Raws li tsoom hwv New Zealand lub vas sab tswj cov kev tsiv teb tsaws chaw (The New Zealand government immigration website) tau qhia, txij hnbu tim 01 lub 10 hli ntuj xyoo 2019 no mus txhua tus neeg uas nyob ruaj hauv teb chaws Australia (All Australian permanent residents) uas xav mus xyuas teb chaws New Zealand yuav tsum tau mus thov cov e-visa uas yog cov New Zealand Electronic Travel Authority (NZeTA) los yog cov visitor visa tsuas yog tias ntshe koj yog yog pej xeem Australia lawm xwb thiaj tsis tas thov visa.
Txawm li cas los yuav tau them cov nqe e-visa no txog li NZ$12 yog koj xa ntawv mus thov cov visa no, thiab tej zaum yuav siv sij hawm li ntawm 4 hnub. Tab sis yog kom siv cov mobile app ces tej zaum tsuas siv sij hawm li 10 ntiag tiv thiab tseem them pheej yig dua txog li NZ$9 xwb. Tab sis koj tseem yuav tau them cov tourist tax txog li NZ$35 ntxiv thiab. Ntxiv ntawd los koj yeej tseem muaj peev xwm mus thov tau New Zealand cov e-visa hauv online ntawm lub vas sab immigration.govt.nz thiab.
Yog li ntawd New Zealand cov kev pauv hloov los siv cov e-visa tshiab no yuav ua rau 60 lub tebchaws dhau los uas tsis tas thov cov visitor visa mus rau teb chaws New Zealand yav dhau los yuav tsum tau mus thov cov e-visa no siv yog tias lawv nyob tsawg dua 3 hlis, nyob tshaj ces yuav tsum tau thov cov visitor visa siv.
Kawg no tej neeg uas xav thov cov e-visa mus xyuas teb chaws New Zealand tseem yuav tau qhia rau nom tswv New Zealand paub tias lawv puas tau ua txhaum cai dab tsi dhau los, puas muaj mob, thiab yuav tsum qhia kom tau tias muaj lub hom phiaj yuav mus ua dab tsi ntawm teb chaws New Zealand tiag mas thiaj li yuav thov tau cov visa no siv rau lub caij thiab sij hawm li lawv xav mus ntawd.
