David Littleproud uas yog tus coj pab nom Nationals tau qhia tias yuav tsis rov qab mus koom ua pab nom koom tswj nrog pab nom Liberals ntxiv lawm.
Littleproud thiab Sussan Ley uas yog tus coj pab nom Liberals tau sib ntsib ua zaum ob hnub zwj Quag (Tuesday) sawv ntxov sib tham seb puas pom zoo tsim pab nom koom tswj, uas yeej ib txwm tau kos xyeem mem tes pom zoo tom qab tau muaj ib cov kev xaiv tsa twg los yog muaj cov kev hloov tus coj tshiab.
Yeej tau muaj xov xwm qhia tias Ley los yeej tau txhawb nqa kom muaj tej kev sib khom no uas yuav los txheeb tej nom zaum thawj hau rooj raws li ib pab nom twg seb muaj coob npaum li cas ntawm tus nom koom tswj, tsis yog txheeb raws ib pab nom twg tej cai.
Txawm li cas los Littleproud tau hais tias pab nom Nationals ''yeej yuav ua nws ib pab nom kheej xwb.''
Nws tau hais tias nws spab nom ''yeej tsis tshua txaus siab'' rau ntau yam hauj lwm li nuclear tam li yog ib feem ntawm cov kev tsim hluav taws xob siv, $20 billion dollars uas pab rau tej zos toj siab thiab tej fwj chim ntawm tej kiab khw supermarkets.
Nws tau qhia rau tej neeg nthuav xov xwm hnub zwj Quag (Tuesday 20.05.2025) tias:
"Kuv yeej tau hwm cov kev sib tham nrog Sussan Ley tag kis no sawv ntxv, yeej tau zaum tsaws tham, thiab tau qhia meej tias peb yeej tseem qhib kev dav, thiab yeej hwm tej uas Sussan tau hais,''
"Lawv tseem tab tom rov qab los tshawb nrhiav lawv, thiab peb yuav pub cib fim rau lawv ua yam pab nom National Party tsis hais dab tsi li.''
Pab nom Nationals los kuj xav kom qhia meej tias peb yuav tsis ua raws li tej cai ntawm tej nom tseem ceeb los tswj kom muaj kev koom npoj, txhais tias tej zaum lawv muaj peev xwm tawm suab tsis pom zoo nrog pab nom Liberals tej cai. Txawm tias tso cai rau tej nom zaum nram qab rooj ua tau los raws li ib txwm ua ces tej nom zaum thawj hau rooj tsis muaj peev xwm ua tau.
SBS nkag siab tias cov kev tawm suab kom cais yeej tsis yog ib cov kev tawm suab pom zoo raws tib seem, txawm li cas los kuj tau cov suab feem coob ntawm nws pab nom.
Kevin Hogan uas yog tus lwm coj ntawm pab nom Nationals yeej tau xaiv yuav ua li no txawm tias nws tej nom yuav tsis tau ua ib co nom ntawm lwm pab nom teb chaws, uas yuav ua rau lawv tau nyiaj hlis ntau zog thiab tau peev txheej ntau zog.
Pab nom Nationals yeej tau hais thiab xav kom ua raws li qhov lawv xav tau tom qab uas lawv tseem yeej tag nrho lawv tej rooj nom hauv tsev kis xeev qes thiab tsuas suab ib lub rooj nom kis xeev siab rau lub caij sib tw xaiv tsa tsoom fwv teb chaws xwb. Tab sis pab nom Liberals tau swb nws 12 lub rooj nom hauv tsev kis xeev qes lawm.
Littleproud tau hais tias nws yeej tsis xav muaj kev cuam tshuam nrog pab nom Liberal cov kev ''rov qab los kho thiab txheeb seb lawv xav ua pab nom zoo li cas'' lub caij uas Ley tseem ua tus coj.
Pab nom Liberals thiab Country Party yeej tau koom tsim thawj tug tsoom fwv xyoo 1949 lub caij thawj pwm tsav Robert Menzies ua nom.
Txawm li cas los kuj tau sib cai ua ob pab nom qee lub caij txij li tau tsim pab nom koom tswj los. Zaum kawg uas tau sib cai yog xyoo 1987 thaum uas Nationals tau cai tawm rau lub caij tsawg dua 6 hli ua ntej yuav kho cov kev tsis haum xeeb thaum yuav muaj cov kev xaiv tsa tsoom fwv teb chaws xyoo ntawd.
'Tseem muaj cib fim tsim pab nom koom tswj': Yuav muaj dab tsi tshwm sim ntxiv?
Littleproud yeej tau qhia meej tias ''nws yeej tseem pub cib fim'' rau cov kev los tsim pab nom koom tswj rau yav tom ntej, thiab yeej yuav los sib tham nrog Ley li ib txwm tham txog lub neej pem sub ntawm cov kev koom ua pab nom koom tswj.
Nws tau hais tias "Vim li ntawd peb thiaj tau sib sau ua pab nom koom tswj los tau ntev tshaj 80 xyo0 thiab kuv xav tias peb yeej yuav tsim tau ib pab rau yav pem suab,''
Littleproud tau hais tias tsis yog tej yam zoo uas Nationals pheej yuav mus txheeb lwm pab nom tej cai thiab nws tsuas xav kom nws yog ib pab nom uas sawv cev rau Australia tej zos toj siab xwb, Liberals xav tau sij hawm los txiav txim ntau yam uas tseem ceeb rau lawv.
Nws tau hais tias "Yeej yuav muaj ib zaug twg uas yeej yuav rov qab los muaj cov kev sib cav muaj ceem los sis hauj lwm ntawm neeg Australia tias peb yog ib pab nom rau lwm tus xaiv dua ntawm Anthony Albanese,''
Nws tau qhia meej tias pab nom Nationals yuav sib tw nom rau cov kev xaiv tsa tsoom fwv teb chaws ntxiv tom ntej no kheej yo tias tsis muaj peev xwm sib khom pom zoo tsim tau pab nom koom tswj nrog pab nom Liberals.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follw los yog lwm cov podcasts platforms (iHeart, Amazon Music & Podcasts).
