Lub caij uas tseem muaj tej nuj nqes ntau yam kim tuaj ntxiv ua ntuv zus no peb coob leej ntau tus yeej siv txhua yam cib fim los txuag nyiaj.
Yeej muaj xov xwm qhia tias muaj neeg Australia ntau millions tus tau ncua tsis mus kho mob vim tsis muaj peev xwm them tej nqe kho mob ua ke no los kuj muaj lwm cov neeg Australia kuj tau siv lawv tej nyiaj super coj los kho los yog rho hniav thiab.
Thiab cov kev xav siv peb tej nyiaj kom tau txiaj ntsim tsham qub ntxiv, tau ua rau peb tej neeg coob tuaj ntxiv tau mus txawv teb chaw rau ntau lub teb chaws li Thaib teb thiab Turkey rau lub caij ntau xyoo tsis ntev los no kom tau siv cov kev kho mob pheej yig zog, kho hniav los yog rho hniav los sis phais kho lub cev ib yam twg kom zoo nkauj — uas peb hu cov kev kho mob txawv teb chaws no ua ua 'medical tourim'.
"Australia, ces yeej yog lub teb chaws uas muaj teeb meem rau tej nqe kho mob ua ke nrog rau tej nqe siv ua lub neej ntau yam — uas cuam tshuam txog ob yam li cov kev pab tsim ntau yam kev kho mob siv los yog cov kev pab nyiaj rau cov Medicare thiab tej nqe them yuav nyiaj tuav pov fwm tswj kev noj qab haus huv ntiag tug (Private health insurance) — uas yeej ib nyuag kom zog thiab yeej ib nyuag tsis tshuaj muaj peev xwm siv tau ntau cov kev kho mob no ntawm teb chaws Australia no,'' raws li Tim Bennet uas yog tus kws paub zoo txob kev tuav pov hwm (insurance) ntawm lub koom haum Finder tau hais.
Raws li zeskais Mark Frydenberg uas yog tus tswj tej hauj lwm health policy and advocacy committee ntawm lub koom haum Royal Australian College of Surgeons (RACS) hais ces tej neeg Australia thiaj li mus rau lwm lub teb chaws kom thiaj siv tau tej kev kho mob no kom sai zog.
Nws tau hais tias "Muaj qee zaus ces yeej yuav tau tos ntev heev mam li tau siv ib cov kev phais mob twg ntawm zej tsoom tej tswv kho mob — ces thiaj ua rau ib txhia pom tias yus cov kev yuav tau rho nyiaj ntiag tug them siv ib co kev kho mob no kuj yog tej yam kim heev thiab. Ces thiaj ua rau muaj ib txhia neeg coob tuaj ntxiv mus siv cov kev kho mob txawv teb chaws thiab thiaj tsis siv hauv lub teb chaws lawm.''
Tej zaum yuav pab txuag tau ntau txheeb dollars — tab sis tej zaum koj kuj tseem yuav tau them qee yam nqe koj tsis faj txog thiab
Tsis hais yog cov kev kho mob, rho/kho hniav los yog phais kho ib yam twg ntawm lub cev kom zoo nkauj yeej yuav pheej yig dua ntau txheeb dollars yog tias yus siv tej kev kho mob no ntawm lwm lub teb chaws.
Tab sis kuj tsuas nyob rau ntawm seb yus ho xav siv cov kev kho mob hom twg los yog kho rau qhov twg, thiab seb yus ho puas muaj private health insurance siv ntawm Australia li cas — thiab yus ho yuav tau them ua ntej npaum li cas thiaj yuav claim tau - tej no yog cov yuav qhia tias yus yuav tau them tej nqe kho mob ntawd npaum li cas, raws li Bennett tau hais.
Nws tau hais tias "Feem ntau mas yus kuj txuag tau nyiaj thiab, tab sis tej zaum yus kuj yuav tau them tej nqe kho tag nrho pheej yig dua li ntawm 10 feem pua. Piv txwv li yog phais ntawm Australia ces raug $30,000 tab sis tsuas them $10,000 yog phais ntawm teb chaws Türkiye (Turkey) xwb."
Neeg Australia yog tej neeg pheej mus kho mob txawv teb chaws kom txuag tau nyiaj thiab tsis txhob tau tos ntev mam tau siv zej tsoom tej tsev kho mob. Source: Getty / petrunjela/Getty Images
"Yog tias muaj dab tsi tshwm sim cuam tshuam txog yus cov kev mus los lawm ces feem ntau travel insurance yeej tsis cover yus. Thiab yog tias ho tseem muaj lwm yam mob cuam tshuam thiab, uas tej zaum kuj tsis cuam tshuam txog tias tej kws phais puas txawj phais zoo npaum li cas, tab sis tej zaum kuj yog tim yus lub cev ib yam dab tsi — uas tej no los tej travel insurance yeej tsis cover thiab ... ces thiaj yuav ua rau muaj ntau yam nqe ntxiv rau yus them,'' raws li Bennett tau hais.
Tej teeb meem yuav muaj tau los ntawm cov kev mus phais mob txawv teb chaws
Yeej tib yam li tej nqe kho mob thiab, uas yeej yuav muaj kev phom sij rau cov kev kho mob txawv teb chaws tsuas nyob rau ntawm seb yus kho siv hom kev kho mob twg los yog yus ho mus kho qhov twg xwb.
Frydenberg tau hais tias ''yeej muaj kev sib txawv txav deb heev'' ntawm Australia tej kev kho mob thiab lwm cov teb chaws cov kev kho mob.
Nws tau hais tias "Yeej muaj qee cov kev phais thiab tej chaw kho mob txawv teb chaws uas tej zaum yeej siv tau zoo raws li qhov tsim nyog; thiab tej zaum kuj muaj tej kws phais mob uas yeej kawm txawj thiab paub phais tau tej neeg mob zoo, thiab tej zaum yeej muaj tej chaw kho mob zoo los yog tej zaum kuj muaj cov kev kho mob zoo heev siv. Tab sis tsuas yog tej zaum yog tej yam uas peb tsis tshua paub txog xwb.''
Frydenberg tau ceeb toom tias txawm ntawm tej teb chaws uas muaj tej cai siv muaj ntsis sib xws li Australia los tej zaum kuj tseem yuav muaj ntau yam ua yuam kev tau thiab.
Nws tau hais tias "Piv txwv li, yog tias koj phais ib yam mob twg li koj mob tej hlab ntsha yug lub plawv txhaws ... ces seb ho puas muaj ib pab kws paub ntsuam thiab kho tej kab mob cuam tshuam txog plawv thiab hlab plawv los nrog daws tej teeb meem no, los sis yog ho puas muaj ib pab neeg uas muaj peev xwm kho tau tej hlab plawv txhaws yog tias muaj tej teeb meem no?,''
"Peb yeej cia siab tias yuav tsis muaj tej no tshwm sim rau ib tug neeg mob twg uas mus phais, tab sis kuj yog tej yam tsis muaj hmoo uas qee zaus yeej muaj tej xwm txheej no tshwm sim rau tej neeg mob rau ib lub caij twg, thiab yus los yeej xav paub tseeb tias tsis hais yus mus phais kho mob rau qhov twg li tej chaw kho mob ntawd yeej yuav ua tib zoo npaj los daws tej teeb meem uas tsis faj txog no.''
Tsis yog tias cov kev mus kho mob txawv teb chaws yuav tsis muaj teeb meem dab tsi hlo li thiab. Source: Getty / Halfpoint Images
Nws tau hais tias "Ib yam teeb meem ntawm ntau yam uas tej zaum yuav tshwm sim tau cuam tshuam txog ib co kev phais mob twg ces yog tej xwm txheej ntshav khov ntawm tej ceg, thiab yuav ua rau muaj teeb meem rau tej ntsws. Tej zaum tej no kuj yuav yog lwm yam mob cuam tshuam uas yuav raug kev phom sij loj heev. Tsis tas li ntawd los kuj yog ib co mob cuam tshuam uas tshwm sim rau lub caij uas yus caij dav hlau mus deb rau ib qho twg, ces yog thaum muaj ob yam xwm txheej no cuam tshuam lawm, thiaj yuav ua rau muaj teeb meem loj tuaj ntxiv.''
Tsis tas li ntawd los Frydenberg kuj xav kom tej neeg "totaub tias leej twg yog cov yuav tswj tej xwm txheej mob cuam tshuam rau lub caij yus tseem rov qab los tsev ntawd thiab yog tias yus ho mob ... vim tej kws kho/phais yus nyob txawv teb chaws thiab tsis muaj peev xwm yuav ntsib tau ntawm yus lub teb chaws no.''
Nom tswv Australia los kuj tsuas muaj peev xwm muaj tsawg cov kev pab rau tej neeg mus kho mob txawv teb chaws xwb thiab.
Raws li tsoom fwv lub vas sab Smart Traveller hais ces, tsoom fwv kuj muaj peev xwm hu rau yus tsev neeg ntawm teb chaws Australia no yog tias yus tso cai, thiab yuav qhia ib co chaw kho mob ntawm teb chaws no, los yog tej kws kho mob, thiab tej kws lij choj uas paub hais lus Askiv rau yus.
Tab sis lawv kuj tsis muaj peev xwm qhia kiag kom yus mus siv ib cov tsev kho mob twg los yog ib co kws phais mob twg, los yog lawv tsis muaj peev xwm ua cov sawv cev lij choj rau yus los yog tsis muaj peev xwm raug tes txog tej txheej txheem plaub ntug thiab.
Tsis tas li ntawd los tsoom fwv kuj tsis muaj peev xwm them yus tej nqe kho mob, tsis muaj peev xwm npaj tshem yus ntawm ib qho chaw rau lwm qhov, los yog tsis them tej nqe hais plaub, los yog pab kom yus tsis txhob raug teeb meem los yog tsis txhob raug kaw yog tias yus tsis muaj peev xwm them yus tej nqe.
Bennett thiaj tau hais tias ntawm nws tus kheej lawm ces nws yeej tsis xav ntsib tej teeb meem no.
Nws tau hais tias "Yog tias yus kho/rho hniav txawv teb chaws thiab tsuas pab yus txuag tau ob peb txheeb dollars xwb, ces kuv xav tias tej zaum kuj tsis tsim nyog thiab. Tab sis yog tias yus ho txuag tau txog li ntawm $20,000 txog $30,000 lawm ces kuj zoo — tab sis yeej ua rau yus yuav tau them kim heev thiab, thiab yuav tau them kim rau ib co kev phais mob loj ... ces kuj tseem yuav muaj lwm yam teeb meem cuam tshuam nrog thiab. Ces kuv thiaj xav tias tej nyiaj yus txuag tau ntawd thiaj tsis tsim nyog rau kuv dab tsi, tab sis tej zaum kuj txawv rau lwm tus neeg thiab.''
Frydenberg yeej lees paub tias muaj ib txhia neeg mob ces kuj tau poob rau ob co xwm txheej uas raug kev phom sij rau yus los yog tej xwm txheej uas yus tsis xav tau thiab.
Nws tau hais tias "Kuv yeej tsis xav hais rau tej neeg tias 'kom tsis txhob mus siv cov kev kho mob txawv teb chaws.' Piv txwv li tej zaum kuj yuav muaj ib txhia uas yeej tau tos ntev heev thiab xav siv ib yam kev kho mob twg, uas ua rau lawv tsis tshua tau txais kev noj qab nyob zoo vim pheej yuav tau tos siv ib yam kev kho mob twg — tab sis tej no kuj yog ib co xwm txheej uas ua rau peb lub koom haum sawv cev rau tej kws phais mob txhawj xeeb heev thiab.''
Puas yog tias koj yeej tseem xav npaj mus kho mob txawv teb chaws? Ua tib zoo xyuas kom koj npaj tau zoo.
Bennett thiab Frydenbert yeej tau hais tias yog tias koj tseem npaj xav mus kho mob txawv teb chaws ces yog tej yam tseem ceeb xav kom koj yuav tau xyuam xim ceev faj npaum li qhov koj muaj peev xwm ua tau.
Frydenberg tau hais tias ''Yuav tau muaj qee cov kev ceev faj thiab ua tib zoo xyuas raws li qhov tsim nyog ua. Thiab yuav tsum tau nrog tej neeg uas tau siv tej kev kho mob ntawd los yog tej chaw kho mob ntawd tham, los yog yuav tsum tau txheeb seb tej kws kho mob, tej kws phais ntawd puas paub puas txawj kho tau zoo los yog muaj qualification ua tau tej hauj lwm ntawd tiag. Yus yuav tsum tau ua tib zoo xyuas kom muaj cov kev sab laj raws li qhov tsim nyog ua ntej yuav phais/kho mob kom siv tau cov kev kho mob no raws li qhov tsim nyog siv, thiab npaj tej txheej txheem tsim nyog npaj los siv, kom yus thiaj paub txog tej kev kho mob no txaus thiab ntxaws tias tej zaum ho yuav muaj tau teeb meem dab tsi, los yog ho yuav tau txais txiaj ntsim dab tsi, kom yus thiaj muaj peev xwm txiav txim siab tau raws li qhov tseeb thaum yus mus phais /kho mob ntawd.''
Bennett tau hais tias cov kev coj ntau cov chaw kho mob coj los sib piv yog tej yam tseem ceeb uas yuav pab kom yus raug teeb meem tsawg zog.
Nws tau hais tias "Yog yus mus kho mob txawv teb chaws ces yus yuav tau nti yus kuab puab xwb. Travel insurance thiab health insurance los yeej tsis cover yus. Ces yus thiaj tuav raws yus txoj siab ntawm yus tes thiab nyiaj txiaj los yus yuav tau ua tus them tag nrho. Yog li ntawd yam tsawg tsawg uas yus muaj peev xwm ua tau coj los pab yus ces yuav tsum tau ua cov kev teeb txheeb kom ntxaws npaum li qhov yus muaj peev xwm ua tau txog tej kev kho mob uas yus xav siv ntawd pab rau yus.''
Tsoom fwv lub tuam chav Smart Traveller los kuj taw qhia kom sab laj nrog yus tus kws kho mob ntawm Australia txog yus tej tswv yim uas xav mus kho mob txawv teb chaws, thiab nrog lawv tham seb lawv ho tawm tswv yim li cas ua ntej yus yuav mus kho txawv teb chaws.
Tsis tas li ntawd los kuj tau taw qhia kom yus yuav tau txheeb seb puas tau txais kev noj qab nyob zoo li cas ua ntej lub sij hawm yam tsawg tshaj li 6 limtiam ua ntej yus yuav mus kho mob txawv teb chaws, thiab kom coj ib tug neeg mus pab yus, los yog ua tus txiav txim siab sawv cev rau yus yog tias ho muaj ib yam dab tsi yuam kev, thiab ua tib zoo xyuas kom yus sau tau daim ntawv will tshiab qhia tias yog tsis muaj yus lawm yuav ua li cas.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
