Yeej tseem tsis tau lig uas koj mus hno tshuaj vaccine tiv thaiv kab mob khaub thuas rau lub caij uas tab tom tseem muaj neeg ''coob heev'' kis tau khaub thuas coob heev ntawm Australia no.
Yeej tau kwv yees tias yuav muaj lub caij khaub thuas hauj sim txog theem nrab xwb tab sis ib tug kws paub zoo txog kab mob sib kis tau ceeb toom txog tej neeg cov kev tsis kub siab txog tus mob no.
Raina MacIntyre uas yog ib tug zes kais (Professor) uas qhia txog cov kab mob sib kis ntawm tsev kawm qib siab UNSW hais tias, kab mob khaub thuas yeej ib txwm ua rau tej neeg mob sab heev, yog li thiaj xav kom sawv daws yuav tau mus hno tshuaj flu vaccine pov puag yus tus kheej kom sai npaum li sai tau.
Professor MacIntyre tau hais tias "Peb yeej pom tej neeg tas sim neej tas mus li thiab raug coj mus kho ntawm tej tsev kho mob vim kis tau khaub thuas, thiab yeej muaj qee xyoo ces yeej mob sab dua lwm xyoo,"
"Yus yeej tseem muaj peev xwm hno tau tshuaj vaccine rau lub caij khaub thuas no, thiab yeej tseem tsis tau lig,''
Txawm tias lub caij khaub thuas no yeej yog lub 7 hli ntuj thiab 8 hli ntuj xwb los twb yeej tab tom yog lub caij sib kis khaub thuas ntawm Queensland lawm.
Queensland lub tuam chav tswj dej num noj qab haus huv tsab ntawv cej luam Influenza Surveillance Report qhia tias xyoo no xwb twb muaj neeg coob tshaj 4200 tus neeg kis tau khaub thuas lawm - ua yog muaj neeg kis tau coob tshaj 300 leej piv rau ib lub caij li no tsaib no lawm.
Thiab yeej muaj tej neeg coob tshaj 500 tus tau raug coj mus kho ntawm tej tsev kho mob.
Txawm li cas los kuj muaj lub caij khaub thuas qee zog ntawm New South Wales (NSW).
Tej xov xwm tau los ntawm NSW lub tuam chav tswj dej num noj qab haus huv (NSW Health) qhia tias txij thaum pib lub 4 hlis ntuj los no twb muaj neeg kis tau khaub thuas txog 658 leej ntawm NSW lawm yog piv rau tej tau kis tib lub caij tsaib no.
Dr Vicky Sheppeard uas yog tus coj uas tswj kab mob sib kis ntawm NSW Health hais tias "Tseem muaj neeg kis tau khaub thuas tsawg ntawm NSW, thiab tam sim no los zoo li yeej tsis tau muaj lwm qhia tias tau pib lub caij khaub thuas ntxov."
Raws li lub koom haum Immunisation Coalition hais ces yogxam thoob teb chaws lawm, ces twb tau muaj neeg txog li ntawm 13,000 tus yog cov kis tau khaub thuas lawm.
Tsis tas li ntawd los kuj muaj neeg kis tau khaub thuas sib xws li tau teev tseg cia tsaib no ntawm South Australia, thiab kuj muaj tej xov xwm qhia tias tab tom muaj neeg kis tau khaub thuas coob tuaj ntxiv ntawm xeev Victoria.
Txawm li cas los yeej tseem muaj neeg kis tsawg ntawm xeev Western Australia (WA) thiab Tasmania (TAS).
Ces hom khaub thuas Influenza B thiab Influenza A (H1N1) sib xyaws thiaj yog ho ua rau tej neeg mob ntawm Queensland, tab sis kuj muaj hom H3N2 thiab uas yog cov uas rau muaj tej neeg kis tau hom khaub thuas no tas sim neej coob heev tsaib no.
Professor MacIntyre thiaj tau hais tias ''tej zaum kuj yuav muaj kev pauv hloov thiab yeej tseem ntxov heev yuav qhia tau tias seb lub caij kis khaub thuas ntawm haiv neeg no yuav muaj ceem npaum li cas.''
Nws tau hais ntxiv tias "Feem ntau mas yeej muaj kev pauv hloov rau tej peb pom rau lub caij kis khaub thuas ntxov thiab, piv txwv li thaum tseem ntxov uas muaj kab mob kis thoob ntuj xyoo 2009 ntawd ces peb kuj pom muaj tus kab mob khaub thuas H3N2 thiab muaj hom khaub thuas flu B me ntsis tab sis tom qab ntawv ces txawm muaj tus mob uas kis coob no kis rau tej neeg coob tshaj plaws lawm."
Mloog tau SBSHmong, rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Googlepodcasts, Spotify thiab Apple podcasts los yog download SBS Audio App thiab SBS Hmongpodfollow
kom koj mloog tau SBS Hmong.
