Ib tug neeg ua hauj lwm full-time uas khwv tau nyiaj minimum wage ces tsuas tshuav nyiaj seem $33 tom qab tau siv tej nyiaj khwv tau ntawm ib limtiam twg los them tej nqe ntiav tsev nyob, yuav zaub mov noj, them nqe siv transport xwb raws li tau muaj ib tsab ntawv cej luam tshiab qhia.
Anglicare Australia tsab ntawv cej luam 2025 Cost of Living Index uas raug coj los nthuav tawm rau hnub zwj Teeb (Thursday) kuj tau qhia tias tej leej niam leej txi uas tib tug leej niam los sis tib tug leej txi ua tus tab cuab tab yig ces tom qab them ntau yam nqe tas lawm lawv tsuas tshuav nyiaj seem $1 xwb txawm tias lawv tau nyiaj pab ntawm tsoom fwv, hos tej cuab yig uas muaj ob tug txij nkawm ua hauj lwm thiab ho muaj ob tug me nyuam ces tsuas seem nyiaj txog $5 xwb.
Tej kev tshuaj ntsuam no tau mus txheeb tias seb tej neeg uas khwv tau nyiaj tsawg tshaj plaws raws li qhov tsim nyog khwv tau (minimum wage) ho muaj peev xwm coj tej nyiaj lawv khwv tau ntawm ib limtiam twg coj mus them tej nqe ntiav tsev nyob, yuav zaub mov noj, transport, zov me nyuam thiab kawm ntawv lawm ho puas txaus siv li cas.
Raws li tej xov xwm uas tau tsis ntawv los ntawm lub koom haum Australian Bureau of Statistics (ABS) cov kev teeb txheeb txog tej cuab yig tej kev siv nyiaj thiab cov nqe ntiav tsev (Household Expenditure Survey and rent costs from SQM Research's Weekly Rent Report) thiab nws tau coj tej nqe no coj los sib piv rau tej nyiaj uas ib tug neeg ua hauj lwm full-time khwv tau $822 ib limtiam twg uas yuav tau txij hnub tim 1 lub 7 hli ntuj (2025) no mus thaum uas nom tswv pib nce cov nyiaj minimum wage kom ntau tuaj ntxiv rau tej neeg ua hauj lwm.
Tsis tas li ntawd los kuj siv ib co piv txwv uas teev txog tsoom fwv tej kev pab cuam uas muaj pab rau tej cuab yig uas tsuas yog tib tub leej niam los sis yog leej txi ua tus tab lub cuab lub yig nrog thiab.
Lub koom haum Anglicare Australia hais tias tsab ntawv cej luam no txheeb tau tias ''cov kev tau ua ib txoj hauj lwm full-time yeej tsis muaj peev xwm pab kom tej neeg ua tau lub neej raws li tsim nyog ua lawm,'' thiab tej neeg uas khwv tau nyiaj minimum wage ces twb ''tshuav ze ze rau qhov tsis muaj peev xwm ua tau lub neej lawm.''
Kasy Chambers uas yog tus coj Anglicare Australia hais tias cov kev teeb txheeb tau los ntawm tsav ntawv cej luam xyoo no mas ''yog ib cov kev tag kev cia siab lawm''.
Chambers tau hais tias "Tom qab uas yus them tej nqe tsim nyog them tas lawm, ces tej neeg ua hauj lwm kwv tau nyiaj minimum wage no yeej tsis tshuav nyiaj hlo li lawm. Thiab yeej muaj tej neeg no coob tus uas yeej tsis muaj nyiaj seem txaus coj mus them nqe hluav taws xob li lawm,''
"Thiab peb tab tom pom tias muaj tej neeg coob zujzus tuaj ntxiv tau tiv tej nuj nqe hluav taws xob. Ces ua rau lawv yuav tau yoo, tso tseg tsis siv cua sov thiab tsis tshua muaj peev xwm them tej nqe ntau yam uas lawv twb tsis muaj peev xwm them taus rov qab lawm.''
Thiaj pom tau tias tau muaj tej customers uas siv tej hluav taws xob los yog gas ntau tshaj 330,000 tus tau tiv tej nuj nqe no sib sau ua ke raug nyiaj txog li $300 million rau tej tuam txhab muag hluav taws xob thiab gas lawm thiab tej nuj nqe no los tseem tiv ntau tshaj $3,000 thiab ''kuj tau tiv ntau tuaj ntxiv lawm thiab'', raws li Chambers tau hais thaum teev txog tsab ntawv cej luam Australian Energy Regulator's 2024 annual retail markets report.
Anglicare hais tias tej xub ke them nqe siv tsis tau hauj lwm
Chambers tau hais tias muaj tej neeg coob heev yuav tau them tej nqe raws li ib co xub ke them twg uas lawv tsis muaj peev xwm yuav them, ''ua ua rau tej tuam txhab muag hluav taws xob khwv tau nyiaj ntau khawg nkaus li''.
Anglicare hais tias nws xav kom tej neeg txom nyem uas tseem tiv tej nuj nqe hluav taws xob tsim nyog yuav tau txais kev pab cuam kom ntau tshaj qub ntxiv thiab tsoom fwv tsim nyog yuav tau ua tib zoo tshaj qub nrog tswj ''cov kev pheej txhob txwm nce nqe kim rau tej nqe hluav taws xob no.''
Chambers tau hais tias "Tej nqe hluav taws xob/gas tsis yog tej yam khoom siv luam thuam. Tab sis yog tej yam tsim nyog siv rau lub vaj lub tse, pab kom tau txais kev noj qab nyob zoo thiab ua tau lub neej yam tsim meej mom.''
Tab tom yuav muaj cov kev pauv hloov tab sis tseem yuav txog xyoo tom ntej no tso
Tej cai raug hloov uas lub koom haum Australian Energy Market Commission tau coj los qhia rau zej tsoom thaum ntxov lub hli no ces yuav txwv kom tsis pub tej tuam txhab muag hluav taws xob nce tej nqe hluav taws xob ntau tshaj ib zaug rau ib lub xyoo twg, txwv tsis pub tsub nqe ntxiv rau tej neeg uas them tej nqe no lig thiab yuav hais kom tej tuam txhab no yuav tsum npaj ib co xub ke siv zoo tshaj plaws rau tej neeg uas pheej tsis tshua muaj peev xwm them tau tej nqe no kom tau siv zoo tshaj qub ntxiv.
Cov kev kho no txhais tau tias yuav xaus thiab cheem tsis pub tej tuam txhab no ''ntxias tej customers kom mus siv ib cov xub ke them pheej yig twg, tab sis thawm kawg ho muab lawv tshem mus siv cov plans uas yuav tau them kim dua," raws li Chris Bowen uas yog tus nom tswj dej num Energy tau hais limtiam dhau los.
Bowen tau qhia rau ABC Radio National tias "Yeej muaj tej neeg Australia coob heev uas tej zaum yeej txom nyem los yog tseem tsis tau raug kev txim nyem, yog cov neeg uas yeej tseem tsis tau tau cov xub ke siv zoo tshaj plaws rau lawv siv. Thiab yeej tsis yog lawv cov kev txhaum dab tsi. Peb yuav tsum tau ua tib zoo xyuas kom lawv muaj peev xwm hloov mus siv tau lawm cov plans kom yooj yim npaum li qhov muaj peev xwm hloov tau.''
Tsoom fwv teb chaws los kuj tau txuas lub sij hawm pab them nqe hluav taws xob ntev ntxiv tuaj tam li yog ib feem ntawm tsoom fwv teb chaws tej nyiaj puag xyoo uas siv rau lub 3 hli ntuj thiab.
Ces thiaj yuav ua rau txhua yim neeg thiab 1 million cov lagluam me thoob plaws teb chaws no yuav tau nyiaj $75 rau txhua txhua 3 hlis twg pab them ncaj qha rau lawv tej nqe siv hluav taws xob txij li hnub tim 1 lub 7 hli ntuj no mus txog ntua rau thaum xaus xyoo 2025 no.
