Peb los xyuas seb tus tsoom hwv Scott Morrison uas yeej cov kev xaiv tsa tim 18.05.2019 dhau los thiab tau los ua Australia tus tsoom hwv teb chaws tshiab ntawd ho teeb tsa nws cov nom tseem ceeb los zaum thawj hau rooj li cas thiab yog leej twg, lawv ho lis tej dej num dab tsi xwb?
Scott Morrison tau los lees ua Australia tus thawj pwm tsav thiab Ken Wyatt los kuj tau los lees ua Australia tus pwm tsav lis cov laj fai pab rau Australia tej keeb cag neeg lawm tib yam li lwm tus nom lawm thiab.
Tus tsoom hwv Morrison no xaiv tau 7 tus poj niam nom los ntxiv rau nws cov nom lawm.
Josh Frydenberg yog tus nom tswj nyiaj txiaj rau tsoom hwv teb chaws Australia (Treasurer) hos Peter Dutton ces tau los ua tus pwm tsav Home Affairs Minister uas xyuas ntau yam tsis hais kev ruaj ntseg haiv, tswj caij lij choj (Tub ceev xwm), tsej tej xwm txheej emergency, tswj thiab pov puag ciam teb, tswj cov kev tsiv teb tsaws chaw , neeg thoj nam, kev thov ua pej xeem Australia mus txog rau cov dej num cuam tshuam txog ntau tsav neeg hauv teb chaws Australia.
Mathias Cormann tseem yog tus pwm tsav tswj lub tuam chav nyiaj txiaj li qub (Finance minister).
Briget McKenzie yog tus nom tswj cov dej num cog qoob loo (Agriculture Minister).
David Littleproud yog tus pwm tsav tswj cov peev txheej dej (Water Resources).
Christian Porter yog tus kws lij choj teb chaws thiab yog tus pwm tsav Minister for Industrial Relation.
Greg Hunt tseem yog tus pwm tsav tswj kev noj qab haus huv Health).
Michaelia Cash yog tus pwm tsav tswj cov dej num lagluam me.
Arthur Sinodinos yuav raug teeb tsa mus ua Australia tus nom lis teej faj ntawm teb chaws America.
Mitch Fifield ces yuav raug teeb tsa los ua Australia tus nom ua hauj lwm hauv koom haum nraj nrig tim koom haiv (Koom haum United Nations).
Malisa Price raug txib los ua tus pwm tsav tswj cov dej num ib puag ncig (Environment).
Paul Fletcher tau los lis cov dej num Communication portfolio.
Linda Reynolds los ua tus pwm tsav tiv thaiv teb chaws hloov Christopher Pyne.
Stuart Roberts tau los ua tus Cabinet and Minister for Government Services thiab National Disability Insurance Scheme uas yog cov kev pab cuam tej neeg puas cev.
Simon Birmingham yog tus pwm tsav tswj lagluam.
Mus saib tau ntxiv ntawm no: ABC news.
Tom qab uas pab nom Labor tau xaiv Anthony Albanese los ua nws tus coj tshiab lawm, ces nws tau cog lus tias yuav rov qab kho thiab txhawb nqa kom pab nom Labor yog ib pab nom pab tej neeg ua hauj lwm thiab pab tej neeg txom nyem li nws tej nom tau ua dhau los, thiab los txheeb xyuas tias yog vim li cas thiab yuav tau kawm cov sob kawm dab tsi uas tau ua rau Labor tau swb cov kev xaiv tsa tsoom hwv teb chaws rau hnub tim 18.05.2019 dhau los.
Tsis tas li no Mr Albanese tau cog lus tias yuav kub siab nrog xyuas kom Labor yuav tsum yeej cov kev xaiv tsa rau lub sij hawm 3 xyoos ntxiv no.
Mr Albanese qhia tias nws yeej pub lub cib fim sib txig rau tej poj niam thiab txiv neej los ua nom sib xwm yeem uas muaj 12 tug nom poj niam thiab 12 tug nom txiv neej ntawm nws pab nom Labor Party.
Tab sis leej twg raug xaiv los ua Labor cov nom tseem ceeb uas zaum thawj hau rooj?
Richard Marles tau los ua tus pwm tsav tiv thaiv teb chaws thiab ua tus lwm coj rau pab nom Labor Party.
His Bill Shorten uas yog pab nom Labor tus coj dhau los ces tau los lis cov dej num pab cov neeg puas cev (National Disability Insurance Scheme-NDIS).
Chris Bowen uas yog Labor tus treasurer dhau los tau los lis cov dej num tswj kev noj qab haus huv thiab Jim Chalmers tau los tswj txoj hauj lwm tuav nyiaj txiaj rau pab nom Labor lawm.
Hos Catherine King uas tswj cov dej num noj qab haus huv dhau los tau mus tswj cov dej num txhim kho cov hauv paus txhim kho (Infrustructure) lawm.
Tab sis tus nom uas muaj yeej loj tshaj plaws yog Kristina Keneally tau los ua tus pwm tsav Home Affairs thiab ua tus lwm coj hauv tsev kis xeev siab (Senate).
Hos Penny Wong ces tau los ua tus coj lub tsev kis xeev siab (Senate) rau pab nom Labor thiab tseem lis txoj dej num tam li tus pwm tsav lis laj fai pej kum (Foreign Minister) rau pab nom Labor ntxiv thiab.
Tanya Plibersek ces tau los tswj cov dej num kev kawm thiab xyaum qhia tej neeg kom muaj txuj ci thiab paub ua hauj lwm lawm.
