Services Australia tau qhia meej rau SBS News tias Centrelink tau thim nyiaj $2.9 million rau tej neeg Australia 338 tus ntawm tag nrho 44,000 tus uas lawv tau them tej nuj nqes ntau tshaj qhov tsim nyog them rau lub koom haum no lawm.
Muaj tej neeg txog li ntawm 2,700 uas nom tswv yuav thim tej nyiaj tsib nqe rov qab rau no twb tau tas sim neej yuav txheeb tau tias lawv them tej nyiaj no ntau tshaj qhov tsim nyog rov qab rau nom tswv lawm, raws li tau muaj tsev kis xeev siab cov kev nug txog tej teeb meem no.
Chris Birrer uas yog tus lwm coj uas tswj cov kev them nyiaj ntawm Services Australia tau qhia rau Senate estimates tias tau muaj nws tej neeg ua hauj lwm tau kho cov kev them nyiaj rov qab rau lub 3 hlis ntuj xyoo no lawm.
Nws hais tias "Yeej tau muaj tej xwm txheej no xyoo 2007. Thiab yeej muaj qee cov xwm txheej li no uas tau tshwm sim rau lub caij xyoo 2017-19 thiab."
Raws li tau muaj ib tsab ntawv cej luam ntawm Guardian Australia lub 10 hli ntuj ces Services Australia qhia tias tau ua cov txheej txheem yuam kev rau cov automatic deductions, uas tsis cuam tshuam txog cov robodebt scheme uas tam sim no tseem tab tom muaj kev hais plaub loj tshaj plaws ntawm Australia tej keeb kwm..
Birrer tau qhia ntxiv tias dua ntawm tej neeg uas nom tswv tau thim nyiaj rov qab rau ntawd, tseem muaj 111 tus neeg Australia raug txheeb tau tias lawv tsis tiv nom tswv nqe dab tsi thiab.
Thiaj muaj ib tug kis ntawm Services Australia tau qhia rau SBS News tias lawv twb tau sib txuas lus nrog tej neeg no rau yav lig lub 10 hlis ntuj xyoo 2025 no lawm, tab sis nws yeej tau ua tib zoo tshuaj ntsuam tej xwm txheej no ntxaws txij lub 3 hlis ntuj los lawm "kom paub meej tseeb thiab paub qhov tseeb".
Tab sis lub caij tau muaj tej xov xwm ntau tuaj ntxiv raug coj los qhia tias Services Australia tseem ntsib teeb meem nyuaj ntau yam rau cov kev them tej nyiaj no rov qab, Penny Allman-Payne uas yog Greens tus nom tswj dej num pab cuam zej tsoom hais tias ''tau ua rau nws ceeb thiab tsis xav ntseeg li tias'' yeej tsis muaj peev xwm daws tau tej teeb meem no dab tsi li.
Muaj ib txhia ces tsoom fwv yuav tau thim ntau tshaj $5,000 rov qab rau lawv
Birrer tau qhia rau tsev kis xeev siab pawg rooj txheeb tej teeb meem no tias muaj tej neeg no txog li ntawdm 2 feem pua (txog li ntawm 880 tus neeg Australia) yog cov tau them tej nuj nqe ntau tshaj qhov tsim nyog them rau nom tswv lawm, thiab ntshe tej zaum nom tswv yuav tau thim tshaj li ntawm $5,000 rov qab rau lawv.
Hos tej nyiaj uas twb tau them rau 338 tus neeg uas tau txais tej nyiaj no lawm ces ib tug neeg twg tau nyiaj xam raws tus zauv nrab txog li ntawm $8,579.
Ntxiv ntawd los kuj tseem muaj tej neeg no txog li ntawm 31 feem pua (txog li ntawm 13,000 tus) ces nom tswv yuav tau thim nyiaj rau lawv txij li ntawm $51 mus txog rau li ntawm $500.
Chris Birrer uas yog tus lwm coj uas tswj cov kev them nyiaj ntawm Services Australia, tau qhia rau Senate estimates tias lawv raug ceeb toom txog tej xwm txheej no lub 3 hlis ntuj. Source: Supplied
Nws tau tshab txhais tias lawv yuav xub txheeb tej neeg uas yuav tau thim nyiaj ntau rov qab rau tso.
Nws tau qhia rau Senate estimates tias "Peb yeej tau pib npaj ib co txheej txheem yuav ua raws ib theem ib theem lawm, li xub pib thim tej nyiaj ntau uas them tshaj rov qab rau tej neeg, kom lawv thiaj tau tej nyiaj no sai rov qab."
Tej neeg uas them nyiaj rov qab rau tsoom fwv ntau tshaj qhov tsim nyog lawm, ces yog cov neeg tau cov aged-care pension thiab yeej tau muaj tej neeg no txog li ntawm 2,700 tus twb tau sim neej ua ntej yuav txheeb tau tej teeb meem no.
Birrer thiaj tau hais tias , lawv (Centrelink) yeej tau tab tom xyuas kom thim tau tej nyiaj no rov qab rau tej cuab yig uas muaj tej neeg tas sim neej no.
"Peb yeej sib cuag nrog tej neeg muaj feem cuam tshuam thiab tej neeg uas tsim nyog tau txais tej txiaj ntsim no, uas yeej yog ib co txheej txheem uas peb ua."
'Cov kev tsis txaus ntseeg' rau cov kev ncua
Allman-Payne tau qhia rau Birrer tias nws yeej ''tsis xav ntseeg'' li tias uas li cas Services Australia yuav siv sij hawm ntev ua luaj los them tej nyiaj no rov qab rau tej neeg.
Ces Birrer thiaj tau tshab txhais tias lawv tej system yog ib co ''system loj thiab sib chab sib chaws heev".
Muaj ib txhia ces nws tau hais tias lawv tej chaw ua hauj lwm yeej paub tias tej neeg cuam tshuam twg tau tej nyiaj no thim rov qab rau lawv lawm, tab sis tej nyiaj them rov qab no ''yeej tsis raug teev ua ib co pov thawj nrog tej neeg no tej ntaub ntawv li."
Ib tug kis ntawm Services Australia tau qhia rau SBS News tias ''yog tej yam tsim nyog'' uas yuav tau ua tib zoo txheeb xyuas ces thiaj siv sij hawm dua.
Penny Allman-Payne uas yog ib tug nom kis xeev siab ntawm pab nom Greens tau hais tias ''yog tej yam tsis txaus ntseeg lawm tias'' tsoom fwv ib lub tuam chav tsis paub txog tej xwm txheej nws ua yuam kev rau lub caij yuav laug txog 20 xyoo. Source: AAP / Mick Tsikas
Nws tau hais tias "Tej welfare system ces yeej muaj teeb meem ntau yam li tej no vim Labor thiab Liberals tau siv ntau caum xyoo los thab zes tej neeg tau txais cov kev pab cuam welfare, tsis yog ua tib zoo xyuas kom zej tsoom cov kev pab cuam no kub siab tiag tiag txog lawv."
Txawm tias Services Australia tsis muaj peev xwm yuav qhia tau tias yuav yog lub caij twg kiag thiaj daws tau tej teeb meem no, thiab tau muaj nws ib tug kis tau qhia rau SBS News tias tseem muaj tej neeg uas raug tej teeb meem no ntau tshaj 60 feem pua tsis yog tej neeg tshiab tam sim no thiab.
Lawv tau hais tias "Peb tsuas muaj peev xwm thim tau nyiaj rau tej neeg uas muaj tej bank accounts uas tseem siv tau tam sim no xwb los yog tseem muaj peev xwm sib txuas lus tau nrog lawv xwb."
Share
