Thawj pwm tsav Anthony Albanese tau piav tias Israel cov kev cav tias tsis muaj tej xwm txheej tshaib nqhis ntawm Gaza ''yog tej yam uas tsis txaus ntseeg li lawm'', uas yog ib cov lus tawm tsam hnyav tshaj plaws rau Israel tus thawj pwm tsav Benjamin Netanyahu tej tsov rog no.
Albanese tau hais tej lus tawm tswv yim no rau pab nom Labor tej nom rau thaum muaj lub rooj sab laj hnub zwj Quag (Tuesday) coj los teb ib co lus nug ntawm ib tug nom uas pheej tsib kom tus coj pab nom no qhia txog nws tej xub ke tias seb yuav ua le cas coj los lees paub cov kev tsim lub teb chaws Palestine.
SBS news yeej totaub tias Albanese tau teb Netanyahu thiab Amir Meron uas yog Israel tus lwm nom lis teej faj ntawm Australia tej lus tawm tswv yim uas tau qhia rau tej neeg nthuav xov xwm ntawm Canberra hnub zwj Hli (Monday) tias Israel tsis ''lees paub tias muaj tej xwm txheej tuag tshaib tuag nqhis dab tsi los yog tej xwm txheej tshaib nqhis dab tsi ntawm Gaza Strip''.
Albanese tau hais tias "Tej lus cav tias tsis muaj tej xwm txheej tshaib nqhis ntawm Gaza mas yog tej uas tsis txaus ntseeg lawm,''
"Txawm tias Hamas tau muaj qee cov kev ceeb toom txog tej xov xwm kho mob me ntsis, los zoo li Israel yeej tiv thaiv kom tsis txhob muaj tej neeg nthuav xov xwm mus rau Gaza li.''
Albanese thiaj tau rov qab qhia txog nws cov kev txhawb nqa kom tsim ob lub teb chaws, thiab tau teev txog Nelson Mandela uas yog South Africa tus coj dhau los thiab yog tus txhawb nqa lub tswv yim anti-aparthied uas tso cai rau txhua tus neeg South Africa tsis yog neeg dawb muaj cai xaiv nom cov lus tias ''Zoo li yeej tsis muaj peev xwm daws tau tej teeb meem ib yam dab tsi txog rau thaum daws tau lawm xwb.''
Albanese los kuj tau qhia rau nws tej nom tias tej Hamas ua no ''yog tej yam phem heev' thiab tsev tsoom hwv los yeej tseem tau tsis pom zoo li qub.
Netanyahu tau hais tias "tsis muaj tej xwm txheej tshaib nqhis ntawm Gaza'' rau hauv nws phau X account hnub zwj Hnub (Sunday).
Hnub zwj Hli (Monday) ces Meron tau rov qab cav tias ''Israel yeej tsis muaj ib tsab cai siv ua kom muaj tej xwm txheej tshaib nqhis. Yeej tsis muaj ib tsab cai li no siv ... thiab Israel yeej tsis tuaj yeem yuav cia kom muaj tej xwm txheej no tshwm sim ntawm Gaza Strip.''
Trump tau hais tias "Muaj ib txhia me nyuam ces — yeej pom tias lawv yeej raug tej xwm txheej tshaib nqhis,''
"Peb yuav tsum tau pab ua ntej peb yuav ua ib yam dab tsi ntxiv. Peb yuav tsum tau nrhiav zaub mov rau tej me nyuam noj tso.''
'Yog tej yam txaus txhawj xeeb heev'
Sussan Ley uas yog tus coj ntawm lwm pab nom teb chaws tau hais ib co lus thaum koom nws pab nom no lub rooj sab laj tias ''tej duab uas peb tau pom yog tej yam txaus txhawj xeeb heev'' rau lub caij ntau limtiam tsis ntev los no, tab sis thaum SBS News tsub nias nws ces nws kuj tsis tawm tswv yim tias seb ho puas muaj pov thawj tim khawv qhia tau tias muaj tej xwm txheej tshaib nqhis tiag.
Ley tau hais tias ''Kuv zoo siab heev uas tab tom muaj tej khoom pab cuam mus pab rau Gaza tam sim no lawm, thiab Israel los yeej tau hloov nws qee cov kev pab kom muaj peev xwm xa tau tej khoom no mus pab lawm,''
"Kuv thiaj xav txhawb nqa kom ib tug twg uas pom tej xwm txheej no qhia rau lwm tus tias yog Hamas cov kev daws tej xwm txheej uas muab tej neeg txhom ceev tseg cia ntawd ces tej zaum kuj yuav pab xaus tsov rog tag kis.''
