Reddit thiab Kick uas yog ib co chaw tso cov live-streaming video kuj raug coj los teev nrog Australia ntau cov social media platforms uas txwv tsis pub tej me nyuam hnoob nyoog qes dua 16 xyoo siv.
Txij hnub tim 10 lub 12 hlis ntuj xyoo 2025 no mus ces yuav txwv tsis pub Australia tej me nyuam hnoob nyoog qes dua 16 xyoo siv ntau cov platform, thiab tsuas zam rau tej uas qhia kom tau txais kev noj qab nyob zoo thiab qhia ua kev kawm, suav cov WhatsApp thiab Meta's cov Messenger Kids xwb.
Tsoom fwv teb chaws thiaj tau qhia tias nws cov kev kho cov kev txwv no yuav teev Reddit thiab Kick nrog thiab.
Facebook, Instagram, Snapchat, TikTok, YouTube and X thiab ces yog ib co ntawm ntau cov uas yuav tsum tau ''npaj ib co xub ke raws li qhov tsim nyog'' los tiv thaiv kom tsis txhob pub tej me nyuam hnoob nyoog qes dua 16 xyoo qhib tej account siv ntawm lawv tej platforms.
Thiab yog tej tuam txhab technology loj no tsis ua li hais no ces lawv yuav raug nplua nyiaj txog li ntawm AUD$49.5 million.
Tej neeg siv tej social media yuav tsis raug yuam kom qhia lawv tej ID uas nom tswv ua rau lawv siv coj los ua cov qhia tej neeg cov hnoob nyoog hauv online thiab yuav tsum xyuas kom siv tau lwm yam xub ke.
Tsoom fwv tsab cai tshiab thiaj teev kom tej tuam txhab no yuav tau yoog thiab ua raws ''los txheeb thiab txwv tsis pub siv los yog muab tej accounts ntawm tej neeg hnoob nyoog qes dua 16 xyoo tshem tawm" tsis pub siv.
Ces thiaj li yuav muaj 1.5 million Facebook, Instagram, YouTube, TikTok, Threads and X accounts yuav raug txwv tsis pub siv rau lub sij hawm tsawg dua li ob lub hlis ntxiv no lawm.
Julie Inman Grant uas yog tus coj ntawm lub koom haum eSafety Commissioner yeej tau xub sau ntawv rau lub tuam txhab social media platform Reddit thiab lwm cov tuam txhab hais kom lawv yuav tau txheeb seb lawv yuav los ua tej kev txwv no li cas.
Communications Minister Anika Wells uas yog Australia tus nom teb chaws uas tswj cov hauj lwm sib txuas lus (Communications Minister) tau hais tias nws yeej tau nrog tej tuam txhab social media tseem ceeb ntau lub tham lub hlis dhau los lawm, kom lawv ''nkag siab tias yuav tsis muaj chaw yeb rau lawv tsis ua raws li tsab cai no tau teev tseg kom ua."
Nws tau hais tias "ESafety yeej tau txheeb yim (8) lub social media platforms uas hais kom yuav tau txwv tsis pub tej me nyuam muaj hnoob nyoog qes tshaj 16 xyoo siv tab sis lawv tseem yuav tau los txheeb ua ntuv zus, tab sis tej lists ntawm tej tuam txhab no yeej tseem muaj cov kev pauv hloov tas mus li,"
"Tsis yog peb xav kom lawv ua kom tau tej hauj lwm no zoo tshaj plaws? Tab sis yog tej yam uas peb xav kom muaj cov kev pauv hloov zoo."
Grant thiaj tau txhawb nqa kom tej niam txiv thiab tej hluas mus download lub koom haum eSafety Commission tej xov xwm thiab mus teev npe koom tej sob kawm webinar uas nug ntau yam lus nug txog cov kev txwv tej hnoob nyoog tsis pub siv social media uas lawv yuav teb rau sawv daws.
Nws tau hais tias "Cov kev ncua tsis pub tej me nyuam siv tej social media platforms no tej accounts yuav pab kom lawv muaj tej caij nyoog tseem ceeb los kawm thiab loj hlob, thiab tsis txhob muaj fej fwj chim uas tsis nco faj thiab tsis pom ntawm tej algorythm thiab cov kev pheej swb xov tooj saib tej posts los tsub nias los yog tsim teeb meem rau lawv."
Share
