Ntsiab lus tseem ceeb:
- Tej zaum RBA yuav txo kab theem paj ntawm 4.1 los ua 3.85 feem pua.
- Raws li tej kws paub tshuaj ntsuam tej kiab khw lagluam vaj tse hais ces tej zaum cov kev txo paj kuj yuav ua rau tej nqe tsev ib nyuag kim me ntsis ntxiv.
- Darwin thiab Melbourne ces tseem yog ob lub nroog uas muaj peev xwm yuav tau tsev nyob yog xam raws tej nyiaj khwv tau thiab tej nqe tsev.
Muaj kev cia siab tias txhab nyiaj faj seeb haiv (Reserve Bank of Australia - RBA) iyuav txo kab theem paj hnub no yam tsawg txog li 0.25 feem pua.
Txawm muaj ib txhia economists thiab tej txhab nyiaj tau kwv yees tias RBA yuav txo kab theem paj 0.25 feem pua thaum RBA pawg tswj sab laj hnub no, los lub txhab nyiaj NAB kuj kwv yees tias yuav tso ntau tshaj ntawd txog ob npaug txog li 0.5 feem pua. Hnub tim 16 lub 5 hlis ntuj (2025) ces ASX muaj kev cia sia txog 96 feem pua tias yeej yuav txo tus kab theem paj tam sim no ntawm 4.10 feem pua mus ua 3.85 feem pua.
Tej xov xwm Consumer Price Index (CPI) 3 lub hli txog lub 3 hlis ntuj dhau los yeej nyob ntawm 2.4 per cent thiab yog xam raws tej nyiaj poob nqe theem nrab ces nyob rau ntawm 2.9 feem pua, uas yog ib co kab theem uas RBA pom tias zoo, ces tej zaum thiaj cia siab tias yuav txo kab theem paj.
Tab sis RBA cov kev txiav txim siab txo kab theem paj yeej cuam tshuam nrog cov kev muaj peev xwm yuav tau tsev thiab ces tej zaum thiaj yuav muaj feem cuam tshuam raug tej nqe tsev rau tej neeg uas xav yuav tsev sai rau yav pem suab no.
Ces tsis hais tej neeg tshuaj ntsuam txog tej kiab khw lagluam vaj tse, tej neeg xav yuav tsev los yog ib tug twg uas kub siab txog Australia tej lagluam vaj tse thiaj xav tau lus teb rau nqe lus nug tseem ceeb no tias: Cov kev txo kab theem paj puas yuav pab kom tsev pheej yig zog?
Source: SBS
Puas yog cov kev txo kab theem paj yuav ua rau nqe tsv kim tuaj ntxiv?
Tim Lawless uas yog ib tug kws tshuaj ntsuam txog tej kiab khw lagluam vaj tse tau hais tias tejzaum cov kev txo kab theem paj kuj yuav ua rau tsis muaj peev xwm yuav tsev thiab yog piv tej nqe tsev rau tej nyiaj khwv tau.
Nws tau qhia rau SBS News tias thaum uas tej neeg xav yuav tsev muaj peev xwm qev tau nyiaj ntau zog ntxiv tom qab tau txo paj lawm, ces keeb kwm yeej qhia tias yuav ua rau muaj teeb meem rau tej kiab khw lagluam vaj tse.
Tus coj tseem ceeb ua cov kev teeb txheeb no ntawm lub koom haum Cotality (uas paub yav tag los tias yog CoreLogic) tau hais tias:
"Tej zaum peb kuj yuav pom tias ua rau tej nqe tsev kim me ntsis ntxiv rau lub caij txo kab theem paj ib nyuag qes zog no thiab,''
"Vim rau qhov peb tau tab tom pom tias cov kev muaj peev xwm qev tau nyiaj ntau zog ntxiv tab sis tej cuab yig tej nyiaj khwv tau los zoo li yeej tsis tshua txaus siv lawm. Thiab yeej muaj xov xwm teev tseg ntau heev tias ntshe yuav ua rau peb haj yam tsis muaj peev xwm yuav tau tsev ntxiv pib txij no mus.''
Nws tau hais ntxiv tias tej zaum tej neeg yuav tsev los kuj ''xav rau kis tsis zoo ntau tuaj ntxiv thiab'', raws li tau tshuaj ntsuam tej neeg cov yuav khoom siv cov kev ntseeg siab ces kuj pom tias tej neeg yuav tsev mloog tias ntshe tej zaum lawv yuav tsis muaj peev xwm yuav tau tsev thiab.
Nws tau hais tias "Thiaj paub tseeb tias muaj kev sib cuam tshuam ntawm cov kev tso siab tias muaj peev xwm yuav thiab tej kiab khw vaj tse,''
"Cov kev yuav ib lub tsev yog ib cov kev txiav txim siab uas yuav tau kub siab them tiag tiag, yog yus ntseeg tias yus muaj peev xwm ua tau ib txoj hauj lwm thiab muaj peev xwm them tsev los yog qev tau nyiaj yuav tsev, ces yuav ua rau yus txaus siab hlo rau cov kev txiav txim siab li ntawd.''
Tej kiab khw vaj tse qhov twg zoo dua?
Muaj ib txhia neeg yuav tsev ntawm ib co nroog ces muaj kev ntseeg sia ntau dua lwm cov, vim muaj cov kev muaj peev xwm yuav tsev sib txawm ntawm tej xeev thiab.
Lawless tau hais tias cov twj uas siv ntau tshaj plaws coj los qhia tias seb puas muaj peev xwm yuav tsev yog muab lub nqe tsev piv rau tsev neeg tej nyiaj khwv tau los.
Nws tau hais tias "Melbourne tau cov zauv no txog 7, txhais tias yog yus yuav tsev, yus tsev neeg khwv tau nyiaj theem nrab thiab yus yuav tej nqe tsev nrab, ces yus yus tab tom siv nyiaj txog li ntawm 7 npaug ntawm tej nyiaj yus khwv tau tag nrho ib xyoos twg,''
"Thiaj pom tias Melbourne muaj cov kab theem muaj peev xwm yuav tau tsev tsawg ces thiaj yog tej yam zoo.''
Vim yog piv Melbourne rau Australia tej nroog feem coob ces yeej tsis tshua muaj peev xwm yuav tau yog xam raws tib tug qauv xam no.
Rau qhov Sydney tau cov kab theem siab tshaj plaws ntawm 9.8, ntxiv ntawd yog Adelaide tau 9, Brisbane tau 8.3, Perth tau 7.4 thiab Hobart tau 7.2, tab sis Melbourne thiab ACT tsuas tau 6.1 thiab Darwin tau 3.9 xwb.
Cov kev txo kab theem paj zaum no yuav pab koj txuag kom tau them tsawg xam raws hli npaum li cas?
Yog tias koj twb qev nyiaj yuav ib lub tsev lawm, ces tej zaum cov kev txo kab theem paj 0.25 feem pua kuj yuav pab tau koj lub cuab yig tej nyiaj siv me ntsis thiab yog tias tus kab theem paj ntawd nyob li qub los yog raug txo qes zuj zus ntxiv rau ntau lub hli ntxiv tom ntej no.
Ib tug txwv tsev twg uas qev nyiaj $500,000 yuav tsev nyob kuj yuav txuag tau nyiaj txog $76 ib hlis twg, raws li tej xov xwm tau los ntawm lub koom haum Canstar uas piv cov kev qev nyiaj siv hais.
Sally Tindall uas yog tus coj uas tswj tej xov xwm teev txog tej neeg cov kev xav ntawm lub koom haum Canstar hais tias cov kev txo kab theem paj kuj yog ib lub cib fim zoo yuav ua rau tej chaw qev nyiaj yuav kam qev nyiaj rau tej neeg qev raws li cov kab theem variable mortgage thiab.
Credit: SBS News
Nws tau qhia rau SBS News tias "Yog xam rau coob leej ntau tus lawm, ces txhawm thawj txhawj ib los yog ob xyoo ntawd kuj yuav pab kom yus txuag tau nyiaj zoo dua qhov yuav rov qab mus refinance tshiab.''
Tab sis yog yus rov qab refinance ces kom nco tias tseem yuav tau them qee yam nqe rau lub txhab nyiaj uas yus qev nyiaj yuav tsev tam sim no thiab yog tias yus hloov mus qev nyiaj them tsev nrog ib lub txuam txhab nyiaj tshiab.
Vim ib txhia txhab nyiaj yeej yuav tsub nqe rau yus them yog yus hloov ntawm lub yus qev tam sim no mus siv dua lub tshiab los yog kuj yuav hais kom yus them lwm yam nqe cuam tshuam txog cov kev hloov ntawm lub txhab nyiaj tam sim no mus siv lub tshiab thiab.
Tej xov xwm ntawm zaj xov xwm no tsuas yog coj los qhia ua kev paub rau sawv daws xwb, tsis yog yuav coj los qhia tam li yog ib cov kev taw qhia nyiaj txiaj. Tsim nyog koj sab laj nrog tej neeg muaj ntaub ntawv raug cai uas paub ua tej hauj lwm no kom thiaj ua tau cov kev txiav txim siab haum raws li qhov koj xav tau.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follw los yog lwm cov podcasts platforms (iHeart, Amazon Music & Podcasts).
