Kuj muaj ntau yam tseem ceeb ntawm tej neeg zej zog Australia qhia txog tej lawv xav tau los ntawm nom tswv ces lawv thiaj yuav siv tej no los txiav txim siab tias seb yuav xaiv pab nom twg.
Raws li lub chaw nthuav xov xwm ABC tau qhia ces yeej tau muaj neeg Australia txog li ib nrab (8 million tus neeg) tau xub mus xaiv nom thaum ntxov ua ntej lawm. Cov xeem ntawd ces mam li mus xaiv nom rau hnub tim 21.05.2022 uas yog hnub zwj Cag (Saturday) no suav tej coj ntawm cov pab nom tseem ceeb li ALP, LNP, Greens thiab lwm tus coj ntawm lwm cov pab nom me nrog tib si.
Yeej muaj ntau yam tseem ceeb uas tej neeg Australia yuav siv coj los ua kev txiav txim siab tias seb yuav xaiv pab nom twg los ua tsoom fwv Australia tshiab rau cov kev xaiv tsa xyoo 2022 no li:
- Tej nuj nqes ua lub neej thiab tej khoom uas kim tuaj thiab tej nyiaj uas khwv tau li qub
- Tswv yim daws teeb meem huab cua pauv hloov
- Nom tswv cov kev ua ncaj ncees thiab tej teeb meem lwg noj lwg haus
- Kev muaj peev xwm nrhiav tau hauj lwm ua
- Kev pab cuam daws kev nyuaj siab ntxhov plawv
- Kev muaj peev xwm yuav tau tsev nyob thiab tau ua tej hauj lwm xav ua nrog lwm cov kev pab cuam.
Hnub tim 21.05.2022 no ces yeej muaj tej neeg Australia uas tseem tsis tau mus xaiv nom thiab yeej yeej tseem tsis tau txiav txim siab mus xaiv nom seb ho yuav xaiv pab nom twg. Anthony Albanese thiab Scott Morrison tau hais ib cov lus kawg rau tej neeg xaiv nom rau hnub xaiv tsa tim 21.05.2022. Anthony Albanese tau qhia rau ABC thiab tej neeg yuav xaiv Labor kom tsim tau lub neej pem suab zoo dua.
Hnub no kuj tau muaj Scott Morrison ntawm tus tsoom fwv koom tswj (Coalition - LNP), ALP tus coj uas yog Anthony Albanese, thiab pab nom Greens tus coj uas yog Adam Bandt los kuj tau mus xaiv nom hnub no thiab.
Thawj pwm tsav Scott Morrison los kuj tau rov qab hais tias cov kev nrhiav suab xaiv tsa rov qab los ua tsoom fwv tshiab zaum no tsis yog tham txog nws tus kheej los yog tej hauj lwm nom tswv tab sis yog tham txog pej xeem Australia. Yog txoj kev xaiv uas seb neeg Australia yuav xaiv lawv lub neej pem suab li cas li seb tus nom twg muaj peev xwm tswj tau nyiaj txiaj, tswj tau lagluam zoo, pab kom muaj hauj lwm ua, pab kom tej neeg siv tau nyiaj superannuation los yuav tau tsev nyob thiab tswj tau kev ruaj ntseg, los yog pab tiv thaiv kom txhob muaj neeg Australia mob thiab tas sim neej los ntawm tus kab mob COVID-19 li lwm lub teb chaws. Thiab nws hais tias nws yuav hloov txoj kev ua tus tswj tshiab los tswj hwm lub teb chaws Australia yog tias nws rov qab raug xaiv los ua nom dua.
Thawj pwm tsav Scott Morrison los yeej hais tias yog tseem xaiv Labor thiab ces yuav ua rau tiv nuj nqe ntau ntxiv tuaj thiab tau them se kim zog tuaj xwb.
Nws tau qhia rau ABC thiab pab nom Coalition yeej tau pov puag tej hauj lwm thiab lagluam rau lub caij muaj kab mob kis thoob ntuj thiab xav ua tej hauj lwm no txuas ntxiv.
Mr Morrison hais ntxiv tias "Thiab peb yeej muaj ib cov tswv yim zoo yuav pab kom ua tau li hais ntawd. Tab sis Labor ces yuav tiv nuj nqes ntau tuaj ntxiv, yuav muaj nyiaj poob peev ntau ntxiv, txhais tau tias lawv tsis muaj peev xwm tswj nyiaj txiaj, thiab lawv yuav tsub se siab zog rau nej them.Tej ntawd yog tej lawv yuav ua, thiab yog tej peb paub txog lawv los yog tej neeg Australia yuav ntsib."
Yog tham txog Anthony Albanese lawm ces tom qab nws tau xaiv nom tas nws kuj tau nrog tej neeg tshaj xov xwm tham tias nws yog tus yuav los sawv cev rau Australia tej neeg ntau pawg neeg sib txawv tsim kev koom npoj tsis yog tsim kev sib tawg tswj, yuav pab kom tsim tau lub neej pem suab zoo dua rau txhua tus neeg Australia, pab kom khwv tau nyiaj hauj lwm ntau tuaj ntxiv, tau siv kev pab cuam zov me nyuam, pab tu tej laus kom zoo tshaj qub ntxiv. Yog li Anthony Albanese thiaj hais tias kuv xav hloov tej hauj lwm kam teb kam chaw no thiab yog nej xav kom muaj kev pauv hloov tshiab ces hloov dua tus tsoom fwv tshiab xwb. Thiab nws cia siab tias nws pab nom yuav muaj yeej rau cov kev xaiv tsa no hmo no.
Mr Albanese rov qab hais ntxiv tias "Tsim nyog lawv xaiv cov kev ntiav zov me nyuam pheej yig zog hnub no. Tsim nyog yuav tau nqes tes daws teeb meem huab cua pauv hloov. Tsim nyog lawv xaiv cov kev tau hauj lwm ruaj ua thiab cov kev daws tej nuj nqes ua lub neej kim. Labor yuav xyuas kom cov kev zov me nyuam pheej yig zog, nqe energy pheej yig zog thaum txhawb nqa renewable energy. Peb yuav xyuas kom tshuaj pheej yig thiab peb yuav tsis muaj tej cai li tus tsoom fwv no uas txhob txwm uas kom tej neeg khwv tau nyiaj tsawg.''
Hais txog Adam Bandt uas yog tus coj ntawm pab nom Greens uas yog ib pab nom me ces tom qab uas nws tau xaiv nom lawm. Nws tau qhia rau tej neeg Australia xaiv nom tias pab nom Greens cia siab tias yuav tsim kom tau tsab cai los hloov cov kev siv roj fossil fuel mus siv cov renewable energy, tsim kom tau pab nom txheeb nom tswv cov kev ua tsis ncaj lwg noj lwg haus, thiab xyuas kom tej neeg tau siv kev kho mob thiab rho hniav nrog rau kom tau siv cov kev zov me nyuam dawb thiab pab kom tej neeg yuav tau tsev nyob.
Kuj tau muaj tus nom Zoe Daniel ntawm lub rooj nom Goldstein tsis zoo siab thiab tau qhia rau tub ceev xwm tias muaj lwm pab nom coj lawv tej phiaj coj los txhos kiag rau ntawm nws ntuj laj kab ntawm xub ntiag tsev thiab tseem hais tias kom xaiv pab nom Labor ua pab nom kawg, uas kuj tau muab tej no tshem tag lawm tom qab nws tau mus yws rau tub ceev xwm. Nws yuav los xyuas kom tau txais vaj huam sib luag rau cov gender equality, xyuas kom tsim tau pawg nom txheeb tej nom tswv cov kev ua tsis ncaj thiab los sawv cev rau neeg Australia thiab daws tej teeb meem huab cua pauv hloov.
Txawm li cas los thawj pwm tsav kuj tau hais ntxiv tias tau muaj ib lub nkoj tseem nyiag yuav tuaj ntawm Sri Lanka tuaj rau teb chaws Australia thiab kuj tau muab cheem tau lawm. Nws thiaj hais tias nws tus nom thiaj tiv thaiv kom tsis txhob muaj neeg nyiag caij nkoj tuaj tsis raug cai rau teb chaws Australia no. Thiab tsuas yog xaiv nws rov qab los ua nom xwb thiaj tswj tau tej teeb meem no. Tab sis pab nom Labor qhia tias nws yuav xyuas kom tsim tau cov permanent visa rau tej neeg thoj nam uas tau cov temporary visa siv tam sim no kom thiaj tau txais kev pab cuam ntau yam ruaj. Tab sis yeej tseem tsis tau paub tias seb 2 pab nom tseem ceeb no puas yuav nrog xyuas txog tej neeg thoj nam uas tseem tshuav txog li 1,300 tawm tus uas tsis paub tias yuav cob cuab li cas tom qab muaj ib txhia xa mus rau New Zealand thiab muaj ob puas tawm tus xa mus rau America lawm.
Kuj tau ua rau lub koom haum tswj cov kev xaiv tsa Australia Electorol Commission (AEC) kuj tau qhia nag hmo tias nws tau tsim ib cov kev xaiv nom rau tej neeg uas kis tau kab mob COVID-19 lawm koj tau mus xaiv nom thiab.
Yog li thiaj tseem yuav tos cov kev xaiv nom uas tej neeg Australia mus xaiv hnub no thiab tej uas xa hauv post office mas thiaj li yuav paub tias pab nom twg yog pab yuav yeej cov kev xaiv tsa zaum no los tsim tsa tus tsoom fwv Australia tshiab tom ntej no.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Google podcasts, Spotify, thiab Apple podcasts los yog download SBS Radio App kom koj mloog tau SBS Hmong.
