Lub tuam chav Department of Home Affairs tau qhia tias tsoom hwv Australia tau los txheeb xyuas tej neeg thov xeem uas pej xeem tej ntaub ntawv ntau tuaj ntxiv txog li 177% lawm, pib txij li tim 1 lub 6 hlis ntuj txog tim 30 lub 9 hli ntuj xyoo 2019 no. Uas yog muaj neeg coob tshaj 93,000 tus neeg tsiv teb tsaws chaw tshiab uas yuav tau los ua pej xeem piv rau tsaib no nyuam qhuav muaj txog li ntawm 34,000 tus xwb.
Tsis tas li no los nom tswv yeej qhia tias nws pom zoo rau cov neeg txog li 80% ntau ntxiv tuaj mus thov xeem ua pej xeem thiab yeej muaj tej neeg tsiv teb tsws chaw ze txog li ntawm 60% thov tau los ua Australia cov pej xeem rau xyoo 2018 lawm thiab. Nom tswv Australia qhia tias tos ho ua tau tej hauj lwm li hais no los twb vim yog nws tau tshwm nyiaj thiab nrhiav neeg los pab lis tej neeg cov ntaub ntawv thov xeem, mus xeem ua pej xeem ntawd.
David Coleman uas yog Australia tus pwm tsav lis cov dej num tsiv teb tsaws chaw, thov ua pej xeem, cov neeg tsiv teb tsaws chaw thiab Australia ntau cov neeg zejzog tau qhia tias tseem yuav muaj tej neeg mus thov ua pej xeem Australia coob ntxiv tuaj thiab.
Mr. Coleman hais tias cov kev thov tau los ua pej xeem no yeej yog ib feem ntawm peb haiv neeg no thiab yog ib yam qhia tias peb yuav ua raws li peb tej kev coj taug ua zoo thiab peb tej kev ntseeg.
Txawm li cas los yeej tseem muaj cov neeg tshaj 200,000 tus uas tseem tos kom tsoom hwv Australia los txheeb xyuas lawv tej ntaub ntawv thov xeem ua pej xeem Australia tam sim no uas tseem yuav tau los nrog xyuas thiab.
