Tsoom hwv Australia xav tau zej tsoom cov kev tawm tswv yim coj los kho Australia cov visa system raws li nws cov cai Policy Consultation Paper - Visa Simplification: Transforming Australia’s Visa System.
Tsis tas li no los Australia lub tuam chav lis laj fai neeg tsiv teb tsaws chaw thiab pov puag ciam teb (The Department of Immigration and Border Protection) lub vam sab website los kuj tau hais kom zej tsoom xa ntawv tawm tswv yim mua pab kho Australia cov visa system kom vam meej thiab kom siv tau cov visa no pab rau lub tebchaws Australia tej lagluam, pab zejtsoom los yog pab kom Australia tau txais txiaj ntsim. Yog li tam sim no thiaj muaj neeg xa cov ntawv tawm tswv yim txog li ntawm 500 tsab rau tsev tsoom hwv lawm.
Rau qhov lub tuam chav no tau hais tias cov visa system no qub heev thiab siv tsis tau rau yav pem suab lawm thiab sib chab sib chaw heev ces nws thiaj xav muab txo ntawm 99 hom visa los siv li ntawm 10 hom visa lawm xwb.
Nws kuj tau hais ntxiv tias vim cov visa no sib chab sib chaw heev ces thiaj ua rau tsis tshua muaj neeg xav tuaj ncig xyuas teb chaws Australia, tsis hais cov tuaj ib ntus los yog cov tuaj nyob ntev ces thiaj ua rau Australia plam txiaj ntsim. Ces thiaj xav kom cov visa no pab tau Australia cov kev lagluam, pab txhim teb kho chaw thiab tsis muaj teeb meem pheej hmoo rau nws txoj kev ruaj ntseg thiab tsis xav kom muaj kev sib chab sib chaw tswj tsis tau yooj yim thiab yuav tau siv nyiaj ntau los lis tej dej num no.
Nqe tseem ceeb uas xav txo cov visa no ces yuav los xyuas cov visa tuaj nyob ib ntus thiab tuaj nyob ntev. Thiab yuav kom cov neeg yuav tau tos ib ntus ua ntej lawv yuav muaj peev xwm thov tau cov permanent residency ntawd los yuav pab kom nom tswv tsis txhob siv tej nyiaj sau se los xyuas tej dej num no.
Yog li no nqe lus tias puas tsim nyog cov neeg xav nyob ruaj hauv Australia no yuav tau tos ib ntus mam muaj cai los thov tau cov visa nyob ruaj ntawd thiaj yog ib nqe lus nug tseem ceeb uas tsoom hwv yuav los txheeb xyuas.
Vim rau qhov cov tebchaws li Askiv (United Kingdom-UK), nrog rau the Netherlands thiab US (America) ntawd yeej muaj cov txheej txheem meej tseeb los txheeb xyuas tej neeg uas xav thov nyob ruaj rau lawv cov tebchaws, tab sis Australia tseem tsis tau muaj.
Yog li no Australia lub tuam chav lis laj fai neeg tsiv teb tsaws chaw thiab pov puag ciam teb (The Department of Immigration and Border Protection) thiaj xav tau zej tsoom cov kev tawm tswv yim los nrog kho Australia cov visa uas lawv xav paub tias:
- Xav kom cov visa system uas siv 10 cov visa no zoo li cas xwb?
- Yuav siv cov txuam thawj (factors) dab tsi los kho kom cov visa system no siv tau yooj yim?
- Tsim nyog yuav muaj cov yam ntxwv zoo li cas thiaj qhia tau tias yog ib cov siv tau yooj yim?
- Tsim nyog xav kom cov visa thov tuaj nyob ib ntus (Temporary visa) thiab nyob tau ruaj (Permanent visa) sib txawv li cas?
- Cov neeg tsiv teb tsaws chaws uas xav nyob ruaj hauv tebchaws Australia yuav tsum yog cov neeg zoo li cas thiaj muaj cai thov tau nyob ruaj hauv Australia?
- Puas tsim nyog cov neeg xav thov nyob ruaj hauv Australia yuav tau tos ib ntus tso mam muaj cai los thov cov permanent visa kom tau nyob ruaj thiab nom tswv yuav tau los txheeb xyuas dab tsi?
- Cov visa system no ho muaj lub luag hauj lwm tseem ceeb dab tsi thiaj yuav los pab kom nrhiav tau tej neeg muaj txuj tes thiab tshaj lij txawj ua hauj lwm tsis hais cov tuaj ib ntus los yog tuaj nyob ruaj? Koj puas xav tias cov visa system totaub tau yooj yim thiab muaj peev xwm yuav qhia tau tias seb puas muaj teeb meem pheej hmoo dab tsi puas yuav pab kom muaj neeg tuam xyuas Australia ntau ntxiv? Yog vim li cas?
- Thiab tsim nyog tsoom hwv Australia yuav khaws tej xov xwm teev taub teg thiab xoo cov ntsiab muag los ntawd tej neeg xav thov cov visa siv li cas?
Koj muaj peev xwm tawm tswv yim rau cov form hauv online online web form. Los yog xa cov ntawv tawm tswv yim mus rau tsoom hwv Australia mus txog rau hnub tim 15/09/2017 no tau. Nyeem tau cov xov xwm ua lus Askiv tau ntxiv ntawm no: http://www.border.gov.au/Trav/visa-reform/policy-consultation-paper
