Raws li SBS News tau qhia, tau muaj lub koom haum Changes.org tau mus thov tau cov xyeem memtes txog li ntam 200 tus neeg coj los tsub nias kom lub khw muag khoom Kmart muab nws cov khaub ncaws nkauj nyab rau tej me nyuam ntxhais hnav ua si tshem tawm tom tej txee tsis txhob muag ntxiv lawm. Ces txog rau hnub zwj Quag (Tuesday tim 22.10.2019) dhau los, Kmart thiaj tau tawm los qhia rau xov xwm tshooj 7 thiab tau thov txim tias yog tej yam tsis tsim nyog ua thiab nws thiaj li muab tej khoom no tshem tawm ntawm nws tej khw muag khoom tsis muag ntxiv lawm.
Lub koom haum Changes.org los yeej tau hais tias yog tej yam tsis tsim nyog Kmart muag tej me nyuam ntxhais cov khaub ncaws nkauj nyab no vim ''txhua lub xyoo twg yeej tau muaj tej me nyuam ntxhais txog li 12 roob tus raug lawv niam lawv txiv muag los yog raug yuam mus ua nkauj nyab yam tsis tau txais kev pom zoo ntawm lawv ua ntej tso.''
Ntxiv ntaws lub koom haum GirlsNotBrides hais tias teb chaws Niger yog thawj lub teb chaws ntawm 20 lub uas tseem yuam tej me nyuam ntxhais mus ua nyab.
Yog li ntawd tej teeb meem no thiaj tsis yog tej yam xwm txheej tshwm sim tib zaug xwb tab sis ''yeej muaj thoob ntuj rau ntau lub teb chaws, ntau pawg neeg tsawg, ntau cov kab lis kev cai thiab kev coj ntseeg. Vim rau qhov yeej tseem muaj ib tug me nyuam ntxhais ntawm tsib tug twg yeej raug yuam kom mus ua nyab ua ntej lawv hnoob nyoog nto 18 xyoo."
Dua ntawm tej kev yuam tej me nyuam ntxhais mus ua nyab no ces tseem muaj lwm yam teeb meem cuam tshuam rau tej me nyuam ntxhais no ntxiv thiab, vim lawv lub cev tsis tau loj tiav niam thiab lawv txoj kev xav tsis tau nto li tej neeg paub tab ces thiaj yuav ua rau lawv raug teeb meem ntau yam piv txwv li: tej zaum yuav ua rau lawv muaj teeb meem cuam tshuam rau lawv cov kev xeeb me nyuam, muaj teeb meem rau lub caij yug me nyuam, ua rau lawv yuav raug lawv tus txiv tsim teeb meem kub ntxhov rau, los yog yuav ua rau lawv kis tau cov kab mob HIV/AIDS tau. Ntxiv ntawd los tseem yuav ua rau lawv ua lub neej txom nyem vim lawv tsis tau kawm txuj ci kom muaj peev xwm ua tau hauj lwm khwv tau nyiaj los pab rau lawv tsev neeg thiab lawv lub neej thiab.
