb tias ntuj los nag rau ntawm Victoria thiab New South Wales hnub tim 15-16/01/2020 no yuav ua rau pab tua tau hav zoo kub hnyiab me ntsi tab sis tsam dej ho tshoob tej hmoov tshauv kub hnyiab thiab tej tshuaj tua hluav taws los paub tsuas rau Sydney lub pas dej Warragamba Dam, tab sis yeej tau muaj cov kws paub zoo txog dej tau qhia tias kom tej neeg txhob txhawj, yeej raug lim huv lawm mam siv tab sis cov pas khawb los yog cov pas dej tauv me yuav tau kawv txoj raj kom cov dej paug tej hmoov tshauv txhob paug txhob siv rau tej tsiaj txhu haus, txawm rhaub los tseem muaj tej taug li suphate thiab amonia uas yuav ua rau tej dej no tsw phem thiab daw ntsev txawm rhaub lawm los tseem muaj tej chemical no.
Yog li yog tias koj los yog ib tug twg muaj teeb meem nyuaj siab ntxhov plawv thiab xav tau kev pab cuam daws kev nyuaj siab ces sib txuas lus los yog hu tau rau lub koom haum Beyond Blue tus xov tooj 1300 22 46 36 los yog lub koom haum Lifeline tus xov tooj 13 11 14.
Mus txheeb xyuas tau xov xwm txog tej hav zoov kub hnyiab ntawm ntau lub xeev li hauv qab no tau:
- Emergency Victoria or 1800 226 226
- Fire.tas.gov.au
- South Australia fire services
