Australia tus nom tswj dej num txawv teb chaws Penny Wong tau hais tias Australia "txhawj xeeb heev" rau tej xwm txheej tsis sib haum xeeb raws ciam teb ntawm Thaib thiab Cambodia rau lub caij uas nws tau nqua hu kom tej neeg ntoj ncig tsis txhob mus xyuas qee thaj chaw ntawm ob lub teb chaws no.
Tsoom fwv Australia kuj tau muaj ib co kev taw qhia tshiab rau cov kev ntoj ncig ntawm nws lub vas sab Smartraveller tom qab uas Thaib thiab Cambodia tau sib tua muaj ceem tuaj ntxiv rau qee thaj chaw cuam tshuam txog tej kev tsis sib haum xeem ciam teb uas tau muaj los tau ntau caum xyoo.
Kuj tau muaj Thaib ib lub dav hlau tua rog F-16 tau tua foob pob rau ntau lub yeej tub rog ntawm teb chaws Cambodia tom qab uas ob tog tau sib tua ces tau ua rau muaj tej pej xeem tuag yam tsawg li 11 tug lawm.
Wong tau sau ntawv hauv nws phau X account hnub zwj Kuab (Friday) tias ''Australia muaj kev txhawj xeeb heev txog tej ciam teb uas muaj xov xwm qhia tias tau muaj neeg raug mob thiab tau tas sim neej,''
''Peb thiaj nqua hu kom ob tog tswj tej xwm txheej no kom tsis txhob kub ntxov ntxiv thiab daws tej teeb meem ntau yam cuam tshuam txog ciam teb yam thaj yeeb.''
Cov lus taw qhia rau cov kev ntoj ncig ntawm teb chaws Thaib thiab Cambodia
Tom qab hnub Friday ces tsoom fwv Australia lub vas sab Smartraveller tau taw qhia rau neeg Australia kom rov qab ua tib zoo xav seb puas tsim nyog mus ntoj ncig rau Thaib tej ciam teb ntau thaj chaw ntawm tej xeev
Buriram, Si Saket, Surin thiab Ubon Ratchathani uas nyob ze ciam teb teb chaws Cambodia vim yog tej chaw uas ob tog tseem sib tua.
Cov kev taw qhia no tau hais tias ''yeej muaj xov xwm qhia tias tau muaj tub rog sib tua, muaj teeb meem kub ntxhov thiab muaj tej xwm txheej mee tawg'',
"Tom qab tau muaj tej lus taw qhia los ntawm tej nom tswv zejzog, ces tej chaw nthuav xov xwm zejzog kuj tau qhia tej xov xwm tshiab thiab yeej tau hais kom tej neeg ntiag tub kub siab txog yus txoj kev ruaj ntseg. Rau qhov zoo li tej chaw hla ciam teb ntawm ob lub teb chaws Thaib thiab Cambodia los yeej tseem raug kaw txuas ntxiv yam tsuas muaj lub sij hawm luv luv ceeb toom rau zej tsoom paub xwb.''
Smartraveller thiaj li tseem muaj cov kev taw qhia rau tej neeg ntoj ncig kom xyuam xim ceev faj heev thiab kub siab txog tej lub ceeb toom rau cov kev ntoj ncig mus rau teb chaws Thaib.
Hos ntawm teb chaws Cambodia ces yeej tau nqua hu kom tej neeg Australia uas tab tom mus rau tej chaw ntau thaj caw raws ciam teb sab qaum teb hnub tuaj ntawm teb chaws Thaib thiab qaum teb hnub poob ntawm cov xeev Preah Vihear, Oddar Meanchey yuav tau ceev faj tshaj qub kom thiaj tau txais kev nyab xeeb rau yus.
Cov kev sib tua ntawm ciam teb: Tej uas peb paub lawm
Ob lub teb chaws no yeej tau liam ib tog twg tias yog tus pib tawm tsam ib tog twg rau thaum ntxov hnub zwj Teeb uas tej xwm txheej sib tua me no tau ras los ua ib co xwm txheej sib tua loj li tau siv riam phom muas txwv foob pob sib tua hnyav heev rau tej chaw yam tsawg li 6 thaj raws ciam teb.
Thaib kuj tau npaj 6 lub dav hlau tua rog F-16 mus tawm tsam yam tsis tau pom dua los li, ib lub ces raug xa mus tawm tsam Cambodia tej yeej tub rog uas yog ib co tswv yim uas Cambodia lub tuam chav tswj dej num txawv teb chaws tau hais tias ''yog ib co cwj pwm phom sij thiab yog ib co tub rog cov kev hawv tawm tsam phem''.
Thaib tej tub rog los kuj tau hais tias cov kev siv dav hlau tua rog mus tua Cambodia tej yeej tub rog zaum no yeej tua tau raws li siab xav thiab.
Thaib tau hais tias tau muaj 12 tug neeg raug tua tuag ntawm teb chaws Thaib 3 lub xeev, uas 11 tug neeg ntawd yog pej xeem, suav muaj ib tug me nyuam tub hnoob nyoog 8 xyoo nrog. Nomt swv tau qhia tias ua ke no los kuj muaj neeg txog li 31 leeg raug mob rau hnub zwj Teeb (Thursday) thiab.
Tab sis kuj tsis paub tseeb tias Cambodia ho puas muaj neeg tuag los yog neeg raug mob li cas.
Neeg Thaib tau tsiv ntawm tej xwm txheej uas tub rog Thaib thiab Cambodia sib tua mus nkaum ntawm qhov chaw nkaum ntawm xeev Surin nyob sab hnub tuaj qaum teb ntawm teb chaws Thaib. Source: AAP / AP/Sunny Chittawil
"Peb yeej tseem kub siab yuav siv tej xub ke thaj yeeb thiab tsim nyog yuav tau muaj tej kev sab laj sib tham, tab sis tej tau tshwm sim ces yog ib co kev thab plaub kom muaj kev sib chaub chim ces peb yuav tau pov puag thiab tiv thaiv peb tus kheej.''
Raws li Hun Manet tau sau ib tsab ntawv rau teb chaws Pakistan uas tam sim no yog tus tswj UN lub tuam chav tswj kev ruaj ntseg (United Nations Security Council) ces Cambodia tus thawj pwm tsav no tau nqua hu kom rub ib lub rooj sab laj ceev nrooj los sib tham kom xaus tej xwm txheej nws hais tias ''tsis tau thab ib tug twg thiab yog ib co kev kev txhob txwm siv tub rog hawv tawm tsam no'' ces yog Thaib cov kev yuam zejzog pej kum haiv cai.
Ob lub teb chaws no yeej tau npaj rau tej xwm txheej tsis sib haum xeeb no lawm txij li thaum uas tau muaj Cambodia ib tug tub rog raug tua tuag rau yav lig lub 5 hlis ntuj (2025) thaum uas tau muaj cov kev sib tawm tsam, ces thiaj tau ua rau ob tog txheeb tub rog raws tej ciam teb.
Tej kev tsis sib haum xeeb tau muaj tsis ntev los no thiaj yog tej xwm txheej sib tua phem tshaj plaws ntawm ob lub tgeb chaws no rau lub caij 13 xyoos tom qab uas Thaib tau hais kom nwsu tus nom lis teej faj (ambassador) ntawm tuam ceeb Phnom Penh rov qab thiab tau muab Cambodia tus nom no xa rov qab. Tau ua tej xwm txheej no coj los pauj thaum tau muaj Thaib tus tub rog ob raug mee tu taw uas Bangkok tau liam tias yog Cambodia tau caws tsis ntev los no rau ntawm tej ciam teb uas tsis sib haum xeeb uas Cambodia cav tias yog ib co lus iab liam tsis muaj tseeb.
Cov kev tsis sib haum ceeb ciam teb ntau caum xyoo
Thaib thiab Cambodia ces yeej tau muaj cov kev tsis sib haum xeeb rau ntau thaj chaw raws tej ciam teb sib npuab ua ke ntev txog 817km los tau ntau caum xyoo.
Cov kev sib txeeb uas tus tswv lub tsev hauj sam Ta Moan Thom thiab Preah Vihear yog lub chiv keeb ntawm cov kev tsis sib haum xeeb no.
Tau muaj cov kev sib tawm tsam tom qab Thaib tau hais kom nws tus nom lis teej faj (ambassador) rov qab thiab tau hais tias yuav muab Cambodia tus nom no ntawm Bangkok xa rov qab rau yav lig hnub zej Feej (Wednesday). Source: AAP / EPA/Kith Serey
Tej xwm txheej no thiaj tau ua rau muaj kev sib tua rau ntau lub xyoo thiab ua rau muaj neeg tas sim neej yam tsawg tshaj 10 tawm tus.
Lub 6 hlis ntuj ces Cambodia tau hais tias nws tau hais kom ICJ rov qab nrog daws cov kev tsis sib haum xeeb no nrog Thaib. Txawm li cas los Thaib hais tias nws yeej tsis lees paub lub tsev hais plaub no cov kev txiav txim thiab xav kom ob tog los sib tham zoo dua.
Lwm cov teb chaws xav li cas
Ntawm cheeb tsam ntawd (Southeast Asia) ces kuj muaj Philippines thiab Cob tsib (Vietnam) tau nqua hu kom ob tog sib tawm tsam no yuav tau cheem lawv tus kheej, thiab Suav tuam tshoj los kuj tau qhia tias nws yeej txaus siab yuav los ua tus pab tswj tej xwm txheej no.
Teb chaws Meskas uas yog ib lub teb chaws phooj ywg zoo los ntev nrog Thaib los kuj tau nqua hu kom cia li xaus cov xwm txheej sib ntaus sib tua no kiag tam sid.
Tommy Pigott uas yog tus lwm kis ntawm Meskas lub tuam chav tswj dej num txawv teb chaws tau hais tias "Peb yeej txhawj xeeb heev txog tej xwm txheej kub ntxhov loj zuj zus tuaj raws ciam teb Thaib thiab Cambodia no, thiab tu siab heev tias tseem muaj xov xwm qhia tias raug teeb meem rau tej pej xeem thiab,''
"Teb chaws Meskas thiaj nqua hu kom cia li xaus cov kev sib tua no tam sim no kiag tam sim no, tig los pov puag tej pej xeem thiab siv tej xub ke thaj yeeb los daws tej kev tsis haum xeeb no.''
With additional reporting by the Reuters news agency.
