Lub koom haum Fair Work Commission (FWC) tau txiav txim siab nce nyiaj hauj lwm 3.5 feem pua rau Australia tej neeg ua hauj lwm khwv tau nyiaj tsawg tshaj plaws.
Ces thiaj yuav ua rau txhua txhua 1 tug ntawm 5 tug neeg ua hauj lwm uas tau cov award wage yuav tau nyiaj hauj lwm ntau tuaj ntxiv txij tim 1 lub 7 hli ntuj mus.
Lub koom haum no pawg tswj thiaj tau qhia txog nws cov kev txiav txim siab no ntawm Sydney rau hnub zwj Quag (Tuesday tim 3/6/2025) sawv ntxov tom qab tau txheeb tej ntaub ntawv txheeb txog tej nyiaj hauj lwm ntawm tsoom fwv thiab ntau cov koom haum tam li yog ib feem ntawm nws tej txheej txheem los txheeb tej nyiaj no ib xyoos ib zaug twg.
Adam Hatcher uas yog tus coj lub koom haum Fair Work Commission kuj pom tias tej neeg ua hauj lwm uas khwv tau tej nyiaj hauj lwm no ''ces pom tias muaj tej poj niam ua coob heev'' thiab feem ntau yeej yog cov hauj lwm casual thiab part-time xwb.
Nws tau hais tias "Peb txhawj tias yog peb tsis los ua cov kev txiav txim siab no rau cov kev txheeb tej nyiaj hauj lwm ib xyoos ib zaug no, ces yuav ua rau tej nyiaj lawv khwv tau tej zaum yuav tsis yog tej tsim nyog lawv khwv tau tiag, thiab yeej tau muaj tej xwm txheej no tshwm sim, uas yuav ras los ua ib co modern awards system,''
"Haiv neeg no tej nyiaj uas tsim nyog khwv tau yam tsawg tshaj plaws thiab cov kev tsis muaj peev xwm ua tau lub zoo neej ntawm tej neeg khwv tau nyiaj hauj lwm tsawg tshaj plaws ntawm tej zejzog ntawd ces ntshe yuav nyob li qub mus ntxiv.''
Tej nyiaj uas tsim nyog haiv neeg no khwv tau tsawg tshaj plaws kuj tau nce ntawm $24.10 mus ua $24.94 ib teev twg los yog khwv tau txij ntawm $915.90 mus ua $947.95 rau 38 teev uas ua hauj lwm ib limtiam twg lawm.
Tej koom haum sawv cev rau tej neeg ua hauj lwm yeej tau nqua hu kom nce tej nyiaj hauj lwm no yam tsawg li 4.5 feem pua, tab sis lub koom haum Australian Chamber of Commerce and Industry tsuas xav kom nce tej nyiaj no tsis pub tshaj 2.5 feem pua xwb.
Vim lawv tau cav tias yog tseem nce ntau ces yuav ua rau muaj teeb meem rau tej lagluam me thiab lagluam nrab.
Tej koom haum sawv cev rau tej neeg ua hauj lwm zoo siab rau cov kev nce nyiaj hauj lwm rau lub caij tej lagluam me muaj kev txhawj xeeb
Sally McManus uas yog tus coj lub koom haum Australian Council of Trade Unions tau hais tias cov nyiaj uas tau ntau zog ntxiv tuaj thiab siab zog 1 feem pua ntawm tus kab theem nyiaj poob nqe no yuav pab tej neeg ua hauj lwm khwv tau nyiaj tsawg ''ua tau lub neej tib yam li lwm tus.''
Nws tau hais ntxiv tias "Yog tej yam uas pab kom tej neeg muaj peev xwm them tau tej khoom siv tsim nyog siv,'' rau lub caij nws zoo siab rau cov kev nce tej nyiaj hauj lwm no.
McManus thiaj cav tias haj yam yuav muaj kev puas tsuaj loj tshaj yog tias tej neeg ua hauj lwm tsis muaj peev xwm yuav muaj nyiaj khwv tau los ua seem coj mus siv coj los ua cov lus teb txog tej lagluam me cov kev txhawj xeeb.
Sally McManus uas yog tus coj lub koom haum ACTU tau zoo siab rau cov kev nce nyiaj hauj lwm ntau tuaj ntxiv rau tej neeg ua hauj lwm tom qab tau nqua hu kom nce nyiaj hauj lwm 4.5 feem pua. Source: AAP / James Ross
"Tej zaum kuj yuav yog tsis yuav kasfes haus, tsis yuav sandwich noj, los yog tsis yuav beer haus...Tab sis yus tsis muaj peev xwm txo tau tej nqe ntiav tsev, thiab yus tsis muaj peev xwm txo tau yus tej nqe ntau yam.''
Luke Achterstraat ces yog tus coj ntawm lub koom haum Council of Small Business Organisations Australia tau hais tias tej tswv lagluam yog cov yuav raug teeb meem los ntawm cov kev nce nyiaj hauj lwm rau tej neeg ua hauj lwm no.
Nws tau hais ib co ncauj lug tias ''Cov kev txiav txim siab nce nyiaj hauj lwm 3.5 feem pua hnub no — uas tseem sib tshaj tej kab theem nyiaj poob nqe — yuav ua rau muaj teeb meem rau peb tej lagluam me uas yog ib co lagluam tseem ceeb, thiab yog cov lagluam feem coob uas twb khwv tsis tshua tau nyiaj tsam ntau lawm,''
"Yeej muaj ntau tus tswv lagluam thiaj yog cov yuav tau ntxeem nrog tej nqe kim tshaj qub ntau yam, thiab tsis muaj peev xwm yuav tsub tej nqe khoom kim ntxiv rau tej neeg yuav khoom siv.''
Daim phiaj qhia tias tau nce tej nyiaj tsim nyog khwv tau yam tsawg li cas rau lub caij 3 xyoos dhau los no.
Thawj pwm tsav Anthony Albanese thiaj rov qab tau qhia meej rau neeg Australia tias tej kev khwv tau nyiaj hauj lwm ntau zog tuaj ntxiv no tsis tsim nyog yuav ua rau tej nqe khoom kim.
Nws tau qhia rau tej neeg nthuav xov xwm tias "Tsis ua rau tej nqe khoom kim, qhov yuav ua ces yog pab kom tej neeg ua tau lub neej vim rau qhov yeej muaj ib txhia them tsis tshua tau tej nqe ntau yam,''
Xyoo 2024 ces lub koom haum FWC tau nce nyiaj hauj lwm ua 3.75 feem pua uas tseem qes dua tus kab theem nyiaj poob nqe 3.8 feem pua uas xam raws lub xyoo xwb.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
