Muab ntau lub zos ntawm nroog Sydney mus rau thaj chaw Blue Mountains, Central Coast thiab Wollongong kaw 2 limtiam pib txij 6pm hnub tim 26.06.2021 no mus txog ntua rau hnub tim 09.06.2021 ib tag hmo.
Nom tswv thiaj tau hais kom tej neeg ntawm tej chaw li hais los no yuav tsum nyob hauv tsev tom qab pawg nom tseem ceeb ntawm xeev New South Wales (NSW) tau rub ib lub rooj sab laj ceev heev tham txog tej xwm txheej no.
Tus kab mob Delta tau kis saib kawg nkaus rau 29 tus neeg tshiab nrog rau 17 tus uas nom tswv tau qhia rau hnub zwj Kuab (Friday) dhau los thiab.
NSW tus hau xeev Gladys Berejiklian thiaj hais kom tej neeg nyob ntawm tej zos no yuav tsum tau nyob twj ywm hauv tsev.
"Tsuas yog tias ntshe ho yuav tau tawm mus ua hauj lwm nraum zoov xwb, los yog mus kawm ntawv, los yog cov neeg ua hauj lwm tseem ceeb muaj peev xwm mus ua tau. Mus kho mob li mus sim seb puas kis kab mob COVID, mus hno tshuaj vaccine los yog kho lwm yam mob ces koj tau txais kev tso cai mus ua tau thiab tawm tawm ntawm koj tsev mus tu thiab saib xyuas lwm tus neeg txom nyem los yog xav tau txais kev pab cuam, los yog tsuas pub koj tawm mus yuav khoom noj khoom siv xwb."
Dr Kerry Chant uas yog tus coj xeev uas tswj cov dej num noj qab haus huv hais tias lub hom phiaj txwv yog xav kom tsis txhob muaj neeg sib kis ntxiv ces thiaj tau txwv 2 lub limtiam (14 hnub no).
Yog koj xav txheeb xyuas tias tej chaw twg yog cov chaw uas muaj neeg kis kab mob COVID-19 ces muaj peev xwm mus txheeb tau ntxiv ntawm no https://www.health.nsw.gov.au/Infectious/covid-19/Pages/case-locations-and-alerts.aspx
- Tej neeg ntawm teb chaws Australia yuav tsum nyob kom nrug ntawm lwm tus neeg yam tsawg li 1.5 metres. Txheeb seb koj lub xeev ho muaj cov kev txwv tsis pub neeg sib sau ua ke li cas ntxiv.
- Yog tias koj tau khaub thuas thiab muaj yam ntxwv mob lawm ces nyob twj ywm hauv tsev, thiab npaj hu nrog koj tus kws kho mob tham los yog hu rau lub chaw tswj xov xwm txog tus kab mob coronavirus (Coronavirus Health Information Hotline) tus xov tooj 1800 020 082 tham seb yuav ua li cas.
- Mloog tau xov xwm txog tus kab mob COVID-19 ua 63 hom lus tau ntawm sbs.com.au/coronavirus
- Xav kom koj yuav tsum tau mus txheeb tej nom tswv ntawm koj lub xeev: NSW, Victoria, Queensland, Western Australia, South Australia, Northern Territory, ACT, Tasmania cov kev taw qhia ntxiv.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Google podcasts, Spotify, thiab Apple podcasts los yog download SBS Radio App kom koj mloog tau SBS Hmong.
