Australia daim passport kuj tseem yog ib daig ntawm ntiaj teb tej passport uas muaj fwj chim tshaj plaws raws li cov kev teev zwm tshiab tau qhia, ua ke no los Meskas daim kuj tau poob ntawm cov teb chaws 10 lub uas muaj fwj chim tshaj plaws hauv ntiaj teb ua thawj zaug rau lub caij 20 xyoo no thiab.
Henley Passport Index yeej tau txheeb cov zum (thib) ntawm ntiaj teb tej passports tej fwj chim txhuas txhua 3 hlis ib zaug twg ntawm ntau cov teb chaws uas tej neeg muaj passport muaj peev xwm mus ncig tau lub teb chaws ntawd yam tsis tas thov visa siv.
Ces cov kev teev zum tshiab qhia tias Australia daim passport yeej tseem yog cov passport ntawm ntiaj teb tej teb chaws thawj 10 lub uas muaj tej passport muaj fwj chim tshaj plaws, uas tseem tau thib 7 tib yam li teb chaws Czechia, Malta thiab Poland.
Australia daim passport tau zum 7 ces thiaj ua rau tej neeg Australia tau passport siv muaj peev xwm mus ncig tau ntawm cov teb chaws 185 lub hauv ntiaj teb yam tsis tas thov visa siv, thom qab tau nce ib theem ntawm theem 7 los ua theem 6 xyoo thaum ntxov xyoo no.
Meskas daim passport tau poob cov zum (thib) ntawm 10 lub teb chaws uas muaj tej passport muaj fwj chim tshaj plaws
Askiv lub koom haum sab laj lagluam hu ua Henley & Partners cov Global Passport Power Ranking Index tau qhia tias tau muaj qee cov kev pauv hloov rau ntiaj teb tej passport tej fwj chim loj heev rau lub caij li ntawm ob peb lub hli.
Txij li tau coj tsab ntawv cej luam los qhia lub 7 hli ntuj dhau los, ces pom tias Askiv daim tau poob ntawm thib 6 mus ua thib 8 lawm, hos Meskas daim ces tau poob ntawm thib 10 ntawm ntiaj teb cov passport uas muaj fwj chim tshaj plaws lawm.
Yog yog ib cov kev poob theem tseem ceeb rau Meskas uas tau zum (thib) 1 xyoo 2014, uas tam sim no ces tau poob mus tau thib 12 tib yam li teb chaws Malaysia lawm. Ob lub teb chaws no tej passport ces yeej muaj peev xwm mus ntoj ncig tau ntawm tej teb chaws txog li 180 lub yam tsis tas thov visa siv.
Thiaj li yog thawj zaug ntawm lub caij 20 xyoo ntawm Meskas tej keeb kwm uas tau ua rau nws daim passport poob ntawm ntiaj teb cov teb chaws 10 lub uas muaj tej passport muaj fwj chim tshaj plaws.
Daim phiaj qhia tias tej teb chaws twg muaj tej passport muaj fwj chim uas muaj peev xwm mus ntoj ncig tau ntawm ntau lub teb chaws hauv ntiaj teb uas tsis tas thov visa siv. Source: SBS
Henley Passport Index tau hais tias txawm tias zoo li kuj tsis muaj kev pauv hloov rau cov thib no ntau los tej zaum kuj yuav ua rau muaj teeb meem loj tau thiab.
Nws tau hais ib co ncauj lus tias "Meskas daim passport tej fwj chim uas muaj tsawg zujzus rau lub caij tshaj 10 xyoo dhau los no tseem ceeb tshaj qhov uas tau poob cov thib no thiab,''
''Yog tej cim qhia tias tau muaj kev pauv hloov rau ntiaj teb cov kev ntoj ncig thiab cov kev koom tes lawm. Ntau haiv neeg yeej lees txais cov kev qhib kev dav thiab kev koom tes yog cov ntau thawj ua ntej, hos tej uas muaj fwj chim dhau los yog cov poob qab lawm."
Txawm tias Meskas yeej tseem mus ntoj ncig tau rau tej teb chaws feem ntau thoob ntiaj teb no yam tsis tas thov visa siv, los nws tsuas pub 46 lub teb chaws ntawm lwm haiv neeg mus ntoj ncig tau ntawm nws lub teb chaws yam tsis tas thov visa siv xwb — ces thiaj muaj kev sib tu ncua loj tshaj plaws rau cov kev pom zoo ntawm ob lub teb chaws uas tso cai pub visa siv dawb los yog yuav tsub visa rau ib tog twg xwb, uas yog lub teb chaws muaj cov kev tu ncua no ua zum ob txuas ntawm teb chaws Australia thiab.
Cov kev sib tu ncua rau tej xwm txheej no tau ua rau Meskas daim passport thiaj tau poob cov theem passport muaj fwj chim. Lub 4 hlis ntuj ces tej neeg Meskas uas muaj passport siv thov tsis tau visa siv dawb ntawm teb chaws Brazil lawm thiab lub teb chaws no (Meskas) raug muab rho tawm ntawm cov teb chaws tau visa dawb siv li Cob tsib (Vietnam) thiab Suav tuam tshoj (China) lawm.
Askiv (The United Kingdom - UK) los kuj tau poob cov theem txij lub 7 hli ntuj lawm thiab, uas tau poob ntawm theem 6 mus ua theem 8 lawm, uas tseem tau thib qes dua Australia. Askiv daim passport los yeej zoo tib yam li Meskas daim uas tau poob theem ua ntuv zus — uas tam sim no ces Meskas daim tau cov thib qes tshaj plaws txij li nws tau zeeg 1 kaum (10) xyoo dhau los.
Tej kev pauv hloov no qhia dab tsi rau peb?
Tej kev pauv hloov rau tej passport cov theem no yeej tsis muaj teeb meem dab tsi rau tej neeg Australia feem coob cov kev ntoj ncig, tab sis cov kev pauv hloob ntawm tej teb chaws rau ib lub caij twg qhia tias tau ua rau muaj kev pauv hloov rau ntiaj teb cov kev koom tes lawm.
Singapore yeej tau cov thib zeeg 1 ua 3 xyoos sib law liag, uas ua rau nws daim passport muaj peev xwm mus ntoj ncig tau ntawm 193 lub teb chaws yam tsis tas thov visa siv.
Ntawm tej teb chaws li hais no tsuas muaj ntau cov teb chaws li China, Ghana, Indonesia, Vietnam, Laos, Mozambique thiab Benin - uas thiaj yog tej teb chaws uas Australia tej neeg muaj passport siv yuav tau thov visa siv mas thiaj muaj cai mus ntoj ncig tau xwb.
Afghanistan los kuj tseem yog lub teb chaws tau thib twv ntawm daim list uas teev txog tej teb chaws uas tej passport muaj fwj chim no, thiab nws tej neeg tsuas muaj cai mus ncig tau 24 lub tebchaws hauv ntiaj teb yam tsis tas thov visa siv xwb.
Cov index no ces yog xam raws li cov zauv (figures) uas tau los ntawm lub koom haum International Air Transport Association, uas yog ntiaj teb tej xov xwm teev txog cov kev ntoj ncig. Thiaj pom tias tej teb chaws cov thib uas fwj chim ntawm tej passport yeej muaj peev xwm pauv hloov sai heev, vim yog tias ho tsis tau visa siv dawb ntawm ib lub teb chaws twg lawm ces kuj yuav ua rau lub teb chaws ntawd poob cov theem ntau heev ntawm cov Global Passport Power Ranking Index no thiab.
