Lub koom haum Australian Competition and Consumer Commission (ACCC) tau ceeb toom rau neeg Australia paub tias muaj neeg phem ua txoj siv ib co xov tooj hu rau neeg Australia thiab dag rau lawv tias yog tej neeg ua hauj lwm ntawm lub koom haum no kom thiaj nyiag tau tej neeg ntiag tug tej xov xwm.
Lub koom haum National Anti-Scam Centre uas ACCC uas tus tswj tau muaj ib co kev ceeb toom kom zej tsoom paub txog tej neeg phem cov kev siv ACCC tej xov tooj uas nws teev ntawm nws lub vas sab.
Nod yog tej uas tsim nyog koj paub txog tej xwm txheej tshiab uas siv coj los ntxias dag sawv daws, yuav txheeb kom paub tau li cas thaib ho yuav ua dab tsi yog tias koj poob rau tej xwm txheej no.
Tej neegphem ho siv lub tswv yim twg los ua txoj dag tias lawv yog cov neeg ntawm lub koom haum ACCC
Tau muaj xov xwm qhia tias tej neeg phem tau tau siv lub koom haum ACCC tej xov tooj ua txoj dag tias lawv yog cov neeg ntawm lub koom haum no hu xov tooj rau tej neeg Australia thiab xav tau yus tej xov xwm ntiag tug kom yus tsis txhob xav tias tsam yog neeg phem.
Raws li lub koom haum National Anti-Scam Centre hasi ces tau muaj tej neeg phem siv ACCC tej xov tooj no hu rau neeg Australia tab sis lub koom haum no hais tias nws tsis tau siv nws tej xov tooj teev hauv nws lub vas sab hu xov tooj rau tej neeg Australia.
Catriona Lowe uas yog ACCC tus lwm coj tau hais tias: "Tej neeg phem cov kev pheej ua txoj siv ib tug twg xov tooj hu rau lwm tus thiab pheej hais tias lawv yog ib tug neeg ntawm ib lub koom haum twg thiab tsis kam qhia lawv tus xov tooj tiag kom tej neeg ntseeg tias lawv yog tus neeg ntawm ib lub koom haum txaus ntseeg hu tuaj rau yus tiag — suav tsoom fwv tej koom haum li ACCC nrog thiab — ces yog xav dab tej neeg kom teb lawv thiab kom qhia lawv ntiag tug tej xov xwm rau tej neeg phem.''
"Nod yog ib lub tswv yim pab tej neeg phem kom yus tsis txhob paub tias lawv yog tus neeg zoo li cas tiag rau lub caij uas txoj dag tias lawv yog ib tug neeg ntawm ib co koom haum txaus ntseeg hu tuaj rau yus — uas yog ib lub tswv yim ua kom yus tsis txhob nco qab ceev faj.''
Yog yus xav tias tsab xov tooj hu tuaj rau yus los yog tsab xo (message) uas xa tuaj rau yus ntawd zoo li muaj ntsis txawv, ces ACCC xav kom yus cia li khwb kiag xov tooj tseg tsis txhob tham ntxiv thiab mam li hu ncaj qha rau lub koom haum no nug seb puas yog lawv hu rau yus tiag.
Ho yuav txheeb tau cov ACCC phone scam li cas
Ntawm qee cov xwm txheej uas muaj neeg qhia rau nom tswv paub, ces tej neeg phem tau hais kom tej neeg ntiag tug uas neeg phem hu xov tooj rau thiab nrog lawv tham ntawd qhia lawv tej xov xwm ntiag tug hauv xov tooj rau neeg phem, thiab siv ACCC tus ntawv luv yuam kev uas txoj dag tias yog hu ntawm lwm lub koom haum tuaj, los yog pheej tham ua lwm yam lus tsis tham ua lus Askiv.
ACCC hais tias nws yeej tsis 'nyob nyob es cia li lam tau lam hu xov tooj' los yog xa email rau tej neeg thiab hais kom tej neeg qhia lawv tej xov xwm ntiag tug li tej passwords, tej bank details thiab kom teb tej lus nug txheeb tias seb puas yog yus rau lub koom haum no li.
Tsis tas li ntawd los ACCC yeej tsis kom them nyiaj thiaj tau siv lawv cov kev pab cuam thiab yeej tsis hawv ib tug twg los yog tsub nias ib tug twg kom kav tsij nrog lawv tham xov tooj twj yim li.
Yog tias ib tug neeg twg uas hu xov tooj tuaj nrog yus tham thiab pheej ua li no ces tej zaum yuav yog neeg phem hu tuaj ntxias dag yus. ACCC thiaj hais tias kom cia li khwb kiag xov tooj tseg thiab qhia rau nom tswv paub.
Lub koom haum National Anti-Scam Centre alos luj tau hais tias cov kev pheej hais kom 'maj ceev nrooj' thiab 'kub siab ua kiag ib yam dab tsi kiag tam sim ntawd' tej zaum kuj yuav yog tej yam qhia tias yog ib cov kev ntxias dag thiab.
Yuav ua dab tsi yog yus raug neeg phem tsim teeb meem rau
Yog tias nyob nyob es yus cia li tau txais ib tsab xov tooj ntawm ib tug neeg yus tsis paub hu tuaj nrog yus tham, los yog xa ib tsab xo rau yus los sis xa ib daim email rau yus, ces kom xam tias tej zaum cuav xwb tsis muaj tseeb — txawm tias zoo li kuj yog hu/xa tuaj ntawm ib lub koom haum yus paub thiab ntseeg siab tuaj rau yus.
ACCC thiaj taw qhia tias tias yog yus mloog tau tias muaj ib yam dab tsi txawv txav lawm, ces xav kom kub siab maj ceev nrooj nrog xyuas. Tso tseg kiag tsis txhob nrog tus neeg hu tuaj ntawd tham lawm, thiab hu ncaj qha rau lub koom haum ntawd thiab txheeb tias seb puas yog lawv hu xov tooj tuaj rau yus tiag los tsis yog.
Tsis hais ib co xwm txheej twg li uas neeg phem siv ntxias dag yus, tsim nyog yus qhia rau lub koom haum ScamWatch pab, thiab yog yus tau tej xo xa ntawm cov social media platforms li WhatsApp los sis yog iMessage los tsim nyog yus qhia rau nom tswv paub thiab.
Yog tias yus ho tau qhia yus tej xov xwm ntiag tug rau tej neeg phem lawm, ces kom yus hu
rau lub koom haum IDCARE tus xov tooj 1800 595 160 thiab hu kiag tam sim ntawd nrog yus lub txhab nyiaj tham.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
