Queensland thiab Western Australia tau tshem qee cov kev txwv rau lub caij COVID-19 sib kis

Nom tswv Queensland tau zam qee cov kev txwv tab sis yeej tseem xav kom tej neeg nyob kom nrug ntawm lwm tus neeg, tu yus tus kheej kom huv si, ua raws nom tswv tswj kev noj qab haus huv cov kev taw qhia li qub. Nom tswv xeev Western Australia los kuj qhia tias yuav tso cai rau tej neeg sib sau tau ua ke hauv tsev los yog nraum zoov txog li 10 leej.

Queensland Premier Annastacia Palaszczuk Source: AAP

Annastacia Palaszczuk uas yog tus hau xeev Queensland tau tso cai qee yam li pub tej neeg Queenslanders caij tsheb mus deb 50 km mus rau ib qho chaw twg nrog yus tsev neeg los yog tej nyob tib lub tsev ua ke mus yuav ris tsho thiab khau rau, mus xyuas tej vaj thiab noj mov picnic, tab sis tsis pub nyob sib ze sib sau coob coob ua ke, tsis pub tsav tsheb mus deb tshaj 50 km, xav kom nyob hauv yus tej zejzog xwb, xav kom sawv daws tu tus kheej kom huv si thiab nquag ntxuav tes kom huv thiab ua raws li nom tswv tswj kev noj qab haus huv cov kev taw qhia.

Thiab tus nom tswj kev noj qab haus huv ntawm lub xeev no yeej tau qhia tias, "yog yus nyob kom nrug deb ntawm lwm tus neeg npaum li cas ces yuav pab kom yus tsis txhob muaj cib fim kis tau tus mob COVID-19 no tsawg npaum li ntawd."

Mark McGowan uas yog tus hau xeev Western Australia los kuj tau qhia tias hnub tim 27 April 2020 mus ces nws yuav tso cai rau tej neeg sib sau tau ua ke txog li 10 leej hauv tsev thiab nraum zoov, tab sis yuav tsum tu yus tus kheej kom huv si thiab nyob kom nrug ntawm lwm tus.

Txhua tus neeg ntawm teb chaws Australia yuav tsum nyob kom nrug ntawm lwm tus neeg deb li 1.5 metres, thiab nom tswv tsuas pub 2 tug neeg ua ke xwb tsuas yog tias ntshe tej neeg ntawd ho yog koj tsev neeg los yog koj yim neeg uas yog tib lub tsev ua ke xwb.

Yog koj ntseeg tias tej zaum koj kis tau tus kab mob virus no lawm, txhob mus ntsib koj tus kws kho mob tab sis hu mus nrog koj tus kw kho mob tham los yog hu mus rau lub koom haum National Coronavirus Health Information Hotline tus xov tooj 1800 020 080. Thiab yog koj txog txog siav ua tsis tau pa thiab mob hnyav heev ces hu rau tus xov tooj 000 thov kev pab cuam tau.

SBS yeej kub siab los qhia tej xov xwm tshiab txog cov kab mob coronavirus (COVID-19) ua 63 hom lus rau Australia tej neeg zej zog. Yog koj xav paub txog ntau yam xov xwm ua ntau hom lus ces koj mus txheeb xyuas tau ntawm sbs.com.au/coronavirus thiab txheeb xyuas tau cov xov xwm no ua ntawv Hmoob thiab lus Hmoob ces mus saib tau ntawm SBS Hmong thiab ntawm Department of Home Affairs.

Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm SBS Hmong Facebook thiab subscribe los sis yog download thiab mloog tau ntau cov podcasts (xov xwm ua suab) ntawm google podcasts, spotify, thiab apple podcasts los yog download SBS Radio App kom koj mloog tau SBS Hmong.