Tsis ntev los no North Korea yeej tau hawv hem tias yuav siv cov riam phom nuclear los tua America yog tias nws tsis tso tseg nws cov kev hawv hem ua phem rau North Korea. Nws yuav xub siv cov riam phom no tua America tebchaws thiab nws tej tebchaws phooj ywg li South Korea, Japan thiab Australia tib si.
Tab sis Julie Bishop uas yog Australia tus pwm tsav lis laj fai pej kum kuj tau hais lus tib North Korea tus cuj pwm uas pheej sim riam phom tas zaj tas zog thiab hawv hem tias yuav xub siv nuclear tua ntau lub tebchaws ntawd yog ib tub cuj pwm xav thab plaub thiab phem thiab tsim kev kub ntxhov xwb, tom qab North Korea tau coj nws cov tub rog thiab tej cuab yeej cuab tam ua tsov rog mus taug kev nco txog nws tus coj Kim Il Sung hnub yug txwm 105 xyoos ntawd.
Tsis tas li no cov neeg paub ntsuam xyuas txog tej xwm txheej laj fai kum xeeb yeej tau qhia tias yuav tsum tau kub siab los xyuas North Korea tej cuj pwm no tab sis nom tswv North Korea yeej qhia tias yog tej yam nws muaj cai ua tau.
North Korea tau rov qab sim nws ib lub foob pob dua thiab tab sis siv tsis tau hauj lwm zoo li nws siab xav. Nom tswv South Korean thiab America hais tias lub foob fob no tau tawg tsis ntev tom qab tau tua tshoom ya tawm ntawm North Korea lub tuam ceeb Pyongyang.
U-S President Donald Trump los kuj tau sau ib cov lus hauv twitter tias North Korea tsis fim hwm Suav tus president Xi Jinping thiab tsis mloog tebchaws Suav cov lus ntuas. Yog li ces tsoom hwv Trump thiaj tseem tab tom los sab laj seb yuav txiav txim siab ua li cas ntxiv.
U-S Secretary of State Rex Tillerson kuj tau hais ntxiv tias kom ntiaj teb yuav tsum tau nrhiav lwm lub tswv yim tshiab los yuam kom North Korea tso tseg tsis txhob tsim nws cov riam phom nuclear thiab cov foob pob ntixv lawm tsis li ces yuav North Korea yuav ntsib teeb meem piam sij puas ntsoog loj heev.
Nws tau nqua hu kom ntiaj teb lub koom haum tswj kev ruaj ntseg (UN Security Council) kom siv tej cai rau txim txhua yam coj los rau txim hnyav rau tuam ceeb Pyongyang. Thiab tau nqua hu kom cov tebchaws ua tub koom siab nrog UN lub tuam chav tswj kev ruaj ntseg no siv nom tswv nrog hais thiab rau txim fab lag luam rau tebchaws Kaus Lim qaum teb.
Tab sis North Korea lub tuam chav lis laj fai pej kum hais tias America tej tswv yim no siv tsis tau hauj lwm vim America nyuam qhuav sim foob pob nuclear tua deb txog 6000 km tab sis ntiaj teb tsis hais dab tsi, yog li North Korea yeej yuav tsim nws cov riam phom nuclear txuas ntxiv mus coj los pov puag nws lub tebchaws.
Mr. Trump kuj tau hais tsis ntev los no tias tej zaum Kim Jung Un uas yog tus coj North Korea yuav ua rau muaj teeb meem loj heev nrog rau tebchaws America, rau cheeb tsam Asia-Pacific thiab ntiaj teb txoj kev thaj yeeb thiab kev ruaj ntseg vim nws yog ib tug neeg phem tsis mloog leej twg hais thiab tseem hem yuav siv nuclear tua ntau lub tebchaws.
Mr. Trump tau hais tias tsis tshuav lwm txoj hauv kev lawm vim kev nom tswv los siv tsis tau hauj lwm dab tsi lawm. Nws kuj tau hu America cov nom kis xeev (senator) 100 tus ntawm Congress mus sab laj ntawm tsev dawb hauv tuam cheeb Washington tsis ntev los no tham thiab luj lim txog tej hauv kev thiab tswv yim kom thoob tsib to nrog tias seb yuav ua li cas coj los daws cov teeb meem pheej hmoo uas North Korea tau tsim rau America thiab ntiaj teb txoj kev ruaj ntseg thiab txoj kev thaj yeeb nyab xeeb.
Xi Jinping uas yog Suav tus coj los kuj tau hais kom txhua tog cheem lawv tus kheej thiab tsis xav kom muaj kev kub ntxov sib ntaus sib tua vim txuas tus yuav raug teeb meem thiab plam txiaj ntsim tib si. Tsis tas li no xav kom America tso tseg txhob coj nws cov foob pob THAAD (Terminal High Altitude Area Defense) tua txais foob pob thiab tua tau coj mus nruab rau tebchaws South Korea. Tab sis Harry Harris uas yog America tus thawj hau rog tswj cov tub rog ntawm Asia-Pacific qhia tias yeej npaj cov foob pob no tiav lawm thiab yeej tau coj America lub nkoj tua rog thauj dav hlau thiab thauj nuclear USSR Calvin son nrog rau cov nkoj ploj qab thu dej uas tua tau nuclear mus rau Japan cov ciam hiav txwv lawm thiab.
Mr. Trump thiab Rex Tillerson los yeej tau hais tias lawv kawg tswv yim lawm thiab tsis muaj lwm txoj hauv kev lawm yog tham txog fab sib khom nom tswv thiab yeej tso txhua yam rau saum qaum rooj seb yuav ua li cas lawm xwb.
Mr Tillerson hais tias Suav muaj lub luag hauj lwm tseem ceeb yuav tsum tau los nrog xyuas vim nws muaj kev lagluam nrog North Korea. Tab sis Wang Yi uas yog Suav tua pwm tsav lis laj fai pej kum tau qhia tias tsis yog Suav tib leej thiaj yog tus yuav nrog daws tau tej teeb meem no nkaus xwb. Thiab tau nqua hu kom txhua tog tswj lawv tus kheej kom tus. Uas yog thawj kauj ruam tseem ceeb heev.
Yi hais tias " peb yuav tsum muab cov kev sib khom coj los siv uas yog tib txoj hauv kev tawm lawm xwb mas thiaj yuav tswj tau kev ruaj ntseg rau suam av korea no. Vim cov kev siv tub rog los daws yuav haj yam ua rau muaj teeb meem phom sij puas ntsoog xwb."
Cory Bernardi uas yog ib tug nom kis xeev (senator) ntawm pab nom Australian Conservatives los kuj hais tias txog caij lawm uas ntiaj teb yuav tsum tau los xaus North Korea cov kev tsim riam phom nuclear no lawm.
Bernadi hais tias "Peb yuav tsis cia North Korea tsim nws cov riam phom nuclear thiab tsim cov foob pob uas tua tau hla mus rau lwm sab ntuaj ntxiv lawm. Yog li peb yuav tsum tau los ua ib yam dab tsi xwb xwb. Mr. Trump los yeej tau hais txog tej no uas kuv xav tias yog ib yam zoo. Tab sis tseem muaj nom tswv Suav txhawb nqa North Korea los tau ntau caum xyoo no thiab. Yog li thiaj xav kom Suav tso tseg, kom thiaj tsim tau kev ruaj ntseg thiab kev thaj yeeb rau cheeb tsam no los yog rau ntiaj teb. Thiab yuav tsum koom siab los nrhiav kom tau ib txoj hauv kev los txwv kom North Korea kom txhob tsim tej riam phom no ntxiv lawm."
Dr. Malcolm Davis uas yog ib tug neeg paub txog fab ntsuam xyuas tej cai tsim thiab npaj tseg yuav ua raws ntawm lub chaw teeb txheeb Australia Strategic Policy Institute ntawm Australia lub tuam ceeb Canberra hais tias America ua yog lawm uas tau siv lub zog tub rog tsub nias North Korea.
Dr. Davis hais tias " Lawv (America) yuav taum tau ua ib yam dab tsi thiab lawv yuav tau kub siab txog North Korea txoj kev thab thiab ua kom lwm tus chim no lawm. Thiab yog tias nws tsis tso tseg thiab xaus cov kev sim riam phom nuclear thiab pheej tseem sim ntxiv ces haj yam yuav ua rau Mr. Trump tus tsoom hwv yuav txiav txim siab ua ib yam dab tsi xwb."
Japanese Prime Minister Shinzo Abe los kuj tau cog lus tias nws yuav tawm tsam kom yeej North Korea cov kev hawv hem uas yuav tsim teeb meem pheej hmoo rau pej kum haiv txoj kev ruaj ntseg thiab yuav nrog xyuas cov teeb meem kub ntxhov ntawm cov hiav txwv South China Sea ntawd thiab.
Raws li South Korea phau ntawv xov xwm Yonhap tau tshaj tawm rau tim 29/04/2017 no, ces South Korea tus pwm tsav Yun Byung-se uas yog tus pwm tsav tswj lub tuam chav lis laj fai pej kum ceeb toom tias, kom txhob maj sib khom nrog North Korea txog rau thaum lawv paub zoo tias seb North Korea muaj hom phiaj xav ua dab tsi tso. Vim nws hais tias lub tebchaws coj kev cai koom tsham (Communist) no yeej tsis kub siab yuav nrog leej twg sib khom kom tso tseg txhob tsim nws cov riam phom nuclear li, tab sis North Korea tsuas xav kom ntiaj teb lees paub tias nws yeej yog ib lub tebchwas muaj hwj chim rau fab riam phom nuclear xwb.
Yog li Yun thiaj xav kom ntiaj teb rau txim lagluam rau North Korea. Txhob pub nws xa khoom muag tawm txawv tebchaws thiab txhob pub nws yuav roj los siv kiag li lawm. Tsis tas li no txwv kom nws txhob khwv tau nyiaj ntsuab los siv yog tias txhua lub tebchaws tsis yuam nws cov khoom siv. Ntxiv ntawv yuav tsum xav seb puas yuav pub North Korea ua tub koom siab nrog UN ntxiv lawm. Mr. Yun tau hais cov lus no rau cov neeg, uas muaj America tus pwm tsav lia laj fai pej kum Rex Tillerson, thiab Suav tus pwm tsav lis laj fai pej kum Wang Yi nrog hnov tib si.
Yun tau hais meej tseeb tias tsis yog yuav tawm tsam kom yeej North Korea tab sis xav rub nws rov qab los tham kom nws tso tseg tsis txhob tsim cov riam phom nuclear no tiag tiag lawm xwb. Thiab xav kom ua tib zoo xyuas kom cov kev sib khom no txhob muaj teeb meem li yav tas los ntxiv lawm.
Mloog lwm yam xov xwm tau ntxiv ntawm www.sbs.com.au/hmong mloog xov xwm kaw ua suab ntawm www.sbs.com.au/podcasts/yourlanguage/hmong los yog ntawm www.facebook.com/sbshmong
