Thawj tug Hmoob tau mus tso art exhibition ntawm teb chaws Australia

Muag paj ntaub Hmo ntuj pab kom ntxawm xyooj tau mus koom art exhibition ntawm teb chaws Australia.

Ntxawm Xyooj yees duab nrog nws daim paj ntaub 3 tug saub Choj Source: SBS Hmong

John McDonald uas yog tus coj tswj Australia tej txuj kos duab ntawm lub koom haum the National Gallery of Australia uas yeej tau tswj ntau txoj hauj lwm tseem ceeb dhau los thiab tau ua tus nrhiav tej duab coj los tso rau sawv daws saib, thiab tseem ua tus neeg tham tawm tswv yim txog tej duab no rau phau ntawv xov xwm Sydney Morning Herald dhau los yog tus tau txais lub meej mom los qhib lub koom txoos tso Ntxawm Xyooj (Tcheu Siong) thiab Savanhdary Vongpoothorn cov duab ntawm lub tsev khaws duab Niagara Galleries rau sawv daws uas qhib txij hnub tim 04 txog tim 29 lub 2 hlis ntuj xyoo 2020 ntawm, zos Richmond, nroog Melbourne teb chaws Australia.

Ntxawm Xyooj cov duab uas nws tau ua dhau los los kuj raug coj mus tso rau tej neeg saib ntawm Singapore Art Museum rau lub koom txoos 2016/17 Singapore Biennale, thiab tau coj mus tso rau tej neeg saib ntawm xeev Queensland lub chaw khaws dua Queensland Art Gallery and Gallery of Modern Art (QAGOMA) rau lub koom txoos tso duab zum 9 hu ua Asian Pacific Triennial of Contemporary Art (APT9)  ntawm teb chaws Australia. Tsis tas li no los Ntxawm cov duab tseem raug coj mus tso rau tej neeg tau saib ntawm lub koom txoos 2019 Asian Art Biennial ntawm teb chaws Taiwan thiab.

Ntxawm Xyooj (Tcheu Xyooj) cov duab uas tau coj mus tso rau sawv daws saib ntawm nroog Melbourne lub chaw tso duab Niagara Galleries no ces yog tau txais kev txhawb nqa los ntawm lub koom haum Spell Brook Foundation, thiab yog Ntxawm thawj cov kev coj nws cov duab paj ntaub mus tso rau tej neeg sib tib heev ntawm teb chaws Australia. Txawm li cas los, kuj muaj Savanhdary Vongpoothorn tau coj nws cov duab mus tso ntawm tib lub chaw tso duab no rau tej neeg sawv daws saib tib yam tab sis tau txais kev txhawb nqa los ntawm lbu chaw tso duab Niagara Gallery no pab nws.

Ntxawm xyooj hais tias kuv xav thov ua tsaug ntau ntau rau Gary Stafford cov kev txhawb nqa, pab cuam es thiaj li muaj peev xwm tso tau cov duab no rau sawv daws saib thiab thiaj tau tuaj pom lub teb chaws Australia no.

Thongsy Xiong and Tcheu Siong posed infront of Ms Siong's art-Chao and the three gods (SBS Hmong) Source: SBS Hmong

Gary Stafford yog ib tug neeg nplua nuj thiab yog tus teeb tsa lub tuam txhab PanAust dhau los uas mus tswj lub tuam txhab khawb kub  Phubia Mining yog tus tau pab nyiaj rau ntau cov koom haum Non-governmental organisations hauv Nplog teb li Spell Brook uas pab koom kho mob nrog lub koom haum COPE thiab Interplast Australia los phais kho tej neeg khis ncauj, thiab lub koom haum Puan Mit (Phooj ywg) uas pov puag Nplog tej me nyuam txoj cai, pab kom lawv muaj cib fim tau kawm txuj ci, xyaum hauj lwm thiab nrhiav tau hauj lwm ua.

Lub koom haum Spellbrook Foundation yog lub tau teeb tsa lub koom haum Elevations Laos. Nws muaj cov hom phiaj xav los txhawb nqa cov txuj kos duab contemporary art no ntawm cheeb tsam teb chaws Southeast Asia kom nthuav dav mus txog rau lwm ceg ntuj, uas nws yeej tau koom tes nrog Nplog lub koom haum National Art Institute thiab. Tab sis qhov tseem ceeb tiag mas yog xav txhawb nqa kom muaj tej neeg tig los kub siab txog fab txuj kos duab, pab kom tej neeg kos duab tau sib hloov tswv yim txog fab txuj kos duab thiab cov kev tso lawv tej duab rau tej neeg saib.

Gary Stafford hais tias kuv xav ua tib zoo xyuas kom tsim tau ib cov duab zoo thiab muaj txiaj ntsim muaj lub ntsiab lus tob thiab zoo, tab sis qhov tseem ceeb tshaj ces yog xav txhawb nqa fab txuj kos duab no.

Ib nqe tseem ceeb ntawm tej hauj lwm no ces dua ntawm lub koom haum Speelbrook cov kev pab cuam nyiaj txiaj rau lub koom haum Elevetions Laos no lawm lub koom haum Spellbrook tseem tau nyiaj pab cuam los ntawm tsoom hwv Australia thiab cov kev pab cuam Australian Aid ntxiv thiab. Lub koom haum Elevation Laos los kuj tau koom tes nrog lub koom haum Global Development thiab STELLA los tswj cov kev npaj tso duab rau tej neeg saib thiab ho muab tej khoom plig rau tej neeg yeej cov kev sib tw kos duab no. Yog li ntawd nws thiaj nyuam qhuav ua tau lub koom haum no rau xyoo 2018 los yog tswj los tau 1 xyoos 6 hli no xwb.

Gary Stafford hais tias tos nws hos los teeb tsa ntau lub koom haum li no los pab Nplog los twb vim yog tom qab ua luam khawb kub los tau ntau xyoo hauv Nplog teb lawm, ces nws xav tsim ib cov kev pab cuam rau lub teb chaws Nplog uas nws tau txais ntau yam txiaj ntsim thiab ho pab Nplog tej neeg zejzog.

Tab sis nws kuj muaj lub hom phiaj xav txhawb nqa tej hluas kom ras los ua cov neeg kos duab (artists) kom ntau tuaj ntxiv thiab kom kub siab los kawm tej txuj no thiab kom tau lag luam rau tej txuj duab no los yog txhawb nqa kom muaj neeg paub txog cov neeg kos duab no kom ntau tuaj ntxiv.

Alistair Charles Maclean, former Australian Ambassador to Laos (2004-2007) posed with Savanhdary Vongpoothorn's art Footsteps to Nagatsudo, Niagara Galleries (SBS Hmong) Source: SBS Hmong

Alistair Charles Maclean uas yog Australia tus nom lis teej faj (Ambassador) dhau los uas ua hauj lwm hauv teb chaws Nplog xyoo 2004-2007 kuj tau mus koom thiab mus saib Ntxawm Xyooj thiab Savanhdary Vongpoothorn cov duab no thiab.

Nws hasi tais lub caij nws tseem ua hauj lwm hauv Nplog teb ntawd ces nom tswv Nplog yeej tseem tsis tau qhib kev dav tab sis tam sim no kuj zoo lawm uas tau pom Nplog tej pej xeem tau mus tso duab txawv teb chaws li ntawm teb chaws Australia no rau sawv daws saib lawm thiab.

Mloog tau cov lus SBS Hmong nrog Gary Stafford thiab Tcheu Siong tham ntawm SBS Radio Office ntawm Melbourne tau ntawm no: https://www.facebook.com/plugins/video.php?href=https%3A%2F%2Fwww.facebook.com%2FSBSHmong%2Fvideos%2F169494621169244%2F&show_text=0&width=560

Ntxawm Xyooj hais tias vim nom tswv Nplog muab Hmoob txwv tsis pub cog yeeb toj siab thiab txom nyem ces nws thiaj tau ua siab los nyob ntawm Luangprabang.

Ntxawm Xyooj hais tias vim kuv yog me nyuam ntsuag txom nyem thiab kuv tus txiv los kuj yog tib tug tub twm zeej ntawm nws tsev neeg xwb thiab, ces kuv thiaj txiav txim siab muab nws cov kev npau suav txog tej ntsuj plig ntau yam raws li Hmoob txoj kev ntseeg coj los xaws ua paj ntaub kom txawv tej muag ntawm Luangprabang ntawd seb ho puas tau me ntsis nyiaj los pab nws tsev neeg.

Vim li no Gary Stafford thiaj li pom tias Ntxawm tej paj ntaub txawv dua lwm tus cov. Ces nws thiaj tau pab txhawb nqa thiab pab coj Ntxawm Xyooj cov duab coj mus tso rau lwm tus saib ntawm Vientiane rau xyoo 2018/19 Exhibition: Depths: Others, Lands , Selves. Nws kuj tau koom tes nrog Nplog lub koom haum National Art Schools los txhawb nqa thiab pab Nplog cov neeg rau fab txuj kos duab no. Ces Ntxawm Xyooj thiaj li tau tuaj tso nws cov duab thawj zaug ntawm teb chaws Australia rau sawv daws saib.

Saib tau Ntxawm Xyooj cov duab ntau diam uas tso rau hauv Niagara Galleries lub vassab tau ntawm Niagara Galleries.

Savaandary Vongpoothorn los kuj yog ib tug poj niam neeg Australia caj ceg neeg Nplog uas tau tsiv teb chaws Nplog rau lub caij xyoo 1979 tuaj nyob rau teb chaws Australia thaum nws tseem yau.

Nws kuj tau kawm tiav qib siab txog fab txuj Visual Art ntawm tsev kawm qib siab Western Sydney University. 

Savanhdary Vongpoothorn yeej yog ib tug neeg uas ntseeg kev cai hauj sam (Budhism), ces nws thiaj tau siv nws cov kev ntseeg no thiab tej kab lis kev cai thiab fab txuj contemporary art los kos nws tej duab.

Txij ntawd los tau li 25 xyoos ua nws yog teb chaws Australia tom qab kawm tiav lawm ces nws kuj tau kos tau li ntawm 50 daim duab lawm thiab.

Tab sis nws cov duab coj los tso rau sawv daws saib zaum no tis npe hu ua 'Broken Sutra'.

Lub chiv keeb tiag yog tshwm sim rau lub caij xyoo 2015 uas nws tau mus xyuas teb chaws Japan cov theem taw ntaiv ntawm lub tsev hauj sam Todai-ji Temple ntawm lub zos Nara nroog Osaka. Thiab tom qab ntawd los kuj tau ntsib nrog ib tug neeg Japanese uas paub kos fab txuj sau ntawv ces txij ntawd los nws kuj tau mus tsim cov duab Broken Sutra ntau daim uas coj los tso rau sawv daws saib ntawm lub tsev khaws duab Niagara Galleries rau hnub tim 04-29.02.2020 no.

Savanhdary Vongpoothorn yees duab nrog nws daim duab Steps to Nigatsu-do (Interlocked wave) ntawm Niagara Galleries, Melbourne, Australia 2020020429 (SBS Hmong) Source: SBS Hmong

Ms Vongpoothorn nrhiav tau tswv yim los tsim tej duab no thaum xyoo 2015 uas nws tau mus xyuas Nigatsu-dō ntawm lub tsev hauj sam Todai-ji Temple ntawm lub zos Nara, nroog Osaka ntawm teb chaws Japan. Ces nws thiaj li los tsim cov duab hu ua Broken Sutra ntau daim coj tuaj tso rau tej neeg saib rau thaum muaj Art Exhibition hnub tim 04-29.02.2020 ntawm nroog Melbourne uas tau txais kev txhawb nqa los ntawm lub chaw tso duab Niagara Galleries.

Broken Sutra (Naga Paths) 2019-acrylic on perforated canvas-Savanhdary Vongpoothorn-Niagara Galleries Source: Niagara Galleries

Saib tau Savanhdary Vongpoothorn cov duab tis npe hu ua 'Broken Sutra' tau ntawm Niagara Galleries.

Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm SBS Hmong Facebook thiab subscribe los sis yog download thiab mloog tau ntau cov podcasts (xov xwm ua suab) ntawm google podcasts, spotify, thiab apple podcasts los yog download SBS Radio App kom koj mloog tau SBS Hmong.