Lub neej tiam vam meej no yog ib lub neej uas kim heev yog koj xav kom koj tau lub zoo neej thiab ua tau ntau yam zoo, thiab yog tham txog nroog Sydney los yog tej zos ib puag ncig nws ces tej nqe vaj tse no yeej kim tshaj kim zuj zus tuaj thiab tseem kim tshaj tus zauv nrab ntawm tej nqe ua lub neej lawm uas yuav ua rau tej neeg nyob ntawm lub nroog no txom nyem nyiaj txiaj.
Australia yeej siv nyiaj tshaj 180 billion dollars rau ib lub xyoos twg rau cov kev pab cuam welfare, uas yog ib cov kev pab cuam ntau tshaj tej pab rau cov kev kho mob, kev kawm thiab hauj lwm tiv thaiv teb chaws sib sau ua ke diam. Yeej zoo li yog cov kev siv nyiaj ntau kawg li, tab sis Jenny Leong uas yog ib tug nom MP rau pab nom Greens ntawm NSW, nrog rau tus neeg tshaj xov xwm hu ua Caleb Bond thiab tus neeg sauv ntawv thiab tshaj xov xwm TV hu ua Juli Goodwin uas yog cov neeg uas tau mus koom SBS cov documentary tshiab 3 thoom hu ua 'Could You Survive On The Breadline?' hais tias, tej nyiaj pab cuam no yeej tseem tsis tau pab tau tej neeg Australia ntau txheeb tus uas tau tej kev pab cuam no txaus kom lawv muaj peev xwm ua tau lub neej raws li qhov tsim nyog thiab.
Daim documentary muaj 3 toom no thiaj yog ib daim uas Jenny, Caleb thiab Julie tau mus nrog tej neeg Australia uas tau nyiaj welfare ua lub neej txhua hnub nyob kiag kom paub tias seb tej neeg tau xyiaj pab cuam welfare ho ua lub neej zoo li cas ntawm 3 cov neeg zejzog. Lawv yuav tsum xav tias seb yuav siv tej nyiaj welfare tau los ntawm tsoom fwv cov kev pab cuam no ua lub neej li cas, tsis hais yog yuav khoom noj khoom haus tseem ceeb, them nuj nqes thiab them nqe ntiav tsev nyog nrog thiab, kom thiaj paub tias yuav tau muaj cov kev txiav txim siab nyuaj npaum li cas uas tau tshwm sim txhua hnub rau tej neeg tau txais nyiaj pab cuam welfare los yog tej neeg khwv tau nyiaj tsawg li cas.
3 tug neeg no nyias yeej muaj nyias tej lajthawj sib txawv tias yog vim li cas thiaj xav mus koom cov program siv sij hawm 9 hnub no. Yog hais txog Julie lawm, kuj yog tej yam uas nws tseem nco tau tias txom nyem heev thaum nws tseem hluas, ces thiaj ua rau nws xav qhia txog lwm tus tej kev ntaus nqe tsis zoo rau tej neeg tsis muaj hauj lwm ua. Tham txog Jenny ces, nws yeej ntseeg tias tsim nyog yuav tau kub siab tshaj no los nrog xyuas kom thiaj pab tau tej neeg txom nyem, thiab kuj hais tias 'tsis tsim nyog ib tug twg yuav txom nyem heev es ua rau nws tsis muaj peev xwm ua tau lub neej'. Caleb los yeej zoo li coob leej ntau tus neeg Australia us yeej tau tib cov welfare system tso tshav lug, thiab yeej tau muab tej neeg uas tau txais tej nyiaj pab cuam welfare pim tam li yog cov neeg siv yeeb dawb (heroin), tab sis tam sim no ces kuj tsis yog li nws xav thiab kuj mloog tej neeg ua lub neej txom nyem tshaj plaws piav tias lawv lub neej zoo li cas lawm.
Thaum xub pib koom cov program no ces, tej neeg no ib tug twg yuav tsum tso tseg tsis txhob ua lub neej li lawv ua tam sim no, thiab yuav tsum tawm ntawm lawv tsev mus rau 3 qho chaw txawv uas lawv yuav siv lub sij hawm tshaj 1 limtiam ua lub neej txom nyem, nyog hauv plawv nroog, nyob ntawm tej zos nrug nroog loj thiab ntawm tej zos yaj sab. Ces tiaj li yog ib cov kev pauv hloov tshiab uas nyuaj heev rau 3 tug neeg no. Caleb ces yog tus neeg uas tau cov nyiaj neeg puas cev uas tsuas tau nyiaj 2 limtiam twg txog li $868 xwb, thiab yuav tau ua tus pov thawj kom pom kiag tias yuav tau tso tseg dab tsi es kom thiaj li siv tau tej nyiaj no kom tau txais txiaj ntsim tshaj plaws los ntawm txhua txhua dollars. Julie los kuj tsuas muaj nyiaj $40 siv rau ib hnub twg coj los siv xwb thiab thaum uas nws thov tau cov nyiaj Jobseeker allowance siv, thiab kuj tseem yuav ntsib ntau yam teb meem nyuaj rau nws lub neej thaum nws nyob rau ntawm tej vaj tse pab tej neeg txom nyem sab qab teb hnub poob ntawm nroog Sydney. Jenney ces ho tawm ntawm Sydney mus nyob rau cheeb tsam Illawarra kom nws thiaj nkag siab txiag tias cov kev tau ib cov vaj tse nyob uas tau txais kev nyab xeeb thiab txais kev ruaj ntseg rau ib tug neeg niam uas ua niam tsev uas tau cov nyiaj pab cuam welfare ntawd tseem ceeb npaum li cas.
Nyob rau lub caij uas tseem tsim cov documentary no txuas ntxiv ntawd ces, ib tug neeg twg ntawm 3 tug no yuav ua lub neej nrog tej cuab yig txom nyem uas tau nyiaj welfare pab cuam kom ua tau lub neej, thiab yuav pib pom txog tej teeb meem uas muaj rau tej neeg no. Nyob rau xyoo 2020 ntawd ces yeej muaj neeg txog li 3.24 million tus (los yog 13.6% ntawm Australia tej pej xeem) yog cov neeg ua lub neej txom nyem tshaj qhov tsim nyog lawm. Tej teb chaws koom tes ua lagluam thiab kev txhim kho OECD yog tus tau teev tias tej xwm txheej zoo li cas thiaj yog cov kev ua lub neej txom nyem rau lub caij uas muaj ib nrab ntawm tej vaj tse uas khwv tau nyiaj nrab ntawm Australia no tsuas khwv tau nyiaj ib limtiam twg txog $457 xwb yog tias lawv yog cov neeg uas nyob tib leeg xwb. Ces thiaj tseem yuaj heev rau tej neeg uas tau cov nyiaj pab cuam Jobseeker uas lawv nyob lawv tib leeg uas tsis muaj me nyuam vim lawv tsuas tau nyiaj ib limtiam twg txog li $310 xwb. Thiab yog peb tseem muab tej kab mob kis thoob ntuj no coj los khaub zig nrog rau tej neeg uas tau tej nyiaj no siv thiab ces haj yam ua rau muaj teeb meem nyuaj siab ntxiv rau lawv.
Thiaj li yog ua rau yus tu siab heev thaum tau hno tias muaj teeb meem dab tsi rau tej neeg no vim rau qhov uas rau lawv tsis paub tias xyov lub neej yuav zoo li cas thiab ua tsis tau lub neej ruaj ntseg, Jenny, Caleb thiab Julie thiaj kub siab xav nrhiav kom tau ib cov xub ke los daws tej teeb meem no. Thiab cov kev ua hauj lwm yog ib qho uas yuav tau xub pib los xyuas ua ntej, tab sis lub caij uas tej neeg no nyias tseem mus nrhiav nyias txoj hauj lwm ua ntawd, lawv kuj tu siab heev rau cov kev tsis muaj cib fim thiab tag nrho tej tswv yim uas xav tias yuav coj los daws tau tej teeb meem no ces yog cov tswv yim uas tsis qhia qhov tseeb xwb. Tej teeb meem uas muaj los ntev no yuav tsum tau muaj cov tswv yim siv coj los daws tej teeb meem no ntev txuas ntxiv mus; vim tib lub tswv yim uas xav tias yuav siv tau hauj lwm rau sawv daws no yog ib lub siv tsis tau lawm.
Thaum uas tej neeg mus koom SBS cov documentary no mloog tej neeg muaj pluaj siab zoo txaus uas qhia txog lawv lub neej rau lawv mloog ntau npaum li cas lawm, ces pom tau tias tam li yog ib haiv neeg, ces pebyeej tseem muaj teeb meem rau peb cov kev xav ntawm peb lub teb chaws no tias yog tej yam yooj yim heev uas 'tsis txhob tos tej nyiaj welfare siv lawm.' Lub tswv yim uas tseem ntseeg tias peb sawv daws muaj peev xwm pab tau peb tus kheej yeej yog ib lub tswv yim uas yuam kev tas mus li rau lub caij tseem ua cov documentary no, thiab yeej yuav pom txog qhov tseeb lawm tias peb ib tug twg no kuj yuav poob tau rau tej xwm txheej nyuaj li hais no tau thiab. Vim tej dab neeg uas lawv qia ntawd ces yeej tham txog cov kev poob hauj lwm yam tsis faj txog, cov kev muaj mob uas mob los ntev, cov teeb meem kub ntxhov ntawm txoj kev txwij nkawm uas yuav ua rau muaj kev pauv hloov ib tug neeg lub neej ntawm ua tau lub neej los ua lub neej txom nyem uas yuav tau tos tsoom fwv cov nyiaj pab cuam lawm xwb. Tsis tas li ntawd los yog thaum yus tseem ntxiv ntau yam tseeb meem ntxiv rau li cov kev puas cev, cov kev tsis muaj cibfim, thiab cov kev raug lwm tus ntaus nqe yuam kev ntawd thiab ces cov kev yuav tso tseg tsis thov nyiaj pab cuam welfare ntawd haj yog yog tej yam nyuaj thiab sib chab sib chaw tshaj qhov peb feem coob ras txog lawm thiab.
Yog li cov documentary uas muaj 3 toom no thiaj yog tej yam tseem ceeb qhia rau peb tias vim li cas thiaj muaj tej neeg no, thiaj ua rau tej neeg muaj peev xwm pab tau lawv tus kheej cov kev txiav txim siab txog tej neeg txom nyem no tseem tsis tau muaj peev xwm ua tau zoo txaus. Yog li ntawd tej neeg ntiag tug uas Jenny, Caleb thiab Julie tau ntsib rau lub caij lawv tseem ua cov documentary no thiaj yuav ua rau nej kub siab, xav paub thiab xav nrhiav qhov tseeb thiab yuav ua rau nej nug ntau yam lub nug txog lub neej txom nyem yam nej tsis tau nug dua tias puas puas yog tej neeg xav xaiv ua lub neej li ntawd tiag.
Cov documentary hu ua 'Could You Survive On The Breadline?' no thiaj yuav raug coj los tso ntawm SBS thiab SBS On Demand rau hnub Wednesday tim 17.11.2021 sij hawm 8:30 pm AEDT thiab mam li coj ntau toom coj los tso rau sawv daws saib rau lub sij hawm 3 limtiam.
Koj muaj peev xwm saib tau ib toom documentary luv luv qhia txog cov kev mus txheeb xyuas tej neeg tau nyiaj pab cuam welfare no seb lawv ua lub neej zoo li cas tau ntawm no:
[videocard video="1963839555605"]
Share
