Kuj tau muaj ntau cov kev ceeb toom tsis hais ntawm Australia thiab Meskas kom txhob mus ncig teb chaws Suav, Japan txwv tsis pub cov neeg ntawm Suav lub nroog Wuhan mus rau Japan thiab Singapore yeej tau txwv tsis pub visa rau cov neeg Suav mus transit los yog mus rau nws lub teb chaws li, Nyab laj los kuj tsis pub visa rau tej neeg Suav mus rau Nyab laj rau lub caij noj peb caug thiab. Ntxiv ntawd kuj tau muaj ntau lub teb chaws txwv tsis pub lawv cov pej xeem mus rau teb chaws Suav thiab txwv tsis pub tej neeg txawv teb chaws mus ncig Suav teb los rau lawv lub teb chaws los sis yog txwv thiab ceev tej neeg Suav ntau cov kev sib tw (sports) lawm thiab. Ib txhia teb chaws tej lagluam kuj kaw, teej kawm los kuj raug kaw vim ntsai tej kab mob coronavirus no.
Dua ntawm tej kab mob sib kis no lawm tseem muaj tej neeg Suav uas yog pej xeem ntawm teb chaws Australia no raug faib cai thiab ntxub txaug tias yog cov neeg kis kab mob coronaviruces.
Kuj tau muaj Australia 2 npau ntawv xov xwm li the Herald Sun thiab the Daily Telegraph los yog tau tshaj cov hauv paus xov xwm tias yog Suav cov kab mob (Chinese disease-'Chinese virus pendamonium' thiab 'China kids stay home' uas muaj neeg Australia caj ceg neeg Suav tsis txaus siab thiab tau tawm los campaign.
Tam sim no (05.02.2020) twb muaj ntiaj teb cov teb chaws muaj neeg kis tau tus mob Novel Coronavirus (2019nCOV) no li hauv qab no lawm:
1. China muaj neeg kis tshaj 20,500 tas sim neej 427 leeg.
2. Thailand 25, kho zoo 8 leej tshuav 17 leej tseem pw ntawm tsev kho mob.
3. Singapore 24
4. Japan 20
5. Australia 13: Queensland 3, NSW 4, VIC 4, SA 2 tab sis kuj muaj 3 tug neeg tau tus mob no ntawm Sydney kuj raug kho zoo thiab raug tso mus tsev lawm. Tseem muaj 2 tug neeg Australia kis tau tus mob no ntawm Japan thiab.
6. Hong Kong 12
7. South Korea 12
8. The United States of America 11
9. Macau 7
10. France 6
11. Vietnam 9, thiab nom tswv muab 950 leej ceev txheeb seb puas tau tus mob no lawm.
12. Germany 8
13. United Arab Emirates 5
14. Canada 4
15. Italy 2
16. The United Kingdom (Britain) 2
17. Russia 2
18. Finland 1
19. Spain 1
20. India 1
21. Nepal 1
22. Sri Lanka 1
23. Cambodia 1
24. Phillippines 1
25. Sweden 1
26. Belgium 1
Tsis tas li no los yeej tau muaj xov xwm cuav ntawm ib txhia neeg hais tias Australia lub tuam chav tswj kev noj qab haus huv tau txwv tsis pub Australia tej pej xeem mus rau ntawm 3 lub zos ntawm Brisbane uas muaj Australia cov pej xeem yog neeg Suav nyob coob thiab.
Ntxiv ntawd kuj tseem muaj ib tug neeg tso dab tias tsis kam tuav ib tug doctor poj niam neeg Australia caj ceg neeg suav vim cov kab mob coronavirus no, kuj tau muaj ib tug txiv neej neeg Australia caj ceg neeg Suav ntawm Sydney los kuj qhia tias zoo li tsis muaj Australia tej pej xeem ntaus nqe yuam kev tsis zoo rau nws vim nws looj cov hnav khwv qhov ntswg, thiab tej zaum lawv xav tias nws yog ib tug coj tej kab mob no mus kis rau lwm tus 'virus carrier'.
Ces nws thiaj hais tias tej kab mob coronavirus tau tshwm sim ntawm teb chaws Suav no tau ua rau lwm tus ntaus nqe rau cov neeg Suav yuam kev tib yam li lub caij cov neeg Muslim phem qee tus tau caij dav hlau mus nrau Meskas 2 lub tsev lagluam uas ua rau sawv daws xav tias lawv yog cov neeg phem (terrorists). Ntxiv ntawd los lub caij muaj cov kab mob SARS tshwm sim ntawm Suav teb los kuj muaj neeg ntau nqe yuam kev tib yam li no rau cov neeg Asian Canadian ces thiaj muaj neeg sau ib tsab ntawv report hu ua 'Yellow peril' coj los rau sawv daws nyeem thiab. Ces thiaj li muaj cov teeb meem racism no rau tej neeg Suav txawv teb chaws cuam tsuam txog cov kab mob coronavirus no.
Tam sim no ntiaj teb lub koom haum tswj kev noj qab haus huv World Health Organization (WHO) tau muab cov kab mob coronovirus no ua ib cov xwm txheej ntiaj teb yuav tau kub siab los daws (Global Emergency) lawm. Who tau nqua hu kom ntiaj teb tig los koom tes sib pab nrog xyuas cov kab mob no, thiab tseem yuav los npaj tshawb fawb kom paub txog cov kab mob no thiaj yuav tiv thaiv tau thiab seb ho puas tsim tau tshuaj vaccine coj los siv.
Tam sim no kuj tau muaj 12 tus neeg kis tau tus mob no ntawm teb chaws Australia lawm los txog rau hnub tim 31.01.2020 no. Tag nrho cov neeg no ces muaj 2 tug ntawm xeev Queensland, 2 tug ntawm South Australia, 4 tug ntawm xeev Victoria thiab 4 tug ntawm xeev New South Wales, tab sis kuj kho tau 3 tug ntawm New South Wales zoo lawm thiab.
Txawm li cas los nom tswv xeev NSW kuj qhia tias muaj 2 tug ntawm 4 tug no raug kho zoo thiab raug tso mus tsev lawm tab sis tseem tshuav cov neeg txog li 20 leej tseem raug ceev tseg tshuaj ntsuam seb puas tau cov mob no. Hos ntawm xeev Queensland ces nom tswv tseem muaj 41 tus neeg ceev tseg cia tshuaj ntsuam seb puas tau tus mob coronavirus no tib yam thiab.
Yog koj xav paub xov xwm kom ntxaws txog qhov tseeb cuam tshuam txog cov kab mob coronavirus (2019nCOV) ces mus txheeb xyuas tau raws li hauv qab no:
Muaj txheeb xyuas tau txog cov kab mob coronavirus no ntawm tsoom hwv Australia lub tuam chav tswj kev noj qab haus huv lub vas sab no tau:
Los yog koj txheeb xyuas tau tej kab mob no ntawm nom tswv tswj kev noj qab haus huv ntawm lub xeev New South Wales tau ntawm no.
Thiab yog koj xav nyeem xov xwm, saib yeeb yaj duab (video) los yog tej xov xwm cuam tshuam txog cov kab mob Novel Coronavirus ua lus Askiv, lus Suav ces mus txheeb xyuas los yog faib lub vas sab hauv qab no rau koj tej phooj ywg, koj tsev neeg thiab koom haum zejzog, tej chaw nthuav xov xwm thiab koj tej neeg txheeb ze tau.
Los yog tias koj txhawj xeeb txog koj tus kheej, koj tsev neeg, koj ib tug phooj ywg txoj kev noj qab nyob zoo ntawm xeev NSW ces kom koj sib txuas lus nrog
- The Healthdirect helpline tus xov tooj 1800 022 222 thov kev taw qhia lwm yam ntxiv.
- Hu rau Public Health Information Hotline tus xov tooj 1800 004 599 tau.
- Yog koj tsis paub ntawv Askiv thiab xav tau neeg txhais lus ces hau rau TIS National tus xov tooj 131 450 thiab kom lawv txuas xov tooj kom koj nrog Healthdirect tham tau.
- Xav kom koj mus ntsib kws kho mob thiab siv Hospital Emergency Department yog tias koj tsis xis nyob tom thiab tom qab tau mus ncig rau thaj chaw muaj tej mob no los yog ho tau kov tua ua tuav los yog tau nrog ib tug neeg mob tau cov mob no ua ke rau 14 hnub dhau los. Thiaj yog tej yam tseem ceeb heev koj yuav tau hu xov tooj thov kev pab cuam kom lawv ho npaj ua ntej lawv pab koj thiab thiaj pov puag tau koj los yog lwm tus.
