Tsab ntawv cej luam tau los ntawm Royal Commission mus tshuaj ntsuam xeev Victoria cov mental health system ntawd ces yog ib cov kab ke (system) uas tsis muaj peev xwm pab tau tej neeg, tsis yog ib cov kab ke tsim los pab tej neeg thiab yuav tsum tau raug muab kho dua tshiab tag nrho.
Tsib phau ntawv cej luam tau muaj 65 cov kev taw qhia uas hais kom yuav tsum tsim dua tsab cai Mental Health Tshiab (New Mental Health Act) kom tsis pub dhau rau nrab xyoo 2022, thiab yuav tsum teeb tsa lub koom haum los tswj thiab pab kom tej neeg tau txais kev noj qab nyob zoo thiab noj qab haus huv tsis txhob muaj teeb meem nyuaj siab ntxhov plawv kom thiaj los ua tus nrog xyuas kom tsoom fwv yuav tsum kub siab txog tej dej num no.
Tsis tas li no los tej ntawv cej luam no tseem tau taw qhia kom yuav tsum teeb tsa ib tug coj los tswj cov teeb meem nyuaj siab ntxhov plawv (mental health chief) thiab teeb tsa cov chaw pab daws kev nyuaj siab kom tau txog li 50-60 lub kom tej neeg zejzog tau siv ze rau ntawm lawv tej vaj tse.
Chair of the royal commission, Penny Armytage uas yog tus coj Royal Commission uas mus txheeb xyuas cov teeb meem nyuaj siab ntxhov plawv hais tias yuav tsum tau hloov kho tej hauj lwm no kom sai.
Xeev Victoria tus hau xeev Daniel Andrews los yeej tau cog lus tias nws yuav los ua raws li cov lus taw qhia tag nrho li tau teev rau tej ntawv cej luam no.
[[Yog koj los yog ib tug twg ua koj txhawj xeeb txog thiab ntsib teeb meem nyuaj siab ntxhov plawv thiab xav tau tej xov xwm kom ntxaws ntxiv ces hu tau rau tus zauv xov tooj 13 11 14 los yog hu tau rau lub koom haum Beyond Blue tus xov tooj 1300 224 636.]]
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, google podcasts, spotify, thiab apple podcasts los yog download SBS Radio App kom koj mloog tau SBS Hmong.
