Hnub tim 9/8/2018 no nom tswv Nplog tau teeb tsa tau pawg neeg yuav mus tshuaj ntsuam xyuas lub pas dej tauv tawg ntawm Attapeu uas muaj 14 leeg thiab Bounthong Chitmany yog tus coj pawg neeg no koom nrog pej kum haiv cov neeg thiab cov neeg ntawm lub tuam txhab ua lub pas dej tauv no mus txheeb teeb meem no. Muaj 8 cov hauj lwm tseem ceeb uas lawv yuav los xyuas xws li yuav tau npaj tias mus txheeb dab tsi, li cas, nrhiav pov thawj tim khawv, nrog tej neeg tham thiab nrhiav kev pab cuam thiab kev pab ntawm cov neeg txawj txheeb txog tej teeb meem no thaum nrhiav tau lawm mam coj los txheeb dua ntxiv thiab nug tias yog vim li cas thiab yuav ua li cas txuas ntxiv nrog rau lwm yam hauj lwm cuam tshuam txog cov kev tshuaj ntsuam no.
Raws li Idsala news tau qhia nom tswv Nplog thiab pej kum haiv cov neeg pab cawm Nplog cov pej xeem raug pas dej tauv Xe Pian Xe Nam Noy nyab ntawd lawv tshawb nrhiav cov neeg uas ploj lawm txog li 35 leej uas tas sim neej lawm hos tseem ploj nrhiav tsis tau tau txog li 97 leej rau hnub tim 08/08/2018 no lawm.
Bounthong Chitmany raug teeb tsa los us tus coj mus txheeb xyuas Attapeu lub pas dej Xe Pian Xe Nam Noy tawg no lawm, thiab World Food Program tau koom nrog World Food Program thiab The United Nation Population Fund (UNfFP) thiab tsoom hwv Australia tau coj ib cov khoom pab cuam rau Nplog tej pej xeem lawm thiab.
Hnub tim 6-7/8/2018 dhau los nom tswv Nplog kuj tau sab laj thiab tau teeb tsa BounKong Chitmany uas yog Nplog tus lwm thawj pwm tsav los ua tus tswj cov kev tshuaj ntsuam uas lub pas dej tauv Xe Pian Xe Nam Noy tawg ua rau muaj teeb meem rau 7000 tus pej xeem ntawm 6 lub zos thiab yuav koom nrog pej kum haiv cov neeg txawj txeeg thiab cov koom haum koom lub tuam txhab lagluam no los txheeb cov teeb meem no.
Nom tswv Nplog kuj tau qhia tias yuav nrhiav tus neeg tshaj xov xwm cuav tias lub pas dej tauv Nam Ou 2 tawg rau hauv tej social media coj los rau txim.
Nom tswv Nplog kuj tau hais kom yuav tsum tau los txheeb xyuas txhua lub pas dej tauv tsim hluav taws xob hauv Nplog teb uas twb tsim tau tiav lawm thiab tseem yauv tsim los yog sam sim ua tam sim no seb ua puas tau zoo li cas thiab muab cov project tseem npaj yuav ua tshiab no tso tseg thiab ncua txog rau thaum txheeb tau tias npaj tau zoo tiag lawm mam tso cai rau ua kom tsis txhob muaj teeb meem li lub Xe Pian Xe Nam Noy no ntxiv.
Nom tswv Nplog lub tuam chav tswj peev txheej thiab ib puag ncig uas tswj thiab kwv yees huab cua tau ceeb toom rau pej xeem Nplog kom ceev faj tias yuav muaj nag xob nag cua hlob thiab xob nroo xob laim rau Nplog 15 lub xeeb qaum teb thoob qab teb thiaj xav ceeb toom kom pej xeem ceev faj rau 3 hnub no txij hnub tim 7-1-/8/2018 no tsam ho muaj tau teeb meem dej nyab dua.
Vitnaine Times tau tshaj tawm tias Dr Daovong Phonekeo uas yog tus coj lub tuam chav Ministry's Office qhia tias nom tswv Nplog npaj txhij yuav los txheeb xyuas cov teeb meem lub pas dej Xe Pian Xe Nam Noy ntawm Attapeu tawg lawm uas muaj Nplog lub tuam chav Ministry of Energy thiab Mines los koom thiab. Tsis tas li no nom tswv Nplog tau txwv tsis pub tej neeg mus rau ib puag ncig lub pas dej tauv no ib ntus thiab txib kom xeev Champasak thiab Attapeu ua 2 tug tswj thiab nrog xyuas kom teeb tsa tau pawg neeg los tshuaj ntsuam (investigate) cov teeb meem lub pas dej tauv no tawg.
Sonxay Siphandone tau mus xyuas pej xeem Nplog ntawm Attapeu thiab tau txhawb nqa kom kub siab npaj kom tau 14 lub tsev uas 500 leej nyob tau txog li 4 xyoos thiab yuav nrhiav chaw los ua tsev rau pej xeem Nplog tau nyob ntev ntxiv mus. Kub siab los tiv thaiv pej xeem kom tau txais kev noj qab haus huv thiab Npaj ib cov tsev ntaub kaus rau cov pej xeem nyob ua ke ti heev ntawd kom tau kev dim pa.
National Lao Television tau qhia tias Nplog lub koom haum Red Cross tau thov pej xeem tso ntshav mus pab rau tej pej xeem Nplog raug dej nyab zaum no lawm thiab. Nyob ntawm tuam ceeb Vientiane los nom tswv kuj tau ceeb toom tias kom pej xeem ceev faj vim lub pad dej tauv Nam Ngeum 1 thiab 2 dej puv heev thiab tau ceeb toom tias dej Mekong River tau phwj los nyab pej xeem tej liaj teb thiab ib txhia tsev ntawm lub zos Nongda, Ban Mai, Ban Houay Hom, Sikhottabong thiab txoj kev mus rau lub Muang Sang Thong lawm thiaj li ceeb toom rau pej xeem kom ceev faj.
Nom tswv Nplog tau hais tias tej zaum yog vim ua tau tsis zoo raws li standard thiab yog tim huab cua thiaj ua rau lub pas dej Xe Pian Xe Nam Noy tawg los nyab pej xeem Nplog ntawm xeev Attapeu tab sis South Korea lub tuam txhab SK E&C tsis lees tias yog tim nws ua tau lub pas dej Xe Pian Xe Nam Noy tsis zoo es thiaj tawg. Hos hnub tim 2/8/2018 dhau los los kuj tau muaj South Korean ib tug neeg nqua yas suab nto npe hu ua Choi Siwon ntawm pab tub nqua yas suab Super Junior uas yog UNICEF tus ambassador los kuj tau tuaj ntsiag to rau Thaib lub xeev Ubonrachathani thiab tau hla mus xyuas thiab mus pab Nplog cov pej xeem raug dej nyab ntawm Attapeu thiab.
Tam sim no nom tswv Nplog tau muaj cov pej xeem raug dej nyab ntawm Attapeu faib los yog ua 5 qho chaw nyob ib ntus ntawm lub xeev Attapeu no lawm.
Twb tau pib muaj cov teeb meem dej nyab txij hnub tim 23/7/2018 lawm tab sis tam sim no dej nqeg tag lawm tsuas mus nrhiav cov neeg tseem ploj tshaj 100 tawm tus ntawd lawm xwb thiab los npaj yuav pab cuam tej pej xeem kom tau chaw nyob thiab chaw tawm rooj los yog npaj rau yav ntev ntxiv mus uas nom tsev yuav tsim vaj tse thiab faib khoom los yog faib nyiaj rau lawv ntxiv mus lawm xwb.
Thonglin Sisoulith uas yog Nplog tus thawj pwm tsav los kuj tau ya dav hlau mus xyuas lub xeev Attapeu thiab muab lub nroog Sanamxay declared ua National Disaster Emergancy thiab txib kom lub tuam chav ntiav dag zog thiab pab cuam zej tsoom koom tes nrog nom tswv xeev teeb tsa ib pawg neeg los thov nyiaj pab cuam thiab tsim cov kev pab cuam coj los pab tej pej xeem raug dej nyab.
Mr. Sisoulith tau qhia tias tsis paub xyov yog tim ua tsis zoo los yog tim ntuj los nag hlob es thiaj tawg thiab yuav coj cov teeb meem no los tham, vim rau qhov twb yog zaum 3 lawm uas tau muaj teeb meem cuam tshuam txog tej pas dej tauv ua hluav taws xob no ua tsis tau zoo raws li cov standard li thawj lub ntawm Xekong, Nam Ao ntawm Xiengkhuam thiab lub tawg zaum no ntawm Attapeu no ua zaum 3.
Tam sim no Nplog tus thawj pwm tsav tau nqes mus txib kom nom tswv Nplog lis 4 co dej num xws li 1) yuav tsum kub siab nrhiav cov pej xeem kom tau sai li sai tau, 2) yuav tsum npaj chaw nyob ib ntus thiab tsev plob rau lub sij hawm 2 hlis ntixv no, 3) yuav tsum muab tej khoom pab cuam thiab tej nyiaj coj los faib teev zwm ua ntaub ntawv tseg ua pov thawj tim khawv kom muaj kev dawb huv thiab, 4) tuaj yuav tsum tawm tswv yim thiab sab laj nrog teb chaws Cambodia seb lawv ho puas muaj peev xwm pab nrhaiv tau Nplog cov pej xeem raug dej nyab raug tshoob mus rau lawv lub teb chaws kom sai thiab sab laj tawm tswv yim daws kev nyuaj siab rau cov pej xeem raug kev txom nyem no.
Ntxiv ntawd pej xeem Nplog kuj tsis txaus siab tias ua li cas ho tsis coj tej khoom coj los faib rau sawv daws thiab cov nyiaj thiab khoom pab cuam tau tag nrho tshaj 90,000,000,000 Kip lawm tau nyiaj Thaib 27,000,000 Baht thiab tau nyiaj USD 11,000,000 dollars lawm ntawm lub xeev Attapeu nrog rau lwm cov kev pab cuam raws li lub chaw nthuav xov xwm Idsala tau qhia rau hnub tim 08/08/2018 dhau los. Tau muaj ib txhia pej xeem Nplog nug thiab tawm tswv yim tias uas cas tsis coj los faib rau pej xeem kom tas thiab thawj zaug ntawm cov nyiaj uas nom tswv Nplog lub tuam chav Ministry of Labor and Social Welfare pab 500,000 Kip ntawm tsawg thiab tsis txaus siv.Tab sis tus lwm coj hu ua Mrs Baikham Khatthiya ntawm lub tuam chav no yeej tau qhia meej tias tej nyiaj tseem nyob li qub thiab yuav coj los pab rau pej xeem Nplog xwb tsis tau coj mus siv ua lwm yam dab tsi.
Tab sis kuj muaj neeg tawm los qhia tias tsuas yog thawj cov kev pab cuam xwb thiab tseem yuav tau cov kev pab cuam ntau yam txuas ntxiv los daws cov teeb meem dej nyab no.
Hnub tim 30-31/07/2018 dhau los tau muaj ib tug ntxhais Hmoob hu ua Mas Lis Nas Yaj tau koom nrog nws ntau tus phooj ywg uas tau pab nyiaj thiab tau muaj ib tug kwv tij nyob America tau pab USD 1000 ntawm nws ntiag tug koom nrog tus muam no thiab lwm tus cov kev pab cuam tau raug coj mus yuav pam lev thiab tog hauv ncoo coj mus pab cov pej xeem Nplog ntawm Attapeu uas raug dej nyab ntawd lawm. Kuj yog ib qhov zoo qhia tau tias txawm tsis muaj Hmoob ntau tus mus pab Nplog los yeej muaj tus ntxhais Hmoob muaj peev xwm no ua tus sawv cev ntawm nws tus kheej thiab naws tej phooj ywg mus pab thiab qhov zoo yog ib lub cim sawv cev pab rau Hmoob sawv daws thiab. Nws tseem yuav tshaj xov xwm nrog Malimar Hmong Lao TV hauv tuam ceeb Vientiane ntxiv rau hnub tim 03/08/2018 no ntxiv seb ho puas muaj cov kwv tij Hmoob sawv daws ho puas pab nyiaj li cas rau nws rov qab coj mus pab rau Nplog cov pej xeem ntawm Attapeu dua.
Hnub tim 29/7/2018 no Nplog tus thawj pwm tsav tau tawm los qhia meej tseeb dua rau pej xeem Nplog uas raug dej nyab tias yuav pab kom lawv rov qab pib ua dua tau lub neej li qub.
Tam sim no muaj dej nyab Nplog ntau lub xeev Pib txij ntawm Hua Phan, Luang Namtha uas dej twb nyab ntau lus zos lawm. Thakkhek lub zos Mahaxay ces twg raug dej nyab txij nthab tse lawm, . Ntxiv ntawd los Bangkok Post tseem tau tshaj tawm tias Thaib cov xeev sab hnub tuam qaum teb npuab Mekong River kom ceev faj vim tus dej no puv tuaj lawm thiab tsam ho rov qab nyab tej zos nyob raws tus dej no ntxiv. Tam sim no los kuj muaj nom tswv ntawm xeev Champasak qhia tias dej Mekong River twb phwj siab ze txog li 50 cm rau thawj zaug rau 10 lub xyoo no los nyab cov zos nyob qes ntawm lub xeev no txog 161 lub lawm thiab txawm lawv tau khawv xuab zeb los thaiv lub nroog Pakse los tau 5 hnub no los tseem nycab tej chaw qes lawm.
Lub chaw nthuav xov xwm ABC Laos News tau tshaj tawm tias hnub tim 29/7/2018 no tau muaj ib lub tsheb thauj khoom mus pab Nplog cov pej xeem raug dej nyab ntawm Attapeu tseem mus poob qab choj ntawm tus sej Xe Nam Noy lav 52 ua rau ib tug tas sim neej hos ib tug raug mob sab kawg tseem hu rau tsev neeg thiab cov txheeb ze kom mus nrog xyuas lawm. Kuj muaj Nplog cov neeg pab cawm lwm tus tau pab thiab xa mus kho mob rau tsev kho mob lawm.
Phau ntawv xov xwm The Laotian Times kuj tau tshaj tawm tias Nplog tus thawj pwm tsav Thongloun Sisoulith tau tawm los hais kom tej chaw nthuav xov xwm, tej neeg ntiag tug tsis txhob lam tau lam tso xov xwm cuav los yog tso tej duab neeg tuag los yog ploj thiab piam sij puas ntsoog rau hauv social media thiab txhob tsim cov xov xwm cuav thiab yuav tsum tau mloog raws li nom tswv txheeb tau los xwb. Vim tau muaj ib txhia neeg txhob txwm dag ua rau tej neeg tsis paub qhov tseeb li tau muaj tias lub pas dej tauv Nam Ou tawg no tab sis nws tseem nyob nws li qub. Thiab tseem muaj ib txhia chaw nthuav xov xwm txawv teb chaws tshaj xov xwm tsis yog raws qhov tseeb txog tej neeg ploj, tas sim neej los yog raug teeb meem ntawd. Tej no kuj yuav yog ib cov kev ua txhaum cai cuam tshuam txog Nplog cov kev nthuav xov xwm thiab yuav raug txim los kuj tau thiab.
Tau muaj pej kuv haiv cov kev pab cuam ua ntuv zus tsis tu ncua, tab sis nom tswv Nplog yeej tsis tshua tshaj tawm tej xov xwm no rau pej xeem paub kiag rau lub caij tej xwm txheej tau tshwm sim, tsuas tshaj tawm lig lawm xwb, thiaj ua rau pej xeem Nplog thiab pej kum haiv piv txwv li lub koom haum niam dej pej kum haiv tsis txaus siab tias yog vim li cas thiaj tswj tej xov xwm nruj ua luaj tsis pub tshaj tej xov xwm no tawm los yog tsis pub tej neeg nrhiav xov xwm mus nrhiav tau xov xwm yooj yim li thiab.
Txawm li cas los kuj muaj xov zoo, tsoom hwv Suav tau pab nyiaj USD 1,000,000, Suav lub koom haum Red Cross tau pab 25,000,000 Yuan thiab tau pab nyiaj txog USD 100,000. Ntxiv ntawd UNDP los kuj tau pab Nplog USD 100,000 dollar thiab. Hnub tim 30/7/2018 dhau los no, nom tswv Suav tau xa 100 lub nkoj, 500 lub tsev ntaub kaus thiab 100 lub tshuab lim dej pab rau Nplog. Muaj Suav tuam tshoj kuj tau xa ib cov neeg 100 leej nrog rau tej twj pab cuam thiab tshuaj nrog rau lwm yam khoom tuaj pab thiab Nplog kuj nrhiav neeg txhais lus Suav mus pab lawm. Ntxiv ntawd Suav lub tuam txhab Power China koom nrog pej xeem Suav tau sib sau tau nyiaj txog 400,000,000 Kis los pab rau Nplog lawm thiab.
Teb chaws America tus nom lis teej faj (Emabssador) Rina Bitter ntawm American Embassy hauv tuam ceeb Vientiane los kuj tau tshaj tawm tais nom tswv America tau pab cov nyiaj Disaster Asistance Relief Team (DART) ntawm America lub tuam chav USAID Office of US Foreign Disaster Asistance (OFDA) txog USD 100,000 pab rau Nplog lawm thiab tau koom tes nrog UNICEF los pab Nplog lawm. Hos European Union (EU) los kuj tau pab Euro 200,000 rau Nplog lawm thiab.
Cambodia kuj tau pab nyiaj USD 100,000 rau Nplog cov pej xeem raug dej nyab ntawm xeev Attapeu rau tim 30/7/2018 dhau los thiab.
Nom tswv kuj tau ceeb toom rau pej xeem Nplog kom ceev faj vim twb muaj dej nyab ntawm xeev Houa Phan, ntawm Xieng Khuang, thiab ntawm Khammuane los dej twb nyab pej xeem tshaj zes txog 300 lub zos thiab 13,000 yim lawm thiab. Thaj chaw dej nyab loj tshaj yog lub nroog Mahaxay twb nyab cov tsev qes txij nthav tsev lawm. Nyob ntawm Pakse ces nom tswv tseem tau txib nws tej neeg mus khawb xuab zeb hauv Mekong River los ntim thaiv ntug dej thiab tau ceeb toom rau cov pej xeem ntawm Nam xan, Xechamphone, thiab Xe Bangfai lawm kom ceev faj thiab npaj khoom rau chaw siab lawm. Hos lub pas dej Nam Ou ntawm Luang Prabang kuj tsis muaj teeb meem dab tsi tom qab nom tswv tau qhia tias yuav tso dej tawm kom pej xeem ceev faj ntawd.
Raws li Asia News Network Vientiane Times tau tshaj tawm, ces Nplog lub pas dej tauv Nam Theun 2 tau kaw tsis tsim hluav taws xob ib ntus kom txhob muaj dej ntau rau tus dej Xe Bang Fay lawm thiab kom tsis txhob muaj teeb meem dej nyab ntxiv rau Nplog tej pej xeem no ntxiv lawm.
Nplog lub tuam chav Ministry of Labor and Social Welfare kuj tau tsim 2 tus zauv xov tooj rau tej neeg raug teeb meem dej nyab hu mus thov kev pab cuam lawm thiab uas yog 1511 thiab 1522.
Hnub tim 27/7/2018 no lub teb chaws Kaus Lim qab teb (South Korean) lub chaw nthuav xov xwm Yonhap News tau qhia tias lub tuam txhab lagluam Xe Pien Xe Nam Noy Power Company (PNPC) tau pom zoo pab nyiaj USD 10,000,000 thiab teb chaws Kaus Lim qaum teb tau pom zoo pab USD 1,000,000 uas yog USD 500,000 ua nyiaj ntsuab thiab cov sem yog tej khoom pab xws li pam vov chaw pw, khoom siv tswj kev noj qab haus huv thiab lwm yam pab rau Nplog cov pej xeem rau dej nyab vim lub pas dej no tawg ntawm Attapeu lawm. Ntxiv ntawd los Korean Air Lines Co. kuj tau qhia tias nws tau xa dej 36,000 liters thiab 2,000 daim pam hla ntawm Danang ntawm nyab laj teb mus pab Nplog cov pej xeem raug dej nyab ntawm Attapeu lawm thiab.
Tsis tas li no los lub pas dej tauv Nam Ou 2 ntawd yeej tseem ruaj khov zoo li qub txawm lawv tau qhia tias lawv yuav tso dej thiab kom pej xeem ntawm cheeb tsam tus dej Nam Ngieb (Nab Giaj) tau ceev vaj tab sis kuj tsis muaj teeb meem li tej lus paj lus cua tau hais. Tab sis nom tswv yeej tau ceeb toom kom pej xeem Nplog ceev faj tom qab lub koom haum niam dej Mekong tau qhia tias muaj dej nce thiab loj siab tuaj rau qee cheeb tsam ntawm tus niam dej no. Ntawm xeev Savanakhet los kuj muaj dej nyab ntawm lub zos Phonsong lawm thiab.
Cov khoom pab cuam ntawm 10 lub teb chaws tub koom siab ntawm lub koom haum ASEAN los kuj xa mus txog Nplog teb coj mus pab rau Nplog cov pej xeem no lawm thiab. Japan cov khoom xav mus pab los kuj txog lawm thiab.
Raws li Australia tus pwm tsav lis laj fai pej kum Julie Bishop lub vam sab tau qhia, nws thiab Australia tus pwm tsav tiv thaiv teb chaws hu ua Marise Payne tau qhia rau hauv Ms Bishop lub vam sab tias Australia tau tshwm nyiaj yuav khoom ntau yam txog AUD 800,000 coj mus yuav khoom tso rau lub dav hlau tub rog Australia Royal Air Force thiab tau koom tes nrog UN lub chaw hauj lwm thauj cov khoom pab cuam mus txog ntawm Sanamxay ntawm Attapeu hauv Nplog lawm thiab. Daim duab no yog thawj lub dav hlau thauj khoom mus pab xwb hos lub dav hlau 2 twb thauj khoom mus txog lawm thiab.
Kim Thongloun Sisoulith uas yog Nplog tus thawj pwm tsav tau hais tias nws tus tsoom hwv yuav koom tes nrog cov tuam txhab lagluam ntawm 2 lub teb chaws South Korea thiab Thaib los txheeb xyuas thiab tshuaj ntsuam cov teeb meem no. Nws tau hais tias cov dej tawg ntawm lub pas dej tauv Xe Pien Xe Nam Noy los nyab Nplog cov zos no yog cov teeb meem dej nyab phom sij tshaj plaws rau lub caij 10 xyoo los no. Thiab ua rau muaj lus nug tias seb nom tswv Nplog puas yuav mus txheeb xyuas tag nrho Nplog cov pas dej tauv uas ua tiav ntawd seb puas tau standard tsam muaj teeb meem dua thiab vim yav dhau los twb tau muaj 3 cov teeb meem lawm.
Nom tswv Nplog tus nom tswj cov peev txheej thiab hluav taws xob (Minister of Energy and Mines), Dr Khammany Inthirath tau tawm los qhia tias nws yuav los tshuaj ntsuam (investigate) cov teeb meem no thiab ntseeg tias vim ua lub pas dej tauv Xe Pien Xe Nam Noy no tsis tau standard thiaj tawg. Thiab tau teeb tsa ib pawg neeg mus tshuaj ntsuam cov teeb meem no lawm. Tab sis lub tuam txhab PNPC uas tswj lub pas dej tauv no yeej tseem tsis tau tawm los hais dab tsi tias yuav daws tej teeb meem tam sim no li cas li. Nws kuj tau hais ntxiv tias lub tuam txhab no yuav tsum rov qab los xyuas kom tsim tau lub pas dej no li qub dua thiab daws tej teeb meem no.
Dr. Khammany Inthirath Nws yeej tau hais tias kom lub tuam txhab lagluam no yuav tau los tsim vaj tse tshiab thiab them txhua tsav txhua yam pauj rov qab rau Nplog tej pej xeem uas lub tuam txhab lagluam no yeej tau tawm los lees tias nws yuav lees ua tus ris cov teeb meem no 100%. Thiab lub tuam txhab PNPC tau tawm los lees tias nws yuav ua tus pov plob 100% lawm thiab.
Ntxiv ntawd los kuj tau hais kom cov tuam txhab lagluam muaj feem koom yuav tsum tau los pov plob txhua tsav yam cuam tshuam txog Nplog tej pej xeem no lub neej, ua vaj tse tshiab rau lawv nyob, kev ploj qaug, liaj teb, tsev neeg, kev kawm yav pem suab thiab kev pab cuam tam sim no txuas rau yav tom ntej huv tib si.
Kuj tau muaj xov xwm nug tias kom lub tuam txhab PNPC (Xe Pian Xe Nam Noy Power Company) no yuav tau los ua tus lees tej teeb meem tau tshwm sim tag nrho. Thiab teb chaws Cambodia los yeej xav kom lub tuam txhab no them tej nqe puas ntsoog rau lawv.
Tam sim no nom tswv Nplog kuj tau qhib ib cov xov tooj thiab cov bank account rau tej neeg tau hu nug nom tswv thiab muab nyiaj pab cuam rau Nplog cov pej xeem lawm. Tus Swift Code Yog: COEBLALA
(Source: Lao National Television News).
Lao National Television kuj tau nqua hu kom pej xeem thiab tej neeg ho pab nyiaj txiag, khaub ncaws hnav, khau rau, zaub mov noj, ris tsho hnav, poj niam cov ntaub siv tswj kev noj qab haus huv thiab pam vov chaw pw lwm yam mus pab rau Nplog lub tuam chav ntiav dag zog thiab pab zej tsoom (Ministry of Labor and Social Services) coj mus pab rau Nplog tej pej xeem raug teeb meem no.
Kuj tau muaj Thaib cov neeg tau mus pab tau 14 tug neeg plog uas muaj 4 tug txiv neej, 6 tus poj niam ib tug xeeb me nyuam nrog rau 4 tug me nyuam haus uas khuam ntawm ib lub pov txwv los tau 4 hnub tim 27/7/2018 lawm. Lawv kuj tau coj khoom ntau yam coj mus pab rau 800 leej ntawm lub zos Xai Don Khong lawm thiab. Hos Suav cov neeg rescuers los kuj pab cawm tau 9 leeg ntxiv thiab.
Hais txog ntawm cov neeg txawv teb chaws uas mus ncig hauv Nplog teb tam sim no ces yeej tsis tau muaj xov xwm dab tsi ntawm nom tswv Nplog qhia tias seb puas muaj cov neeg no raug teeb meem li cas npaum li cas tus rau lub sij hawm no.
Vim tau muaj lub khaub zeeg cua Cern Tinh ntawm teb chaws Cobtsib los hla Nplog teb, thiaj ua rau muaj ntuj los nag hlob heev txij hnub tim 22-23/7/2018, thiaj li tau ua rau lub pas dej tauv Xe pian-Xe Nam Noy uas yog 4 lub tuam txhab yog teb chaws South Korea 2 lub xws li South Korean Engineering and Construction, Korean Western Power Company, Ratchaburi Electricity Generating Holding Public Co. Ltd. of Thailand thiab Lao Holding State Enterprise koom siv nyiaj txog li USD 1.2 billion los tsim coj los ua hluav taws xob siv tau tawg ces thiaj ua rau muaj dej nyab Nplog tej zos txog li 9 lub ntawm xeev Attapeu, muaj qee thaj chaw nyab txog nthab tse los sis nyab txog ruv tsev ua rau tej neeg khiav nkaum saum ruv tsev.
Twb ua lub pas dej no tiav txog 90% lawm, thiab thaum pib lagluam ces Nplog yuav tau nyiaj ib lub xyoo ntau billion los ntawm lub pad sej uas muag txog 70% rau Thaib teb ntawd. Tab sis tsis muaj hmoo ho tawg ua ntej lawm. Txawm li ntawd los lub tuam txhab PNPC no yeej yuav ua kom tiav raws li nws tau teev tseg rau xyoo 2019 no xwb kom tsim tau hluav taws xob.
Mloog tau Nplog ib tug neeg tshaj xov xwm qhia txog tias vim li cas lub pas dej Xe Pien Xe Nam Noy thiaj tawg ib sab los nyab pej xeem ntawm lub xeev Attapeu tau ntawm no (Source: SBS Lao):
Cov xwm txheej no twb tau ua rau muaj neeg tas sim nej txog li 28 leej, ploj lawm 123 leej tam sim no nrhiav tsis tau. Cov dej no tau nyab ntau tshaj 1300 yim los yog muaj neeg txog li 6600 tus neeg Nplog raug cov teeb meem dej nyab no. Cov zos raug dej nyab loj tshaj plaws yog Thaseangchang, Sanong, Thahin, Mai thiab Yaitha. Hos muaj 17 lub zos ntawm teb chaws Cambodia lub xeev Stung Treng sab qaum teb hnub tuaj ntawm teb chaws Cambodia thiab tseem ceev faj tsam dej los nyab ntxiv thiaj ua rau nom tswv tau tshem tej pej xeem txog 5,000 tus mus nyob rau lwm qhov tsam dej nyab.
Raws li Radio Free Asia tau tshaj tawm, Ian Baird uas yog ib tug zes kais (Professor) uas paub zoo txog Nplog teb los yeej tau qhia tias tsim nyog lub tuam txhab no yuav tau los ua tus ris tag nrho tej teeb meem tshwm sim no, vim tsis yog ntuj tsim tag sis yeej yog tim lawv tsis ua tib zoo tsim thiaj muaj tej teeb meem no.
Maureen Harris uas yog ib tug neeg txawj txeeg paub zoo txog Nplog cov pas dej tauv tsim hluav taws xob (Lao dams) ntawm lub koom haum International Rivers uas yog ib lub koom haum Non-governmental Organisation-NGO, tau hais tias 'cov xwm txheej no tau ua rau yuav tau los teb ntau nqe lus nug txog cov standard ntawm Nplog tej pas dej tauv no thiab cov kev nyab xeeb cuam tshuam txog tej pas dej no, thiab los nrog xyuas tej xwm txheej phom sij yuav tshwm sim tau vim tej huab cua no thiab.' Vim yeej tau muaj cov neeg zejzog pej kum haiv ntawm cheeb tsam Asia thiab ntiaj teb no tau tawm tsam tsis pom zoo kom nom tswv Nplog tso cai rau tej tuam txhab tuaj tsim lub pas dej no tsam muaj teeb meem, tab sis nom tswv yeej tsis mloog pej xeem thiab cia li muab lawv tshem mus nyob rau cov zos tshiab lawm xwb raws li Joseph Akaravong tau hais.
Tau muaj cov neeg txawj txeej (experts) qhia tias vim tau muaj huab sib sau ntawm hiav txwv Indian Ocean ntau heev ces thiaj raug tshuab rau teb chaws Indonesia mus rau Phillippines thiab mus rau Japan thiab Suav, ntxiv ntawd los kuj tseem yog lub caij ntuj nag thiab huab cua sov ntawm cov teb chaws Asia no thiab lub caij muaj khaub zeeb cua Tropical cyclone Cern Tinh thiab Moonsoon ntxiv ces thiaj sov thiab los nag loj thiaj ua rau muaj dej nyab ntawm ntau lub teb chaws li Japan, Suav, Nyab laj thiab Nplog teb uas tau muaj cov teeb meem no.
Moon Jae In uas yog teb chaws Kaus Lim qab teb tus coj los kuj tau tshaj tawm tias nws yuav hais kom nom tswv mus txheeb xyuas tias lub pas dej tauv Xe Pian Xe Nam Noy uas muaj nws 2 lub tuam txhab koom nrog Thaib lub thiab Nplog ib lub ntawd ua cov hauj lwm tsim lub pas dej tauv tsim hluav taws xob no li cas thiaj ua rau lub pas dej no tawg thiab tsim tej teeb meem no rau Nplog tej pej xeem ntawm lub xeev Attapeu thiab tseem tau nyab ntau lub zos ntawm teb chaws Cambodia lub xeev Stung Treng ua lawv xav kom cov tswv cuab yuav tsum tau los pov plob ntawd.
Hnub tim 26/7/2018, Nplog tus coj no kuj tau los ua tsaug rau pej kum haiv cov kev pab cuam ntawm ntau lub teb chaws uas muaj Thaib, Singapore, Phillippines, Suav, Nyab laj, South Korea, Japan, UN, World Bank thiab lwm lub tebchaws ntawm cov teb chaws Asia thiab cog lus tias yuav pab kom Nplog tej pej xeem no rov qab pib ua tau dua lub neej tshiab.
Mr. Thongloun qhia tias muaj 27 tus neeg tas sim neej thiab nrhiav tau cov cev lawm thiab tseem sam sim nrhiav cov neeg tshaj 123 leeg ntawd txuas ntxiv thiab cov xwm txheej no tau ua rau Nplog cov pej xeem tshaj 3,000 tus tsis tau vaj tse nyob.
Tab sis raws li tsab ntawv cej luam (report) uas lub chaw nthuav xov xwm AFP tau los, lub tuam txhab PNPC no tau qhia rau South Korean tus kws lij choj tias twb tau muaj ib kab xwb pleb twg loj li 11 centimeters rau ntawm qhov chaw tso dej ib sab hauv plawv kom dej phwj uas nyob ib sab ntawm qhov chaw tso dej loj rau thaum ntxiv lub zej Kuab (Friday) lub plua (Week) dhau los lawm. Ces tej pej xeem tsuas muaj sij hawm li 1-2 teev los npaj khiav xwb ces twb lig heev lawm thiaj muaj neeg xav paub txog cov kev ceeb toom no tias yog li cas tiag.
Lub tuam txhab lo kuj qhia tias nws tau ceeb toom rau nom tswv Nplog paub hnub tim 23/7/2018 kom tshem tej pej xeem tawm kom sai li sai tau mus rau lwm qhov.
Tab sis lub tsev nthuav xov xwm AFP tau qhia tias raws li tsab ntawv uas lub tuam txhab PNPC tswj lub pas dej no tsab ntawv tau xa rau tus kws lij choj uas lawv nrhiav tau los ces yeej tau qhia tias lub pas dej no twb tau xwb pleb li 11 centimetres rau hnub Friday tim 20/7/2018 lawm.
Tej pej xeem ib txhia qhia tias lawv tsuas paub tsis ntev ua ntej 1 teev uas lub pas dej no yuav tawg los nyab lawv rau thaum 8 teev tsaus ntuj hmo 23 xwb ces lawm mam sib qhia siab qhia xwb tsis yog nom tswv yuav ceeb toom rau txhua tus. Thaum 24/7/2018 ib tag hmo uas tseem tsaus ntuj ntawd, ces lawv thiaj npaj tsis yeej. Tsuas muaj nom tswv hu xov tooj rau qee tus thiab mam li sib qhia rau tej neeg zejzog paub xwb.
Raws li phau ntawv xov xwm The Laotian Times tau tshaj tawm, lub koom haum Vientiane Rescue muaj cov neeg ua hauj lwm yeem thaj (Volunteers) 1623 pab mus pab cov pej xeem Nplog raug teeb meem no, thiab feem ntau tau mus so rau ntawm ib lub tsev loj hu ua Dao Heuang ntawm Paksong.
Qhov xov zoo ces Nplog lub txhab nyiaj Banque Pour Le Commerce Exterieur Lao Public (BCEL) tau tsim tau ib qhov crowdfunding hu ua One Heart thov kom tau nyiaj li daim duab no ntawm pej xeem Nplog 18,000 tawm tus mus pab rau Nplog cov pej xeem rau dej nyab zaum no.
Yog li tsis hais pej xeem thiab nom tswv Nplog txhua theem thiaj tau pab txhua yam tsis hais dej haus, zaub mov noj, tshuaj kho mob nyiaj txiag thiab lwm yam coj mus pab rau tej pej xeem Nplog raug teeb meem no me ntsis lawm.
Nom tswv Nplog tau ceeb toom thiab tau sam sim mus pab tej pej xeem lawm. Nplog tus thawj pwm tsav kuj tau mus xyuas thiab nom tswv xeev kuj tau coj nkoj mus pab cawm tej pej xeem thiab faib txhuv rau lawv me ntsis lawm thiab.
Nom tswv Nyab laj lub tuam chav tiv thaiv teb chaws los kuj tau txib nws 4 pawg tub rog Military Region 5, the Army's 3rd Corps, Air Force and its 18th Corps kom mus pab nom tswv Nplog pab Nplog tej pej xeem raug dej nyab no lawm thiab. Tau hais kom nws lub tuam txhab South Laos Friendship Co. Ltd pab nyiaj txog li 200 million VND pab rau Nplog. Nyab laj tus coj los kuj tau ntsib Nplog tus coj thiab tau pab nyiaj USD 200,000 rau Nplog los pab cuam rau tej pej xeem raug dej nyab no lawm thiab.
Teb chaws Singapore los kuj tau pab nyiaj USD 100,000 rau nom tswv Nplog thiab raws li Nplog phau ntawv xov xwm The Laitian Times tau qhia nrog rau Singapore Red Cross los kuj tau pab S$50,000 cov nyiaj humanitarian aid thiab Singapore Armed Forces (SAF) los kuj tau xav cov khoom pab cuam raug nyiaj txog S$280,000 pab rau Nplog rau thaum tsaus ntuj hnub Thursday tim 26/7/2018 lawm thiab raws li Wikipedia tau qhia.
Cov zos ntawm 2 lub voj 4 ceg xiav nyob sab laug yog cov zos raug dej nyab-Image source: Idsala.
Hos nom tswv Nplog los kuj tau pab thiab raws li Vientiane Mai Newspaper tau qhia ces Nplog tus thawj pwm tsav Thongloun tus tab zag tau pab 50 million Kip, Nplog lub tsev tsoom hwv (Parliament) pab 30 million Kip thiab lub tuam txhab Kikeo Sengphachan pab 10 million Kip tau tag nrho 90 million Kip coj mus pab tej xwm txheej muaj khaub zeeg cua los tsim teeb meem rau Nplog ntau lub xeev txij qaum teb txog qab teb. Hos Nplog lub koom haum Lao National Front tau pab nyiaj txog 462.000.000 Kip. Lub tuam txhab Hongsa Power Co., LTD pab nyiaj txog 2,000,000 Baht.
Thaib yog thawj lub teb chaws tau xa khoom mus pab Nplog. Huab tais Thaib zum 10 tau xa ib cov khoom uas muaj khoom noj dej haus khaub ncaws, khoom noj qhuav, tshuab lim dej mus pab thiab tau pab nyiaj ntiag tug 1 million Baht, hos nom tswv Thaib los kuj pab 5 million Baht nrog rau ib cov khoom pab cuam li nkoj pab thauj neeg, khoom noj khoom haus, khoom siv ntiag tug, tshuaj kho mob thiab khaub ncaws. Tam sim no nom tswv Thaib tau xa ib cov tsheb truck thauj khoom ntau yam txog caum lub tsheb truck mus txog coj mus pab Nplog lawm. Thaib lub koom haum ncaws pob los kuj tau pab dej haus txog 55,000 fwj rau Nplog cov pej xeem lawm thiab.
Hmoob Bangkok Network and Associate los kuj tau npaj yuav thov kom tau ib co nyiaj yuav coj mus pab rau pej xeem Nplog thiab. Tam sim no tau tshaj 24,000 Baht lawm tsis tau paub seb puas tau xa rau nom tswv Nplog li cas tam sim no.
Raws li Lao National Tevelvision tau qhia, muaj ntau lub koom haum tuaj pab nyiaj ua ntuv zus, ntxiv no yog qee lub xws li: Nom tswv Nplog cov nyiaj pab tej teeb meem dej nyab xyoo no twb pab txog 866,000,000 Kip, lub tuam txhab Investment and Hydro Power Consultation Sole Co., LTD pab 3,000,000,000 Kip, Lao National Commerce and Industry pab 300,000,000 Kip, 2 lub tuam txhab AIFS thiab AIDC koom pab nyiaj ua ke 616,000,000 Kip, thiab lub tuam txhab Sinomach Heavey Equipment Group Co.,LTD los kuj tau pab USD 80,000 uas yog ib cov kev pab cuam ntau kawg tab sis yeej tseem muaj neeg pab coob leej ntau tus ntxiv uas txheeb tsis txog thiab.
Tam sim no ces kuj muaj cov neeg volunteers coob heev mus pab faib zaub mov thiab tshuaj los yog lwm yam khoom rau Nplog tej pej xeem tau siv, tab sis Nplog tus pwm tsav tswj kev noj qab haus huv qhia tias tsis muaj tej khoom noj khoom haus dej thiab tshuaj txaus siv.
Kuj tau muaj ib lub tsheb Norwegian People's Aid thauj ib cov khoom pab cuam uas muaj dej thiab khoom noj xav mus pab rau Nplog thiab.
UN lub koom haum pab cuam Humanitarian hauv Nplog qhia tias tej choj thiab kev ntawm 8 lub zos raug dej nyab no piam thiab puas tsuaj tag lawm. UN nrog rau teb chaws Malaysia thiab lwm lub teb chaws los yeej qhia tias nws npaj txhij yuav pab yog nom tswv Nplog xav tau kev pab cuam tiag.
Teb South Korea tus coj Moon Jae In los tau qhia tias ib hnub no nws yuav xav neeg thiab khoom tuaj pab cuam rau Nplog, vim tau muaj nws 2 lub tuam txhab tuaj koom tsim lub pas dej tauv no thiaj muaj cov teeb meem no. Nws kuj tau xa cov neeg rescuers, helicopters thiab nkoj mus pab Nplog.
Japanese lub Embassy tau koom nrog Japan Internatonal Cooperation Agency (JICA) los kuj tau pab ib cov tsev ntaub kaus, ntaub kaus, tshuab lim dej thoob rau dej haus coj mus pab rau Nplog thiab tom qab nom tswv Nplog tau thov tsoom hwv Japan kom pab.
Nom tswv Malaysia thiab Singapore los kuj tau xa moo tu siab rau nom tswv Nplog thiab qhia tias yeej npaj txhij yog nom tswv Nplog xav tau kev pab ces lawv yeej yuav pab thiab no.
Lub koom haum UNICEF tus coj Octavian Bivol los kuj tau qhia tias nws tau koom tes nrog pej kum haiv los nrhiav thaib npaj ib cov khoom pab cuam li tsev ntaub kaus, khoom siv rau tej cuab yig thiab khoom siv tswj kev noj qab haus huv coj mus pab rau tej me nyuam thiab tej cuab yig rau 2 hnub no ntxiv lawm thiab.
Qhov tseem ceeb ces yeej muaj ib txhia pej xeem Nplog tawm tsam tsis pom zoo nrog rau cov neeg zejzog ntawm ib cheeb tsam teb chaws South East Asia thiab cov koom haum NGOs mus txog rau cov neeg pov puag tej ib puag ncig tias yuav muaj teeb meem rau tej tsiaj nruag deg, tej ib puag ncig, txhawj txog cov standard seb uas puas tau zoo coj los siv, txhawj txog pej xeem nyob raws tus niam dej Mekong River tias tsam tsis muaj peev xwm ua tau lub neej li qub vim lawv rau tshem mus nyob txawv chaw txawv zos thiab yuav tau ua hauj lwm tshiab tsis yog txhom ntses los noj thiab muag li qub ces haj yam yuav ua rau lawv txom nyem los yog nom tswv ho tsis them nyiaj pauj rau lawv tej av thiab liaj teb raws li qhov tsim nyog.
Tab sis nom tswv Nplog yeej muaj lub hom phiaj xav tsim kom tau cov pas dej tauv no txog li 100 lub coj los ua hluav taws xob kom muag tau nyiaj coj los pab lub teb chaws no kom dim ntawm cov teb chaws txom nyem. Tab sis thaum ua tau tej hluav taws xob no muag rau tej teb chaws ib ncig li Thaib thiab Suav los yog lwm lub ces tseem tau rov qab yuav cov hluav taws xob kim dua coj los siv hauv Nplog teb thiab.
Joseph Akaravong los kuj tau kaw ib daim video clip los nug nom tswv tias leej twg yog tus yuav tau ris cov teeb meem no vim nom tswv tsis mloog pej xeem hais thiab yuam pej xeem Nplog ces thiaj muaj tej teeb meem pas dej tawg thiab dej nyab no. Yog nws hais ntau ces nws tseem yuav raug teeb meem thiab.
Kuj tseem muaj pej xeem Nplog uas yog Boy BigBoss los yog Boy Binho uas muaj neeg caum qab yuav laug txog 40,000 tus tau yws tsis txaus siab tias uas li cas Nplog tej chaw nthuav xov xwm tsis tshaj xov xwm txhua txhua 1 teev twg tias seb muaj xwm txheej dab tsi txog tej teeb meem dej nyab no lawm. Ces nws thiaj qhia tias Nplog tej xov xwm thiab Nplog tej TV tseem tso cov kev haub tau yaum thiab tso dab neeg rau tej neeg saib xwb yeej tsis tshaj tej xov xwm no rau pej xeem Nplog paub thiab tseem cia pej xeem Nplog ua tus yees tej duab thiab tshaj tej xov xwm no rau pej xeem Nplog tau mloog tau pom tau paub xwb. Nws tseem hais tias nws yuav mus tshaj cov xov xwm no rau pej xeem Nplog mloog thiab tau saib thiab kom yog nws ploj lawm vim hais tej lus tsis txaus siab no kom lwm tus ho pab mus nrhiav nws thiab.
Ces txij hnub tim 26/7/2018 los thiaj muaj Nplog tej chaw nthuav xov xwm tshaj txog cov teeb meem no ntau tuaj ntxiv thiab muaj Thaib cov chaw nthuav xov xwm coj nws daim video mus tshaj tawm ua lus thaib muaj neeg saib tshai 1 million tus lawm.#
Listen to SBS Radio Hmong program at www.sbs.com.au/hmong on Thursday 6pm AEST (Australian Eastern Standard Time) and Sunday 11am AEST.
You can download SBS Radio App from App Store at https://apple.co/2pLgvCX and from Google Play at http://bit.ly/2GuIRv or you can download podcasts news in Hmong and English from www.sbs.com.au/podcasts/yourlanguage/hmong. and listen to Hmong news in iTunes at https://itunes.apple.com/us/podcast/sbs-hmong/id814724207?mt=2
Besides, you can follow us, click like, share and comments at #SBSHmong website at www.facebook.com/sbshmong.
Call to have a chat with SBS Radio Hmong Program on + 61 3 9949 2259 or sent your comments to comments@sbs.com.au.
