Penny Wong xav tau lus teb txog tej taug cawv methanal ua rau neeg Australia nruam sim

Tom qab tau ib xyoos uas Australia ob tug ntxhais hluas nyuam qhuav ntoj nkauj tau tas sim neej los ntawm cov taug cawv methanol ntawm teb chaws Nplog ces Penny Wong uas yog Australia tus nom tswj dej num txawv teb chaws hasi tias cov kev tshuaj ntsuam txog tej xwm txheej no ''tseem ua tsis tau zoo txaus".

Holly Morton-Bowles (left) and Bianca Jones (right) died from methanol poisoning after drinking contaminated alcohol at the backpacker hostel they were staying at in Laos. Credit: SUPPLIED BY 7NEWS/PR IMAGE

Mloog lwm yam xov xwm kaw ua suab tau ntawm no.

Penny Wong uas yog Australia tus nom tswj dej num txawv teb chaws hais tias nws yeej nrog Australia tej niam txiv uas muaj lawv tej ntxhais tau tas sim neej cuam tshuam txog cov taug cawv methanol ntawm teb chaws Nplog ntawd chim sib heev thiab tau nqua hu kom tsis txhob pub qhib lub tsev tos qhua uas ob tug poj niam no tas sim neej.

Bianca Jones thiab Holly Morton-Bowles uas muaj hnoob nyoob 19 xyoos tib yam thiab nyob ntawm nroog Melbourne yog ob tug neeg ntawm rau (6) tus uas tau tas sim neej tsaib no lub 11 hlis ntuj ntawm Nplog lub nroog Vang Vieng tom qab tau hau ib co cawv muaj tej taug cawv methanol xyaw.

Penny Wong thiaj tau sawv ib sab ntawm Michelle Jones thiab Samantha Morton uas yog Australia ob tug ntxhais uas tau nruam sim no niam, thiab lawv tau qhia txog cov program coj los qhia uas muaj hom phiaj pab kom tej hluas nyuam qhuav nto nkauj nto raug uas xav mus ncig txawv teb chaws tau txais kev nyab xeeb, thiab Wong tau hais tias nws yuav hais kom txheeb tau qhov tseeb tias vim li cas ob tug ntxhais no thiaj tas sim neej.

Wong tau hais tias cov kev tshuaj ntsuam ''uas tau ua dhau los yeej tseem ua tsis tau zoo txaus'', vim rau qhov kuv twb tau nug txog tej xwm txheej no 50 zaus nrog tsoom fwv Nplog lawm.

"Qhov uas kuv xav hais ces peb yeej tau qhia meej rau Nplog lawm tias tej xwm txheej no tseem ceeb heev rau Australia," raws li Wong tua qhia rau tej neeg nthuav xov xwm ntawm Melbourne hnub zej Quag (Tuesday).

"Yog tej yam tseem ceeb heev rau tej cuab yig, thiab yog tej tseem ceeb heev rau Australia tej zejzog. Thiab peb xav kom txheeb tau thiab paub qhov tseeb, thiab peb los yeej yuav hais meej li ntawd txuas ntxiv."

Wong tau hais tias nws yeej tau tsub nias kom Nplog tus nom lis teej faj (Lao ambassador) tsis ntev los no rau hnub zwj Hli (Monday) txog cov kev ua tau cov kev tshuaj ntsuam no qeeb, thiab nug txog tej xov xwm cej luam tias tej zaum yuav rov qab qhib lub tsev tos qhua Nana Backpackers Hostel siv dua.

Nws tau hais tias "Kuv yeej tau qhia meej rau nws (Nplog tus ambassador) lawm tias Australia xav kom tsis txhob qhib lub tsev tos qhua no siv ntxiv lawm."

Holly Morton-Bowles (Sab laug) thiab Bianca Jones (Sab xis) uas tau tas sim neej los ntawm cov taug cawv methanol ntawm ib lub tsev tos qhua uas nkawv so ntawm teb chaws Nplog. Credit: SUPPLIED BY 7NEWS/PR IMAGE

Raws li lub chaw nthuav xov xwm ABC tau tshaj tawm ces lub tsev tos qhua no los yeej tseem raug kaw txij li thaum uas tau muaj tej xwm txheej tas sim neej cuam tshuam txog tej taug cawv no los, txawm tias zoo li tau rov qab kho thiab tau muab tej phiaj ntawm lub tsev tos qhua no tshem lawm.

Txawm tias tsoom fwv teb chaws Australia yeej tau hais kom qhia qhov tseeb txog cov kev tshuaj ntsuam tej xwm txheej no, los tej nom tswv zos (Vang Vieng) yeej tsis qhia xov xwm dab tsi txog tej xwm txheej uas muaj neeg coob heev raug cov xwm txheej qaug cov taug cawv methanol no rau lub caij yuav laug txwm ib lub xyoos no li.

SBS News yeej tau sib txuas lus nrog Nplog lub tuam chav lis teej faj (Laos embassy) ntawm teb chaws Australia no tab sis lawv kuj tsis tawm tswv yim dab tsi.

Cov kev ceeb toom rau Australia tej hluas kawm tiav xyoo 12 uas ntoj ncig txawv teb chaws: 'Rov qab los tsev yam tau txais kev nyab xeeb'

Thaum uas ob tug leej niam no tau mus rau rau ntawm tshav dav hlau Melbourne uas nkawv tau yoj teg sib ntsib dua nrog nkawv ob tug ntxhais ntawd, ces nkawv kuj tau tsim ib daim yeeb yaj kiab muaj hom phiaj los qhia kom lwm tus hluas Australia tsis txhob raug tej xwm txheej taug cawv txawv teb chaws.

Michelle Jones tau hais cov lus no rau hnub zwj Quag (Tuesday) tias:

"Tsim nyog tej niam txiv yuav tau zaum tsaws nrog lawv tej me nyuam tham ua ntej lawv yuav mus ntoj ncig txawv tebchaws ... kom lawv ceev faj txog ntau yam kev phom sij,"

"Tag rho tej xov xwm yeej yog ib co xov xwm zoo heev uas wb ob tug ntxhais tsis paub txog. Peb los yeej tsis paub dab tsi txog tej taug cawv methanol li thiab, yog li cov kev coj tej xov xwm no coj qhia rau tej hluas uas kawm tiav xyoo 12 ua ntej lawv yuav mus koom ua kev lom zem los yog mus ncig txawv teb chaws, yuav pab kom lawv rov qab los tsev yam nyab xeeb."

"Schoolies" ces yog lo lus uas Australia tej tub kawm tiav xyoo 12 cov kev ua kev zoo siab rau lub 11 los yog 12 hlis ntuj, uas ib txhia ces mus ntoj ncig txawv teb chaws thiab ib txhia ces mus koom tej koob tsheej rau ntau thaj chaw ntawm teb chaws no.

Bianca Jones thiab Holly Morton-Bowles nkawv ob tsev neeg chim heev tias tej zaum ntshe tseem yuav rov qab qhib lub tsev tos qhua uas nkawv ob tug ntxhais tas sim neej ntawd siv txuas ntxiv thiab. Source: AAP / Allanah Sciberras

Raws li tej xov xwm DrinkWise uas yog ib lub koom haum not-for-profit uas txhawb nqa kom tej neeg haus dej cawv raws li qhov tsim nyog haus xwb hais tias yeej muaj tej niam txiv ob tug ntawm peb tug twg yeej tau sab laj txog tej taug cawv methanol nrog lawv tej me nyuam tam li yog ib feem ntawm lawv cov kev npaj lawv tej me nyuam mus koom tej koob tsheej los yog ntoj ncig.

Tsuas muaj 18 feem pua ntawm tej tub kawm uas kawm tiav xyoo 12 thiaj uas mus ntoj ncig txawv teb chaws thiaj txhawj tias tsam cov kev haus dej cawv raug kev phom sij rau lawv xwb.

Thiab yeej muaj ib txhia tub kawm no los yuav kawm tag lub limtiam no thiab, ces tej video no thiaj qhia rau lawv thoob plaws rau tej social media, tej tshav dav hlau thiab tej teej kawm tias kom ua tib zoo xyuas kom cov kev zoo siab yam tau txais kev nyab xeeb rau lawv.

Jason Clare uas yog Australia tus nom tswj dej num kev kawm tau hais tias nws xav kom tej hluas nyuam qhuav nto nkauj nto raug uas mus ua kev zoo siab ntawd ''kom tau txais kev nyab xeeb rov qab los tsev".

Nws tau hais tias "Kuv pom tias peb tej teej kawm muaj ib co luag hauj lwm tseem ceeb pab nrog ua tib zoo xyuas kom xa tau tsab xo no thoob plaws rau tej hluas uas tau tshau txuj tiav lawm kom paub."

"Thiab lub caij uas lawv mus rau tom tej tshav dav hlau thiab xav txog txhua yam kev lom zem uas lawv tseem tab tom yuav ua/yuav koom ntawd, ces ua tib zoo xyuas kom lawv nyeem tej xov xwm no, thiab rov qab los yam tau txais kev nyab xeeb rau lawv tsev neeg thiab tej neeg lawv hlub tshua."

With reporting by the Australian Associated Press.

Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.