Vim tau muaj tus kab mob Omicron COVID-19 no tau kis rau qee cheeb tsam hauv ntiaj teb no nrog rau ntiaj teb tej xwm txheej laj fai kum xeeb uas tsis ruaj ntseg, ces thiaj tau ua rau muaj ib co teb chaws yuav raug teeb meem phoj sij dua lawm cov teb chaws.
Tsoom fwv Australia los yeej tau npaj ib cov kev taw qhia rau tej neeg uas yuav ntoj ncig mus rau 177 lub teb chaws, uas yeej muaj cov qeb theem taw qhia ntoj ncig pib txij theem 1, theem 2, theem 3 los yog theem 4 no qhia rau tej neeg. Yog muaj cov qib theem taw qhia no siab npaum li cas ces txhais tau tias yuav raug teeb meem phom sij siab dua rau tej neeg Australia uas yuav mus ntoj ncig rau tej teb chaws ntawd.
Smartraveller yog dab tsi tiag?
Australia lub tuam chav lis laj fai pej kum thiab lagluam (Department of Foreign Affairs and Trade) yog tus tsim cov kev taw qhia Smarttraveller. Ces thiaj tau tej xov xwm los ntawm ntau qhov chaw los li Australia tej nom tswv txawv teb chaws, tej koom haum tswj kev noj qab haus huv, tej koom haum soj xwm qab rooj, tej nom kis pej kum txawv teb chaws, tej chaw nthuav xov xwm thiab tej kev tawm tswv yim los ntawm tej neeg ntoj ncig. Thiaj li muaj cov kev taw qhia txog cov kev ntoj ncig ua ntau qeb theem li hauv qab no:
- Level 1, muaj cov kev taw qhia kom neeg Australia yuav tsum tau ceev faj txog cov kev nyab xeeb, vim yeej muaj cov kev tswj kev ruaj ntseg zoo sib xws li tej ntawm Australia cov nroog loj.
- Level 2 muaj cov kev taw qhia kom yuav tau ceev faj heev thiab yuav tsum tau kub siab txog tej kev ruaj ntseg uas muaj siv tam sim no, thiab tej xwm txheej cuam tshuam txog kev noj qab haus huv. Tsis yog tias tsis tsim nyog koj mus ncig rau thaj chaw ntawd, tab sis tsim nyog koj yuav tau teeb txheeb txog thaj chaw ntawd me ntsis tso thiab yuav tau ua tib zoo ceev faj kom zoo zog.
- Level 3 ces yog theem uas yeej muaj cov kev taw qhia kom ib nyuag kub siab tiag tiag, thiab yeej tau muaj cov kev taw qhia kom tej neeg Australia rov qab ua tib zoo xav kom zoo tias puas tsim nyog mus ntoj ncig tiag. Cov kev taw qhia theem no txhais tau tias yog koj mus ntoj ncig rau lub teb chaws ntawd ces yuav raug teeb meem loj thiab raug kev phom sij rau koj txoj sia, ces thiaj xav taw qhia kom yog tsis muaj hauj lwm tseem ceeb mus ces kom tsis txhob mus.
- Level 4 ces yog cov kev taw qhia kom tsis txhob mus ntoj ncig. Tsoom fwv yeej tau txiav txiav txiam lawm tias tej neeg uas mus ncig rau lub teb chaws ntawd yuav raug kev phom sij ua rau tas sim neej, raug txim kaw tsev laj cuj, raug neeg muab nyiag txhom ntes los sis yog yuav ua rau raug mob loj yog tias mus rau thaj chaw ntawd, thiab tsim nyog tej neeg Australia yuav tau tawm ntawm thaj chaw ntawd mus rau lwm qhov yog tias tau txais kev nyab xeeb thiab muaj peev xwm tawm tau.
Cov teb chaws uas muaj cov kev taw qhia theem 4 (Level 4) ces tam sim no yog cov teb chaws li Afghanistan thiab cov teb chaws Africa ntau lub uas tej nom tswv txwv tsis pub ntoj ncig, tom qab tau muaj tus kab mob Omicron COVID-19 lawm.
Leej twg muaj peev xwm tawm ntawm Australia mus los yog tuaj tau rau Australia?
Txawm tias yeej tau tso kev yooj yim me ntsis rau pej kum haiv cov kev ntoj ncig thaum tswj ciam teb ib nyuag ntaug zog rau ntau lub hlis tsis ntev los no lawm los, yog tej yam tseem ceeb yuav tsum nco tias tsis yog txhua leej txhua tus ntawm Australia no yuav muaj peev xwm rov qab tuaj tau ywj pheej rau lub tebchaws no yog tias lawv txiav txim siab tawm ntawm lub teb chaws no mus lawm.
Tsuas pub tej pej xeem Australia los yog tej neeg nyob ruaj ntawm teb chaws Australia no nrog rau qee cov neeg paub ua hauj lwm thiab tej tub kawm pej kum haiv xwb mas thiaj muaj peev xwm tawm ntawm Australia mus los yog rov qab tuaj tau rau teb chaws Australia yam tsis tas thov ntau ntawv zam dab tsi xwb.
Kuj zam rau ib txhia neeg txheeb ze nrog Australia tej pej xeem tsev neeg los yog cov neeg nyob ruaj tsev neeg tuaj tau, thiab tab sis cov neeg thov tau visa tuaj nyob ib ntus ntawm Australia no xwb ces yuav tsis pub tuaj lawm.
Tej neeg ntoj ncig uas tuaj rau teb chaws Australia no yuav tsum tau mus sim kab mob COVID-19 thiab yuav tau cais li tej cai hais kom cais thaum rov qab tuaj rau teb chaws no.
Yog xav tau xov xwm tshiab qhia txog cov kev taw qhia txog pej kum haiv cov kev ntoj ncig ces txheeb tau ntawm lub tuam chav Department of Home Affairs lub vas sab (website).
Graphics by Ken Macleod, Jono Delbridge and Karin Zhou-Zheng.
