Raws li lub tuam chav nthuav xov xwm ABC News tau qhia, Australia cov nom tswv txheeb tej neeg thiab tej khoom ntawm ciam teb hais tsis ntsees rau ntawm tshav dav hlau Sydney Airport tau txheeb tau rau hnub zej Cag zwj thaj tim 05 lub 10 hli ntuj xyoo 2019 dhau los tias tau muaj ib tug poj niam neeg Nyab Laj hnoob nyoog 44 xyoos uas thov tau visa tuaj rau teb chaws Australia lub tsav dav hlau ntawm Sydney raug txheeb tau tias nws nqa ntau yam nqaij sib xyaws txog li ntawm 10 kilograms tuaj rau teb chaws Australia. Tej nqaij ntawm ces muaj nqaij npuas, nqaij noog ws, qes qaib nyoos, qej nyoos, thiab txiv xyoob txiv ntoo. Ces nom tswv Australia cov neeg tshawb khoom ntawm lub tsev dav hlau Sydney International Airport thiaj tsis pub visa rau tus poj niam neeg Nyab laj no los rau Australia thiab tau muab nws xa rov qab mus rau teb chaws Nyab Laj lawm.
Bridget McKenzie, uas yog Australia tus pwm tsav tswj cov dej num qoob loo hais tias " Nom tswv Australia yeej kub siab heev txog Australia tej pej xeem ua mus ncig rau cov teb chaws muaj cov kab mob African Swine Fever (ASF) sib kis no thiab rov qab los rau teb chaws Australia, los sis yog cov neeg ntawm cov teb chaws uas muaj cov kab mob ASF sib kis uas thov visa tuaj rau teb chaws Australia no. Yog Australia tej pej xeem tseem nqa tej nqaij npuas ntawm tej teb chaws li hais ntawd rov qab los rau Australia ces yuav yuav raug nplua nyiaj txog AUD 420,000 los yog yuav raug kawg tsev laj cuj txog li ntawm 10 xyoos, hos yog cov neeg txawv teb chaws tuaj rau Australia no ces yuav tsis pub visa rau siv thiab muab xa rov qab thiab tsis pub tuaj xyuas Australia rau 3 lub xyoos ntxiv thiab. Yog li nws thiaj qhia tias nom tswv Australia yuav ua txhua yam raws li nws muaj fwj chim ua tau los tswj kom cov kab mob African Swine Fever no tsis txhob kis rau teb chaws Australia."
Australia lub tuam chav lis laj fai tswj tej dej num qoob loo tau qhia tias txij lub 11 hlis ntuj xyoo 2018 los txog rau lub 8 hli ntuj xyoo 2019 no ces Australia cov neeg tswj ciam teb twb txheeb tau tej khoom noj tsim los ntawm tej nqaij npuas txog li 100 kilograms lawm. Thiab raws li tau muaj cov kev sim lawm ces lawv pom tau tias muaj cov nqaij npuas tej neeg nqa nrho lawv tuaj no txog li 50% yog cov nqaij uas muaj cov kab mob African Swine Fever thiab.
Yog li ntawd nom tswv Australia thiaj txhawj tias tsam tej zaum cov kab mob ASF no yuav tsim tau teeb meem rau Australia cov lagluam nqaij npua raug nyiaj tshaj AUD 5 billion thiab tej zaum kuj yuav tsim tau teeb meem rau Australia cov lagluam qoob loo raug nyiaj txog AUD 60 billion tau, thiab tseem yuav ua rau tej neeg ntau caum txheeb tus poob hauj lwm thiab.
