Cov kev nces tej kab theem pab tshiab no thiaj yuav ua rau muaj tej tswv tsev thiab tej neeg xav yuav tsev txhawj xeeb. Tej cuab yig uas twb muaj tej nqe hluav taws xob thiab nqe gas uas kim yuav tau them lawm tseem yuav ntsib teeb meem nyuaj ntxiv rau lub caij ntuj no nod ntxiv thiab. John Robertson uas yog tus coj lus koom haum Foodbank ntawm New South Wales thiab ACT hais tias muaj ib txhia cuab yig ces twb tsis muaj peev xwm yuav tau qee yam khoom tseem ceeb coj los siv lawm.
Robertson hais tias "Peb yeej pom ntau cov cuab yig uas tab tom txiav txim siab hno 2 plua hno tsis noj 3 pluas hno lawm vim lawv tseem yuav tau siv tsev neeg tej nyiaj ua lwm yam thiab.''
Thiab nws hais tias tej koom haum pab cuam uas twb tsis tshua muaj peev xwm pab tau sawv daws lawm los tseem tab tom ntsib teeb meem nyuaj rau tej kev xav tau kev pab cuam ntau tuaj ntxiv thiab.
Robertson rov qab hais ntxiv tias "Peb yeej tau npaj cov pluas mov ntau tuaj ntxiv ntawm 6 million pluas ua 9 million pluas rau ib lub hlis twg lawm, thiab yog tej yam txaus tu siab kawg uas txog rau thaum xaus xyoo no ntshe tseem yuav tau npaj kom ntau zuj zus tuaj ntxiv thiab. Vim yog tej yam tsis yooj yim uas tej neeg coob heev yuav muaj peev xwm yuav tau zaub mov los noj rau lub caij tej nqe siv ua lub neej uas tau kim tuaj no lawm.’’
Yeej tau muaj tej tswv tsev ze txog li ntawm 3.5 million tus thoob Australia no, uas feem ntau yog cov rau teeb meem los ntawm cov kev nce kab theem paj ntawm 0.35 feem puas mus ua 0.85 feem pua, uas yog cov kev nce kab theem paj ntau tshaj plaws txij li xyoo 2000 los no, thiab tsuas yogi b cov kev nce ntau ntau cov uas tau nce xwb. Tau muaj ib co ncauj lug ntawm Phillip Lowe uas yog tus tswj lub Reserve Bank hais tias yeej muaj ntau yam ntawm pej kum haiv los yog hauv teb chaws uas tau ua rau nyiaj poob nqe. Jim Chalmers uas yog Australia tus nom tswj nyiaj txiaj rau tsoom fwv hais tias tej xwm txheej no tseem yuav phem tshaj no ntxiv ua ntej yuav rov qab zoo tuaj.
Chalmers hais tias "Tau muaj tej nuj nqes siv ua lub neej ua kim heev no rau lub sij lawm 10 xyoo no, thiab siv sij hawm ntev tshaj li ob limtiam nrab mam li ib nyuag khees me ntsis – peb yeej tau qhia qhib siab hlo rau sawv daws txog tej no."
Australia lub txhab nyiaj haiv los yog Reserve Bank of Australia (RBA) kwv yees tias tej nyiaj poob nqe uas poob txog 5.1% tam sim no, ntshe tseem yuav poob nqe ntxiv xyoo no ua ntej mam rov qab nqes los ua li 2 los yog 3 feem pua rau xyoo tom ntej no. Ces thiaj ua rau tej nqe siv ua lub neej kim tuaj, uas muaj tej nqe hluav taws xob thiab tej nqe khoom noj khoom haus kim tuaj. Tus nom tswj nyiaj txiaj nok kuj tau hais tias tus kab theem paj uas kim tuaj no haj yam yuav ua rau nyuaj dua rau tsoom fwv yuav them tej nuj nqes thiab
Chalmers hais tias "Cov kev txiav txim siab hnu no yuav ua rau muaj teeb meem rau tej cuab yig tej nyiaj siv, thiab yuav ua rau yuav tau siv nyiaj ntau mus them nyiaj puag xyoo tej nuj nqes ntau trillion dollars."
Opposition Treasury spokesman Angus Taylor hais tias txhais tau tias tus tsoom fwv tshiab no yuav tsum kub siab tsis txhob siv nyiaj ntau.
Taylor hais tias "Qhov tseem ceeb tshaj plaws uas ib tug tsoom fwv muaj peev xwm ua tau coj los tswj cov kab theem paj thiab tswj kom nyiaj tsis txhob poob nqe ces yog yuav tau tswj nws cov kev siv nyiaj.''
Tab sis thawj pwm tsav uas tseem mus xyuas teb chaws Indonesia kom kho tau kev sib raug zoo nrog teb chaws Indonesia tau tsis pom zoo nrog cov lus tawm tswv yim ntawd.
Albanese hais tias "Jim Chalmers mam li teb seb yuav ua li cas; Kuv yeej tau npaj tau ib tsab cai thiab kuv yeej tau hais rau kuv thawj cov kev mus xyuas tias kuv yeej yuav ua raws tsab cai ntawd thiab yuav tsis tawm tswv yim dab tsi txog tej hauj lwm hauv teb chaws rau lub caij mus txawv teb chaws.''
Ib cov teeb meem tseem ceeb rau lub caij nrhiav suab xaiv nom ntawd thiaj li raug cov qab coj los tham txog dua – Lub koom haum Australian Council of Trade Unions ((ACTU)) thiaj tab tom rov qab hais kom nce nyiaj hauj lwm kiag tam sim no coj los pab daws tej nuj nqes ua lub neej uas kim tuaj no. Lub koom haum Fair Work Commission tseem yuav los qhia txog nws cov kev txiav txim siab nce nyiaj hauj lwm minimum wage yav lig rau lub hlis no thiab tsoom fwv yeej tau sau ib dai ntawv mus rau lub koom haum no, txhawb nqa kom nws nce tej nyiaj hauj lwm sib npaub li tus nqe nyiaj poob nqes uas nce tuaj no thiab. Sally McManus uas yog tus coj lub koom haum ACTU hais tias tej zaum cov kev nce nyiaj hauj lwm rau ib co neeg ua hauj lwm khwv tau nyiaj tsawg tshaj plaws kuj yuav pab tau tej lagluam kom rov qab zoo tuaj thiab.
McManus hais tias "Tej statistics los yeej qhia tias txhua cent tej neeg ua hauj lwm khwv tau nyiaj tsawg siv yeej yog siv rau tej yam tseem ceeb xwb thiab lawv siv pab lawv tej zejzog xwb, yog tias lawv siv nyiaj tsawg lawm ces kuj yuav ua rau tej lagluam zejzog tau nyiaj tsawg.''
Tab sis tej economists, uas muaj Sarah Hunter ntawm lub koom haum K-P-M-G, los kuj hais tias cov kev nce nyiaj hauj lwm siab heev kuj yuav ua rau tej nyiaj poob nqes ntxiv thiab.
Hunter hais tias "Tej nyiaj minimum wage ntawm haiv neeg no, uas peb yuav tau rau ntau limtiam ntxiv no, tej xwm txheej uas tau muaj rau tej lagluam ntiag tug, thiab tam sim no ces peb tseem yuav tau muaj cov kev sib khom pom zoo ntawm tej koom haum unions nrog tej tswv lagluam thiab: tag nrho tej hais no yog tej yuav ua rau tej nyiaj hauj lwm loj hlob tuaj ces yuav coj los siv them ntau yam nqe thiab tej nyiaj poob nqes.''
R-B-A los yeej hais tias ntshe nyiaj tseem yuav poob nqe ntau tshaj no ntxiv thiab, txhais tias yuav ua rau muaj teeb meem nyiaj txiaj nyuaj tuaj ntxiv rau ntau hli ntxiv tom ntej no thiab.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Google podcasts, Spotify, thiab Apple podcasts los yog download SBS Radio App kom koj mloog tau SBS Hmong.
