Raws li cov cai ywj pheej Freedom of Information uas SBS mus nrhiav tau ib cov xov xwm lo ntawd, ces SBS paub tias Australia tus thawj pwm tsav Scott Morrison cov kev mus xyuas nom tswv txawv teb chaws ntawm 17 lub teb chaws rau lub sij hawm 1 lub xyoos no twb raug nyiaj tshaj $1.3 roob lawm.
Thiab SBS ntseeg tias tej zaum ntshe Australia tus thawj pwm tsav no tseem yuav siv nyiaj ntau tshaj qhov hais los ntawd los kuj tau, vim tseem tsis tau suav ntau cov kev mus xyuas ntau lub teb chaws li America, Fiji, Thailand, East Timor thiab Indonesia nrog rau thiab.
Ntxiv ntawd los Australia tus thawj pwm tsav Scott Morrison no tseem npaj yuav mus xyuas teb chaws Japan, India rau lub ib hlis ntuj yuav los txog no thiab tseem yuav mus koom lub rooj sab laj G20 ntawm teb chaws Saudi Arabia rau lub 11 hlis ntuj ntxiv thiab.
Yog li no thiaj ua rau muaj neeg xav paub tias tej nyiaj raug siv mus xyuas nom tswv txawv teb chaws ntau lub no puas yuav tau txais txiaj ntsim rau teb chaws Australia los yog pej xeem Australia npaum li cas?
