Xov xwm hais txog cov khoom haum Hmoob Thaib tsis txaus siab rau lub koom haum Montagnard Federation Inc:
Hnub tim 25.9.2018 dhau los Nyiaj Tub Lauj kuj tau tawm los tso ib daim video clip tham thiab qhia txog nws tsab ntawv tau xa rau 14 lub koom haum uas yog Charity Navigator, IRSEO Classification, ASEAN Secretary, Prime Minister Government House of Thailand, Office of the National Security, The Royal Thai Embassy in Washington DC, Embassy of Lao PDR in Washington DC, Royal Thai Army Headquarter, US Department of Homeland Security, Hmong Association of Thailand, Hmong 18 Council Corporation Inc St Paul MN, Hmong 18 Council of Wisconsin Inc, Hmong 18 Council Coordination of America, The United Nation Headquarter, New York. Thiab Nyiaj Tub Lauj tau xa cov ntau ntawv no rau tej chaw hais dhau los no lawm, vim nws xav tias Hmoob lub npe raug coj mus siv yam tsis tsim nyog, txawm tias Nyiaj Vaj tau tawm los cej luam thiab tshab txhais tias tsuas yog cov kev teeb tsa ib tug coj rau lub koom haum Montagnard xwb.
Lub hom phiaj uas nws xa tsab ntawv no rau tej koom haum no vim yog tim lub koom haum Montagnard Federation Inc nrog rau Thai Highlanders thiab Thaib tus hau rog Anouthat lawv tau siv lub fwj chim cuam tshuam txog fab laj fai kum xeeb, cuam tshuam txog lub fwj chim, kev nom kev tswv thiab kev ruaj ntseg ua kam teb kam tebchaws raws li Nyiaj tub lauj tau hais. Yog li ntawd nws thiaj li tau xa tsab ntawv uas nws qhia rau daim video clip no rau 10 tawm lub koom haum li tau teev los saum toj no tias yuav ua rau muaj teeb meem rau Hmoob lub koob lub npe.
Nyiaj Tub Lauj tseem tau qhia ntxiv tias tau muaj ib tug ntxhais Thaib tau nug Nyiaj Vaj hauv Bangkok ces nws qhia meej tias tsuas yog teeb tsa tus coj ntawm ib lub koom haum xwb uas cov nyom rau cov lus nws tau qhia rau Suab Hmoob tias yog teeb tsa Willis Bird los ua Hmoob tus vaj saub uas muaj hwjhuaj taw rau leej twg kom ciaj ces ciaj kom tuag ces tuag ntawd.
Ntxiv ntawd Nyiaj tub lauj kuj tau tham txog ntau yam teeb meem cuam tshuam txog yaj yeeb txhaum cai, cov kev yuav muab cov neeg Nplog thiab neeg Hmoob xa rov qab thiab tham txog lub koom haum Montagnard nrog nws tus local congressman rau hnub tim 28.09.2018 dhau los no thiab.
Tab sis thaum mus txheeb xyuas lub koom haum Montagnard Federtion Inc no lub zeem muag lawm ces tsuas yog txhawb nqa kom muaj kev thaj yeeb nyab xeeb thiab muaj kev vam meej tawg paj txi txiv rau cov pawg neeg tsawg. Nws muaj 5 yam hauj lwm tseem ceeb xwb lis pab kom cov pawg neeg tsawg ntau tsav neeg uas muaj Hmoob nrog tau txais kev kawm, muaj noj muaj haus, tau dej num zoo ua, tswj tau lawv tej kab li kev cai thiab tau txais kev noj qab nyab xeeb.
Nyiaj Vaj tau sau ib sob lus rau nws lub vam sab (website) montagnardfederation tias "peb qhia kom tej neeg paub mus txhom ntses los noj lawm xwb tsis yog coj ntses mus rau lawv noj."
Hnub tim 09/09/2018 no ntau lub koom haum pawg neeg tsawg (Ethnic communities) ntawm Thaib teb uas muaj Hmoob nrog thiab tau sab laj tawm tswv yim tias seb yuav ua li cas los daws tej teeb meem muaj Hmoob tau teeb tsa Huab tais Hmoob ntawm Thaib teb uas yuav ua rau muaj teeb meem rau ntau pawg neeg li hais no thiab cov lus uas Yodying Sanyakul uas yog tus coj lub koom haum Hmong Bangkok Network and Associate tau nrog Hmong Thaib Association thiab Hmoob cov koom haum ntseeg Christian tau tawm los hais ib cov lus li hauv qab ntawm video clip no:
Tau muaj xov xwm cej luam qhia los ntawm ntau lub koom haum Hmoob hauv Thaib teb uas muaj Hmong Thailand Association thiab Hmong Bangkok Network and Associate, cov koom haum Hmong Christian thiab lub koom haum tub kawm Hmoob Ratchapart tau koom sau ib tsab ntawv cej luam tsis pom zoo rau lub koom haum Montagnard Federation Inc los teeb tsa ib tug huab tais sawv cev rau Hmoob ntawm Thaib teb thiab tau hais kom lub koom haum no cia li los thov txim rau tej dej num nws ua no.
Saib tau tsab ntawv sau ua lus thaib uas Yongyuth Surbthaya uas yog tus coj lub koom haum Hmoob nyob Thaib teb (Hmong Association of Thailand) tau tso rau nws personal facebook page rau hnub tim 4 lub 9 hli ntuj xyoo 2018 dhau los no raws li daim ntawv ntawm no:
Tam sim no yeej tseem tsis tau muaj cov neeg ntawm lub koom haum no tawm los hais dab tsi. Thiab raws li xov tooj cua SBS Radio Hmong Program tau hu nrog Willis Bird uas yog tus coj lub koom haum Thai Highlander Foundation ntawm Thaib teb tham ces nws tsis kam tawm tswv yim dab tsi rau cov lus cov nyom tsis pom zoo ntawm ib txhia Hmoob uas pom tias tau muaj lub koom haum Montagnard tau muab nws teeb tsa ua huab tais Hmoob.
Nws hais tias leej twg los yeej xav tsa tus twg ces lawv tsa lawv xwb tab sis nws tsuas yog los ua tus tswj lub koom haum no pab Hmoob los tau 40 lub xyoo no xwb tsis muaj lub hom phiaj yuav ua lwm yam raws li tau muaj ib txhia liam tias yuav ua rau Hmoob puas koob npe.
Ntxiv ntawd Tom qab Suab Hmoob tau cej luam cov xov xwm txog lub koom haum Montagnard Federation Inc thiab tau nrog tsoom thawj coj ntawm lub koom haum no tham ua ntuv zus los, thiaj tau muaj Nyiaj Tub Lauj tau tawm los tsim ib cov video tib thiab tsis pom zoo rau Nyiaj Vaj uas yog tus tswj lub koom haum no uas tau teeb tsa Willis Bird los ua Hmoob tus huab tais.
Saib tau Nyiaj Tub Lauj daim video uas nws muab ntawm Suab Hmong News coj los txiav thiab txuas tham txog kev teeb tsa Hmoob tus Huab tais thiab nws cov kev tsis txaus siab tau ntawm nod:
Ces txij ntawd los thiaj tau muaj neeg tau kaw videos thiab tau tawm los hais lus tso rau social media tsis txaus siab rau Nyiaj Vaj tias uas li cas nws yuav tsa huab tais ho tsis tsa Hmoob los ua los yog muab nws tsa ua kiag ho muab tus meskas no tsa los ua, thiab yog ib cov kev ua rau Hmoob puas koob npe, lwm tus kuj tau cem thiab thuam tsis pom zoo nrog Nyiaj Vaj lub tswv yim no thiab cav tias yuav ua rau cov kwv tij Hmoob ntawm Thaib teb thiab Nplog teb raug teeb meem vim cov kev teeb tsa huab tais txhaum txoj cai nqe 112 uas thuam thiab saib tsis tau Huab tais Thaib thiab yuav ua rau cov kev tij Hmoob ntawm lub teb chaws no raug teeb meem.
Ib txhia kuj tsis txaus siab tias Hmoob tsis hais nyob lub teb chaws twg twb raug ua lwm haiv neeg qhev los tau ntau txheej ntau tiam lawm ces ua li cas tseem yuav los teeb tsa mab sua los ua Hmoob tus huab tais ntxiv, yog li yuav txog thaum twg Hmoob mam li dim ntawm txoj kev ua mab sua qhev.
Lub tsam thawj no raws li Nyiaj Tub Lauj (Nhia Tou Lor) tau sib txuas lus nrog tsoom coj tseem ceeb ntawm Hmoob cov koom haum ntawm Thaib teb tseem yuav los sab laj seb yuav ua li cas txuas ntxiv tab sis lawv yeej tau tawm ib tsa ntawv tsis pom zoo rau Nyiaj Vaj cov kev teeb tsa Hmoob tus Huab tais no lawm.
Saib tau cov lus li Nyiaj Tub lauj tau hais ntawm nod
Hnub tim 15 lub 9 hlis ntuj dhau los no, Richard Wanglue Vang ntawm Suab Hmong News kuj tau rov qab nrog Nhia Vang uas yog tus teeb tsa lub koom haum Montagnard Federation Inc uas tseem nyob ntawm Thaib teb tham dua thiab nug kom nws tshab txhais tias lub koom haum Montagnard lub hom phiaj yog li cas tiag thiab nws ho xav li cas rau tej lus tib tsis pom zoo rau nws cov kev xaiv tus vaj ua rau ib txhia Hmoob tsis txaus siab no.
Ces Nyiaj Vaj tau teb tias tsuas yog ib cov neeg tsis paub tab thiab tsis totaub txog nws lub koom haum cov homphiaj es thiaj ntaus nqe yuam kev xwb. Nws tsis xav li cas thiab yeej zam txim rau cov neeg tsis paub thiab tseem totaub yuam kev no tias yog tej yam lawv tsis tau pom dua. Thiab yog ib cov mission impossible, tab sis tsis tau txhais tias nws yuav ua tsis tau vim mab sua yeej ua tau thiab.
Nws muab cov neeg tsis txaus siab piv tias yog cov me nyuam yaus tsis tau kawm ntawv dua yog tias yus cia li mus qhia zauv (mathematics) thiab chemistry rau ces yeej tsis totaub los sis yog cov neeg uas tsis muaj txuj txaus ces yuav tsis txais kawm hauv tsev kawm qib siab. Nws yeej tau ua hauj lwm cuam tshuam txog fab kev qhia ntawv los tau 30 xyoo thiab paub tias tej txheej txheem ntsib thiab cuag nom tswv los yog teeb tsa koom haum zoo li cas lawm.
Nyiaj Vaj hais tias "Hmoob yeej tseem coj ib co cuj pwm lauj thau vim lawv tseem tsis tau totaub zoo txog nws lub koom haum tej hom phiaj xwb".
Nws tseem qhia tias cov koom haum Hmoob Thaib thiab cov pawg neeg tsawg daim video uas tau tawm los qhia tias lawv tsis pom zoo no dag xwb. Thiab nws yeej xav mus nrog cov pawg neeg no tham tab sis yeej tsis pom lawv hu nws mus nrog lawv sib tham los yog kom nws mus koom li nws yeej xav mus nrog cov neeg no tham kom totaub zoo tshaj ntxiv.
Nyiaj Vaj kuj tau hais ntxiv tias nws lub koom haum yeej tau txais kev txhawb nqa los ntawm tej neeg tseem ceeb hauv Thaib teb thiab yeej tau ua raws koom haum nraj nrig tim koom haiv (United Nations-UN) thiaj yeej muaj cai ua tau hauj lwm ntawm teb chaws Thaib raug cai.
Cov kev tsa ib tug vaj rau nws lub koom haum tsis yog yuav tsa rau Hmoob tab sis yog tsa sawv cev rau nws lub koom haum Montagnard Federation Inc xwb. Nws lub hom phiaj yog ntaus kev phooj ywg nrog ntau pawg neeg tsawg thiab ntau lub teb chaws kom sib cuag tau nrog tsoom nom tswv tseem ceeb ntawm ntau lub teb chaws kom los nrog xyuas kom tau txais vaj huam sib luag rau cov pawg neeg tsawg xwb.
Yog li nws thiaj tau hais tias tsis txhob ntau nqe yuam kev rau tej neeg tseem totaub yuam kev rau nws lub khoom haum, thiab nws yeej zam txim rau tej neeg no. Thiab saib rau kis zoo uas tsuas yog tej neeg no pab kom muaj neeg coob ntxiv tuaj paub txog nws lub koom haum tias yog ua dab tsi tiag xwb.#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab www.sbs.com.au/hmong rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store https://apple.co/2pLgvCX thiab ntawm Google Play http://bit.ly/2GuIRv los yog download xov xwm kaw ua suab (Podcasts) ua lus Hmoob thiab lus Askiv tau ntawm www.sbs.com.au/podcasts/yourlanguage/hmong los sis tuaj koom ua tub koom siab thiab koom mloog tau tau ntawm #SBSHmong lub Facebook page www.facebook.com/sbshmong tau.
