Ntsiab lus tseem ceeb:
- Samantha Mostyn uas yog ib tug kws lij choj dhau los raug teeb tsa ua Australia tus nom governor-general zum 28.
- Nws yuav los lees ua txoj hauj lwm no txij tim 1 lub 7 hli ntuj xyoo 2024 no mus.
- Mostyn thiaj yuav yog tus poj niam ob uas tau ua txoj hauj lwm governor-general ntawm Australia tej keeb kwm.
Samantha Mostyn tau raug teeb tsa los ua Australia tus nom governor-general zum 28.
Thiab nws yuav los lees ua txoj hauj lwm no txij tim 1 lub 7 hlis ntuj (2024) no mus, hos David Hurley uas yog tus Governor-General tam sim no ces yuav xaus nws txoj hauj lwm lawm.
Mostyn uas yog ib tug neeg yeej tau ua hauj lwm los ntev txog cai lij choj thiab lagluam los kuj tau cov khoom plig Order of Australia in 2021 vim tej hauj lwm "nto npe uas nws tau ua pab rau tej lagluam, tej zejzog thiab tej poj niam''.
Thawj pwm tsav Anthony Albanese tau piav txog Mostyn tias "yog ib tug coj tiam vam meej thiab yog tus coj uas muaj kev cia siab rau peb haiv neeg vam meej thiab haiv neeg muaj kev vam kev cia siab uas xav rau kis zoo''.
"Nws txoj kev ua tus coj qhia txog peb tej neeg Australia txoj kev vaj huam sib luag, kev ncaj ncees thiab lub luag hauj lwm uas los pb tsim kom tau lub neej pem suab zoo tshaj qub ntxiv rau phaum neeg txuas ntxiv tom ntej no''.
Samantha Mostyn yog leej twg?
Mostyn yeej muaj keeb kwm ua hauj lwm pab zej tsoom thiab yog ib tug neeg tawm tsam thiab txhawb nqa kom tau txais vaj huam sib luag rau poj niam thiab txiv neej thiab yog ib tug los daws tej teeb meem huab cua pauv hloov.
Ces nws thiaj yuav yog tus poj niam zum ob ntawm Australia tej keeb kwm uas tau los ua txoj hauj lwm tam li yog tus nom governor-general ntxiv ntawm Quentin Bryce.
Mostyn los yeej muaj keeb kwm ua hauj lwm pab zej tsoom, ua tus coj rau ntau cov koom haum NGOs li Beyond Blue, the Foundation for Young Australians and Australia's National Research Organisation for Women's Safety.
Samantha Mostyn uas yog Australia tus nom governor-general tshiab thiab thawj pwm tsav Anthony Albanese thaum nrog tej neeg nrhiav xov xwm tham ntawm tsev tsoom fwv ntawm tuam ceeb Canberra hnub zwj Feej (Wednesday). Source: AAP / Mick Tsikas
Mostyn los kuj yog ib tug kws lij choj thiab kuj yog ib tug tub koom siab ntawm Court of Appeals of the NSW Supreme Court, ua ntej yuav ua hauj lwm rau ntau lub tuam txhab lij choj ntawm Sydney.
Ces nws thiaj tau ua hauj lwm ntau yam nrog Australia tej lagluam, ua hauj lwm nrog tej tuam txhab telecommunications thiab tej lagluam muag nyiaj tuav pov hwm (Insurance industry). Nws kuj tau ua tus coj tseem ceeb rau lub tuam txhab lagluam Virgin Australia thiab Transurban thiab yog tus coj ntawm Citibank Australia.
Thawj pwm tsav Albanese thiaj tau teeb tsa Mostyn los ua thawj tug poj niam los tswj lub koom haum AFL thiab nws kuj yog ib tug ''muaj cov kev txhawb nqa muaj zog heev'' rau cov kev tsim poj niam cov kev sib tw ncaws pob Australian Football League (AFL).
Xyoo 2020 ntawd ces Mostyn kuj tau txais United Nations (UN) ib co khoom plig rau tej hauj lwm "txhim kho ceev txuag tau tej ib puag ncig raws li UN tau teev tseg thiab nws cov kev ua tus coj rau cov kev muaj feem koom ntawm ntau tsav neeg ntawm Australia''.
Tsis tas li ntawd los nws kuj tau ua ntau yam txog cov kev txhim kho ceev txuag tau tej ib puag ncig thiab tej huab cua pauv hloov rau lub caij nws ua nws tej hauj lwm feem ntau, ces thiaj raug lees paub thiab tau txais cov khoom plig 2019 Investor Group on Climate Change awards.
Ho muaj tej lus tawm tswv yim dab tsi txog cov kev teeb tsa Mostyn los ua txoj hauj lwm no?
Zali Steggall uas yog ib tug nom kis xeev qes ywj pheej uas tswj lub rooj nom Warringah kuj tau sau ntawv nrog Mostyn zoo siab ntawm nws phau X account (Twitter) thiab hais tias ''nws yog ib tug coj uas muaj tsab peev xwm heev thiab yog tus muaj cov kev kub siab lug los txhawb nqa cov kev daws tej teeb meem huab cua pauv hloov, txhawb nqa ntau tsav neeg thiab cov kev vaj huam sib luag''.
Professor Nareen Young uas yog ib tug coj tseem ceeb uas tswj kev kawm thiab saib xyuas lub tsev kawm qib siab University of Sydney (UTS) no lub teej kawm lagluam uas tswj tej cai, tej txhooj cai qhia ntawv thiab nyiaj txiaj yeej tau ua kev zoo siab nrog tus neeg nws tau ua hauj lwm ua ke ''thiab yog ib tug phooj ywg los ntev, uas txhawb nqa ntau tsav neeg kom muaj feem koom thiab yog tus txhawb nqa Australia tej neeg txum tim, txhawb nqa poj niam tej cwj pwm zoo, muaj txoj kev hlub tshua lwm tus thiab hwm lwm tus'' uas raug txib kom ua txoj hauj lwm no.
Hos Lucy Turnbull uas yog ib tug uas tau cov khoom plig Order of Australia los kuj tau ua kev zoo siab hauv nws phau X account tias cov kev teeb tsa Mostyn no yog ''ib co kev xaiv zoo heev''.
Andrew Leigh uas yog ib tug nom kis xeev qes ntawm pab nom Labor los kuj tau hais tias Mostyn yog ''ib tug uas txhawb nqa cov kev muaj feem koom thiab kev vaj huam sib luag rau pab lagluam thiab kev sib tw'' thiab qhia tias nws yuav yog ib tug ''nom sawv cev rau huab tais (Governor-General) uas muaj peev xwm heev''.
Ntxiv ntawd los kuj tau muaj ntau lub koom haum tau ua kev zoo siab rau tej xov xwm teeb tsa nws, suav lub koom haum Women for Election, FutureWomen and the Australian Council for International Development nrog.
Txoj hauj lwm governor-general ho ua dab tsi?
Txoj hauj lwm governor-general ces yog ib tug neeg sawv cev rau Askiv tsev neeg huab tais - uas yog tham txog kis no lawm, ces yog sawv cev rau huab tais Charles III
Tsis tas li ntawd los governor-general txoj hauj lwm tseem yog tus coj sawv cev rau lub teb chaws uas ua tej koom txoos ntau yam ntawm ib hnub rau ib hnub sawv cev rau txiv huab tais thiab.
Thiab kuj muaj peb yam ntawm Commonwealth parliament.
Ces tus nom governor-general thiaj muaj tej fwj chim li txib, cheem los yog los rhuav tsev tsoom fwv; los siv cov kev taw qhia raws li qhov tsim nyog; los kos xyeem mem tes rau tej cai tsim tshiab coj los siv thiab sau daim ntawv tso cai rau nom tswv tej kev xaiv tsa tsoom fwv.
Ntxiv ntawd los nws kuj siab xyuas cov kev teeb tsa thiab rho tej nom ministers tawm; thov kho dua tej txhooj cai tswj haiv; sau cov ntawv lees paub thiab tej cai; thiab teeb tsa lub tuam chav tswj dej num txawv teb chaws thiab making statutory appointments.
Lwm cov teb chaws puas muaj tus nom governor-general?
Tej teb chaws feem coob uas tseem yog ib feem ntawm Commonwealth ces yeej tseem muaj tus nom governor-general — uas muaj cov teb chaws li Canada, New Zealand, Jamaica, Tuvalu thiab ntau lub teb chaws ntxiv.
Yav tag los ces tej nom governors-general yeej yog neeg Askiv xwb, tab sis ntev ntxiv tuaj ces thiaj tso tseg tsis teeb tsa neeg Askiv ntxiv lawm.
Canada thiab New Zealand ces yeej yog ob lub teb chaws uas muaj tej poj niam neeg txum tim los ua lawv tus nom governor-general, hos Australia ces yeej ib txwm tsis muaj ib tug neeg txum tim twg los ua txoj hauj lwm no li.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
