Tam sim no ces tej neeg thoob NSW muaj peev xwm rub tau lawv cov ntawv pov thawj hno tshuaj COVID-19 vaccine (COVID-19 vaccination proof) los tso rau hauv lub Services NSW app es kom thaum lawv tau mus rau ntau cov chaw thiaj muaj peev xwm teev tseg, rau lub caij uas ze rau qhov lub xeev no twg yuav rov qab qhib ua theem 2 lawm.
Victor Dominello uas yog tus pwm tsav tswj cov dej num Customer Services tau qhia meej rau hnub zwj Kuab (Friday) tias tam sim no muaj peev xwm rub tau daim COVID-19 digital vaccination certificate los tso rau hauv lub Service NSW app lawm.
Txhais tau tias tej neeg uas tau hno tshuaj vaccine txwm ob koob lawm muaj peev xwm qhia tau lawv daim ntawv pov thawj hno tshuaj vaccine rau tej neeg ua hauj lwm thaum lawv mus rau ib qho chaw qhov twg.
"Cov digital services no pab kom tau txais kev yooj yim zog rau tej lagluam thiab tej customers ntawm NSW rau lub caij peb rov qab qhib."
“Txawm tias tseem yog ib cov kev xaiv seb tej neeg puas tso lawv daim ntawv pov thawj hno tshuaj vaccine (COVID-19 digital certificate) rau hauv lub Service NSW app xwb los, yeej yog ib txoj xub ke yoojj yim tshaj plaws thiab sai tshaj plaws kom qhia tau tias yus tau hno tshuaj vaccine txwm ob koob lawm."
Tau lis tej hauj lwm no tom qab tau xub sim nrog tej clubs, tej tsev laus thiab tej taxis ntawm tej zos cheeb tsam uas muaj cov zos li Port Macquarie, Tamworth, Wagga Wagga thiab Lismore lawm.
Tsoom fwv hais tias lub app no yeej muaj ib cov kev tswj kev ruaj ntseg kom tej tub ceev xwm los yog tej lagluam txheeb xyuas thiab qhia tau cov ntawv pov thawj no.
Thiaj li tau coj cov hauj lwm no los tshaj qhia rau lub caij hau xeev Dominic Perrottet tau qhia meej lawm tias yuav tshem qee cov kev txwv pib txij hnub zwj Hli (Monday), ces tom qab ntawv tsis ntev lub xeev no xav tias yuav muaj neeg hno tshuaj vaccine txwm ob koob txog 80% lawm.
Yuav tsis txwv tias pub tej qhua coob npaum li cas koom tau tej rooj tshoob thiab tej ntees lawm, thiab yuav tso cai rau 20 tus qhua mus xyuas ib tsev neeg twg lawm.
Tso cai rau zej tsoom koom tau kev sib tw, tsis hais kom tej neeg siv ntaub npog qhov ncauj ntawm tej chaw ua hauj lwm lawm, thiab yuav rov qab pub tej neeg haus dej haus cawv thaum tseem sawv ntsug thiab pub tej neeg seev cev sab hauv ib qho chaw twg lawm.
Tab sis yeej tseem tsis tau pub tej neeg Sydneysiders mus ncig tej zos toj siab mus txog ntua hnub tim 1.11.2021 diam. Nom tswv tau qhia meej rau hnub zwj Kuab (Friday) tias, tej neeg ntoj ncig pej kum haiv uas yeej tau hno tshuaj vaccine txwm ob koob lawm yuav muaj peev xwm mus xyuas tau lub xeev no txij hnub ntawd mus yam tsis tas cais lawv tus kheej ntxiv lawm.
Nod yog cov xub ke yuav teeb koj daim digital certificate li cas thiab ntxiv li cas rau lub Services NSW app.
Nrhiav koj daim COVID-19 digital certificate
Tom qab uas koj tau hno 2 koob tshuaj COVID-19 vaccine lawm, ces koj yeej muaj peev xwm mus txheeb xyuas koj cov keeb kwm hno tshuaj "Immunisation History Statement" los yog daim COVID-19 digital certificate ntawm lub koom haum Australian Immunisation Register (AIR).
Uas koj muaj peev xwm siv koj cov Medicare hauv koj phau myGov account.
Cov kev yuav mus txheeb koj daim certificate online, ces koj yuav tsum tau sign in koj phau myGov account, thiab txuas koj phau Medicare online account. Ces mam xaiv "Proof of COVID-19 vaccination" link, ces tom qab ntawd mus saib "View history" thiab koj lub npe kom saib tau koj daim ntawv pov thawj.
Yog tias koj siv lub Express Plus Medicare app, los koj yeej muaj peev xwm saib tau koj daim certificate thiab, tab sis koj yeej tseem yuav tau siv myGov thiab Medicare online accounts thiab.
Thiab yuav siv sij hawm li ntawm 10 hnub mas thiaj mam teev koj cov kev hno tshuaj vaccine nrog lub koom haum AIR.
Tom qab ntawd ces koj thiaj khawv tau daim digital certificate rau rau hauv koj lub smartphone wallet qhia rau lwm tus tias koj tau hno tshuaj vaccine lawm.
Tso koj daim digital COVID-19 vaccination certificate nrog lub Service NSW app
Thaum uas pom koj cov keeb kwm hno tshuaj vaccine hauv lub Express Plus Medicare app, lawm ces mus nyem qhov tias "Share with check in app", ces xaiv "Service NSW" thiab ua raws li cov txheej txheej hais kom koj ua.
Tom qab ntawd ces long in rau lub Service NSW app thiab ua raws li cov txheej txheem taw qhia kom ntxiv tau koj daim digital certificate rau koj phau profile. Tab sis koj yuav tsum tau rub lub app tshiab tshaj plaws los siv thiaj ua tau li hais no.
Tej zaum koj kuj yuav tau xaiv "show more" kom thiaj qhia tias seb koj puas muaj daim ntawv pov thawj raug cai thaum koj check-in.
Qhiab koj kev hno tshuaj vaccine yam tsis muaj xov tooj ntawm tes
Yog tias koj tsis siv ib lub xov tooj ntawm tes, los koj yeej muaj peev xwm ua raws li tib co txheej txheem no ntawm myGov thiab siv koj phau Medicare online account los tau.
Hos lwm txoj xub ke ces, koj muaj peev xwm luam daim digital certificate ntawm koj tsev los tau.
Los yog koj muaj peev xwm hua rau lub koom haum Services Australia raws tus zauv xov tooj 1800 653 809 thiab thov kom lawv xa ib daim tuaj rau koj los tau. Tsuas siv sij hawm 14 hnub xwb ces xa tuaj txog koj lawm.
Qhiab txog cov kev hno tshuaj vaccine yam tsis tas siv Medicare
Txawm tias koj tsis muaj cai siv Medicare, los koj yeej tseem muaj peev xwm thov tau thiab faib tau koj daim COVID-19 digital certificate thiab. Tab sis koj yuav tsum muaj tus Individual Healthcare Identifier (IHI) number, uas koj muaj peev xwm thov tau ntawm myGov.
Txuas ntxiv ntawd ces koj ua raws tib co txheej txheem li tau hais los ntawd kom koj muaj peev xwm saib tau koj daim certificate thiab tso tau nrog rau lub Services NSW app thiab.
With AAP
